Read Nguna Togoa Etafe North PAKI TEA NE CALATIA 3 Bible Online

PAKI TEA NE CALATIA 3 - Nguna Togoa Etafe North bible

PAKI TEA NE CALATIA 3

¹Tea ni Calatia manumatavusa maga, sei e mari doa mu, waina Yesu Kristo e pei tea vea midiriana narae ni namatamu maga tea turiana nakau valadagoto?

²Tea sikai maau waia a masauna naga aga ataedogo e kiamu, Ku dape Naatana pae nawosiana maga ni nawotaeana, kite pae narogoana ni nasaralomauana?

³Ku pei tea manumatavusa dapala waia kite? Waina ku atulake sua pae Naatana, ku do pei tea marisuaana pae nap̃okasi ragi waia kite?

⁴Ku sua m̃oli ki narogokitesaana laapa dapalana kite? Ku pe sua m̃oli ki da lomau.

⁵Nalakena tea wanogoe nae waina e do pitua ki Naatana paki mu, po do p̃osiwosi ki nawosiana kasua maga m̃aleoputo kakamu, e do mari a pae nawosiana maga ni nawotaeana, kite pae narogoana ni nasaralomauana?

⁶Dapala waina Abraham e saralomau navasaana ki Sup̃e, go e maneana pei tea midoakiana naga ega vei namarinaleoleanaana.

⁷Nalakena tea wanogoe kuga atae naga tea maga waina eu pei tea ni nasaralomauana, nara eu pei Abraham natuna maga.

⁸Ma navasaana midiriana, waina e pea punusi naga Sup̃e e do mari leana ki tea ni nalauna p̃ota maga ki nasaralomauana, e pea dogorogo ki narogorogoana wia paki Abraham, e naga, Nalauna maga mamau puti euga wo pei tea vasap̃iakiana ako.

⁹Nalakena tea wanogoe tea maga waina eu pei tea ni nasaralomauana eu pei tea vasap̃iakiana sikoti Abraham waina e saralomau.

¹⁰Nalakena tea maga waina eu pei tea ni nawosiana maga ni nawotaeana eu doko etano ki navasasakiana sikai: nalakena e pei tea midiriana, Sara naata waina eu da doko naleo maga mamau puti mau waina eu pei tea midiriana tusi ni nawotaeana, naga euga mari ra, eu pei tea vasasakiana.

¹¹Ma naga te naata sikai e da pei tea marileanakiana ki nawotaeana namata ni Sup̃e mau, e doko lina: nalakena, Tea leana ega wo mauri ki nasaralomauana;

¹²ma nawotaeana e da pei tea ni nasaralomauana mau; ma, Tea waina e mari ra ega wo mauri ara.

¹³Kristo e daulua gida m̃elu dua ki navasasakiana ni nawotaeana, e pei tea mariana e pei navasasakiana oli gida: nalakena e pei tea midiriana, Sara naata waina eu dau nakau dau eu pei tea vasasakiana:

¹⁴naga navasap̃iakiana ki Abraham ega umai paki tea ni nalauna p̃ota maga doko Kristo Yesu; naga tuga tape nasaiana ni Naatana pae nasaralomauana.

¹⁵Tai maga, a pasa pae naatam̃oli: Navasasokiana ki naatam̃oli sikai, ragi waina e pei tea lawosokiana, te naata e da mari a e pei tea p̃alo mau, kite e sokari a mau.

¹⁶Ma nasaiana maga eu pei tea noaana paki Abraham, go paki naworana. E da naga, Go paki naworaworana mau, dapala e pe noa tea laapa, ma dapala e pe noa sikai maau, Go paki naworam̃a, waina e pei Kristo.

¹⁷Ma a noa tea waia; Navasasokiana waina e pea pei tea lawosokiana pae Sup̃e, nawotaeana, waina e umai natau p̃onotia pati rualima takuna dolu edaku ki nia, e da mari puoli ki nia mau, naga ega mari nasaiana ega vei tea m̃oli.

¹⁸Nalakena tea veaniana e pe vei tea ni nawotaeana, e pe ta moro pei tea ni nasaiana mau: ma Sup̃e e dua m̃oli ki Abraham asa pae nasaiana.

¹⁹Nalakena tea wanogoe nawotaeana e pei nasava? E pei tea lawokiana sokari tea vea nalakena natapiriana maga, pa pa naworana ega umai waina nasaiana e pei tea saiana paki nia; go e pei tea tawonakiana pae agelo maga doko nam̃elearu ni tea vae namawota sikai.

²⁰Ma tea vae namawota e da pei tea vae namawota ni tea sikai maau mau; ma Sup̃e e pei tea sikai maau.

²¹Nalakena tea wanogoe nawotaeana e pei tea tip̃a nasaiana maga ki Sup̃e kite? Ega ta dapala nogoe mau: nalakena nawotaeana sikai e pe vei tea vituakiana waina e mari atae pakamauri, namarinaleoleanaana e pe vei tea ni nawotaeana lomau.

²²Ma navasaana midiriana e kokoro tea maga mamau puti etano ki namarinaleosaana, naga nasaiana ki nasaralomau‐Yesu‐Kristo‐ana ega vei tea vituakiana paki tea maga waina eu saralomau.

²³Ma ragi waina nasaralomauana wanogoe e ko da umai mau, tu pei tea vavaigoroana etano ki nawotaeana, tea kokoroana raki nasaralomauana waina ega edaku pei tea noapakasakiana.

²⁴Nalakena tea wanogoe nawotaeana e pei tea viragi pasa piseiki anigida paki Kristo, naga tuga vei tea marileanakiana ki nasaralomauana.

²⁵Ma ragi waina nasaralomauana wanogoe e umai sua, tu da moro doko etano ki tea viragi pasa piseiki sikai mau.

²⁶Nalakena ku mamau puti pei Sup̃e natuna maga pae nasaralomauana doko Kristo Yesu.

²⁷Nalakena tea maga waina ku pei tea bapetisoana paki Kristo ku suni Kristo.

²⁸Tea ni Yudea sikai e da doko m̃aleoputo kakada mau go tea ni Hellas mau, naviti sikai e da doko mau go tea dum̃ana doko mau, naanoai sikai go nagoroi sikai ero da doko mau: nalakena nimu ku mamau puti pei tea sikai maau doko Kristo Yesu;

²⁹Ma nimu ku pe vei tea ki Kristo, ku pei naworawora ni Abraham nalakena tea wanogoe, go tea veanipioli maga pae nasaiana.