Read Nguna Togoa Etafe North PAKI TEA NE CALATIA 4 Bible Online

PAKI TEA NE CALATIA 4 - Nguna Togoa Etafe North bible

PAKI TEA NE CALATIA 4

¹Ma a noa naga ragi varau waina tea veani pioli e pei piakiki, e da panop̃ota te navatuna ki naviti sikai mau, go e pei talakea ni tea maga mamau puti;

²ma e doko etano ki tea leo paratiki maga go tasiga leo paratiki maga pa pa paki naaleatia tatutakiana ki tamana.

³Dapala nogoe nigida ma, ragi waina tu pei piakiki maga, tu pei naviti maga etano ki tea vea maga ni maramana:

⁴ma ragi waina navakavuroana ni ragi e umai, Sup̃e e dip̃aki lua Natuna umai, e pakilina m̃elu nagoroi sikai, e pakilina etano ki nawotaeana,

⁵naga ega taulua tea maga waina eu doko etano ki nawotaeana, naga tuga tape navakasereana ni navei‐natuna‐ana.

⁶Go nalakena ku pei natuna maga, Sup̃e e dip̃aki lua Naata ni Natuna umai paki nap̃op̃ogida, e do pioso, Abba, Mama.

⁷Nalakena tea wanogoe ku da moro pei naviti sikai mau, ma ku pei natuna sikai; ma ku pe vei natuna sikai, ku moro pei tea veani pioli sikai pae Sup̃e.

⁸Ma ragi wanogoe, waina ku da atae Sup̃e asa mau, ku pei naviti maga ki tea maga waina eu da pei sup̃e maga pae navakilinaana mau:

⁹ma ragi waia waina ku atae Sup̃e asa, go parua ki nia, waina ku pei tea ataeana asa pae Sup̃e, ekasana ku moro liliu paki tea vea maga waina eu pei tea manainai go tea tika, waina ku masauna naga kuga moro pei naviti kakada?

¹⁰Ku do midoa ki paratiki naaleatia maga, go atelagi maga, go ragi maga, go natau maga.

¹¹A mataku nalo kakamu, mase a pe wosiwosi‐mawosa m̃oli paki mu.

¹²A pavarani mu, tai maga, kuga vei tea tapala au, nalakena kinau ma a pei tea tapala mu.

¹³Ku da mari dagele paki nau te navatuna mau: ma ku atae naga nalakena namanainaiana sikai ni nap̃okasi a dogorogo ki narogorogoana wia paki mu ragi vea;

¹⁴go namaridogo‐muana doko nap̃okasigu ku da midoaki p̃alo ki nia mau, go ku da mamarago ki nia mau; ma ku piragi au dapala a pe vei agelo sikai ki Sup̃e, dapala a pe vei Kristo Yesu.

¹⁵Go namaropaana animu waina ku noa e wai? Nalakena a manimu noasokisoki, naga, e pe vei tea mariataeana, ku pe tape lua namatamu maga po dua au ara.

¹⁶Nalakena tea wanogoe a po pei tea kokona ki mu, nalakena a do noa ki mu nalomauana kite?

¹⁷Eu da mari suisui p̃ia paki mu mau; ma eu masauna naga euga kokoro mu pano naga kuga mari suisui paki da.

¹⁸Ma e p̃ia naga kuga vei tea marisuisuipakiana nalo ni tea wia sara ragi, go ega ta pei ragi waina a doko sikoti mu sikina mau.

¹⁹Piakirikiri aginau maga, waina a moro pitinu ki mu pa pa Kristo ega vei tea maridawonakiana doko mu,

²⁰ma a mari atae masauna naga aga toko sikoti mu ragi waia, po noa nadaleogu ega vanop̃ota; nalakena a midoaki putuaki nalo kakamu.

²¹Kuga noa ki nau, nimu waina ku masauna naga kuga toko etano ki nawotaeana, ku da dogo nawotaeana kite?

²²Nalakena e pei tea midiriana, naga Abraham e peani natuna dua, sikai e m̃elu nagoroi suasua, go sikai e m̃elu nagoroi waina e dum̃ana doko.

²³Ma tea waina e m̃elu nagoroi suasua e pakilina pae nap̃okasi; ma tea waina e m̃elu nagoroi waina e dum̃ana doko e pakilina pae nasaiana.

²⁴Naleo maga wanogoe tea p̃ota sikai e pei tea noaana ara: nalakena nagoroi dua wanogoe ero pei navasasokiana dua; sikai e m̃elu tava Sinai, e do pisola ki natuna maga paki naveinavitiana, nae e pei Hacar.

²⁵Ma Hacar wanogoe e pei tava Sinai ni Arabia, go e lawodu pitata ma Yerusalem waina e doko ragi waia: nalakena e pei naviti nara ma natuna maga.

²⁶Ma Yerusalem ni elagi e dum̃ana doko, go nae e pei p̃ilagida.

²⁷Nalakena e pei tea midiriana, e naga, P̃a laelaea, tea dim̃o waina ku da pisola mau; P̃a mapua po pioso, waina ku da dogo navitinuana ni navisolaana mau: Nalakena natuna maga ni tea masikina doko eu laapa liu tea ni tea veani anawota.

²⁸Ma nigida, tai maga, dapala Isaak, tu pei natuna maga ni nasaiana.

²⁹Ma dapala waina e doko ragi wanogoe tea waina e pakilina pae nap̃okasi e kopalele tea waina e pakilina pae Naatana, e moro dapala nogoe ragi waia.

³⁰Ma navasaana midiriana e noa nasava? P̃a tip̃aki lua nagoroi suasua go natuna: nalakena natu ni nagoroi suasua ega ta peani pioli sikoti natu ni nagoroi waina e dum̃ana doko mau.

³¹Nalakena tea wanogoe, tai maga, tu da pei natu ni nagoroi suasua mau, ma tu pei natu ni nagoroi waina e dum̃ana doko.