Read Nguna Togoa Etafe North PAKI TEA NE CALATIA 5 Bible Online

PAKI TEA NE CALATIA 5 - Nguna Togoa Etafe North bible

PAKI TEA NE CALATIA 5

¹Kristo e peresi gida ki naveresiana: nalakena tea wanogoe kuga lawodu asa, po da pei tea soliana mau ki nakau ni nanoa ni navei‐naviti‐ana.

²Kuga leo, kinau Paulo a noa ki mu, naga, ku pe tape natovadaviviana, Kristo e pe wo da silae mu te navatuna mau.

³Go a moro noa sokisoki kasua paki sara naatam̃oli waina eu dape natovadaviviana, naga e one ara one naga euga mari nawotaeana mamau.

⁴Ku pei tea maripuolikiana m̃elu dua ki Kristo, nimu waina ku do pei tea marileanakiana doko nawotaeana; ku dowo m̃elu dua ki nasaup̃iaana.

⁵Nalakena kinami au do leogoro ki Naatana naleogoroana ni namarinaleoleanaana m̃elu nasaralomauana.

⁶Nalakena natoko‐Kristo‐Yesu‐ana natovadaviviana e da mari te navatuna asa mau, go natikaana ni natovadaviviana mau; ma nasaralomauana waina e do p̃osiwosi pae nadodomiana.

⁷Ku pea do sava p̃ia; sei e dugoro mu naga kuga ta dogo paratiki nalomauana mau?

⁸Navasadieana wanogoe e da m̃elu tea waina e soso mu mau.

⁹Leven kiki e levena ki taua mamau.

¹⁰Kinau a saralomau kasua nalo kakamu doko Nawota, naga kuga wo da midoaki te navatuna p̃ota mau: ma te naata waina e do durua ki mu ega wo dapetape navasap̃otaeana.

¹¹Ma kinau, tai maga, a pe ko dogorogo ki natovadaviviana, ekasana a ko pei tea kopaleleana? Go tea tapilagonaana ni nakau valadagoto e pe vei tea maripuolikiana.

¹²A masauna naga tea maga waina eu durua ki mu euga vei tea taeluaana.

¹³Nalakena nimu, tai maga, ku pei tea sosoana raki naveresiana; ma kuga ta mari naveresi‐mu‐ana ega magi nap̃okasi pei tea vuatiana sikai mau, ma kuga tum̃amu manimu pei tea suasua maga pae nadodomiana.

¹⁴Nalakena nawotaeana mamau e pei tea vakavuroana doko navasaana sikai maau, doko tea waia; P̃a dodomi tea ni m̃aladigi ki‐go ega tapala waina ku dum̃am̃a dodomi ko.

¹⁵Ma ku pe tum̃amu kati mu po dum̃amu dinomi mu, kuga vunusi naga kuga ta pei tea mariana kuga maanopu dum̃amu pae mu mau.

¹⁶Ma a naga, Kuga surata pae Naatana, go kuga wo da pakavuro namasauna ni nap̃okasi mau.

¹⁷Nalakena nap̃okasi e masau dip̃a Naatana, go Naatana e masau dip̃a nap̃okasi; nalakena nara ero dum̃ada kokona ki da; naga kuga ta mari tea maga waina ku masauna naga kuga mari ra mau.

¹⁸Ma ku pe vei tea marakiana ki Naatana, ku pe ta doko etano ki nawotaeana mau.

¹⁹Ma nawosiana maga ni nap̃okasi eu doko lina, waina eu pei namaripeleana, naloaana,

²⁰nam̃asausauana, nalotu‐ki‐nasup̃e‐ana, nawosidoaana, nakokonaana maga, navileana, natotowokasuaana maga, namaritausuana maga, namariputuakiana maga, natap̃otaeana maga,

²¹tagona p̃ota maga, naroitoiana maga, namaripunueana maga, namatamalokuana, namaridarataraana maga, go tea tapala nogoe maga: waina a pea noa ki mu asa, dapala waina a pea noa ki mu asa sala vea, naga tea maga waina eu mari tea tapala nogoe maga euga wo da peani namarakiana ki Sup̃e mau.

²²Ma nawa ni Naatana e pei nadodomiana, nalaelaeaana, natam̃ateana, naveimaritasokiparauana, navakaleana, nawiaana, nasaralomauana,

²³namatemateana, natum̃anasokiana: nawotaeana waina e dip̃agoro tea tapala nogoe maga e da doko mau.

²⁴Go tea maga waina eu pei tea ki Kristo Yesu eu duri nap̃okasi nakau valadagoto go narogoana kakana maga go namasauana kakana maga.

²⁵Tu pe mauri ki Naatana, tuga moro surata pae Naatana.

²⁶Tuga ta pei tea samasama p̃alo mau, doko dum̃agida mari gida tuga maeto, doko dum̃agida doitoi gida.