Read Nguna Togoa Etafe North PAKI TEA NE CALATIA 6 Bible Online

PAKI TEA NE CALATIA 6 - Nguna Togoa Etafe North bible

PAKI TEA NE CALATIA 6

¹Tai maga, naatam̃oli sikai e pe vei tea vuasokiana te natapiriana, nimu waina ku pei tea ni Naatana, kuga moro piragi tea tapala nogoe ega liliu doko Naatana ni namatemateana; doko do dum̃am̃a leoparati ki‐go, naga nigo ma p̃a ta pei tea maridogoana mau.

²Kuga tum̃amu manimu dapetape natapetapeana animu maga, go kuga vakavuro ega tapala nogoe nawotaeana ki Kristo.

³Nalakena te naata sikai e pe tum̃ana midoaki nia naga e pei te navatuna, ragi waina e pei tea m̃oli, e pe tum̃ana soro e.

⁴Ma sara naatam̃oli euga sikasikai maridogo nawosiana adeada, go ragi wanogoe euga wo dum̃ada peani tea vakavakaeana nalo kakada sikida, go euga ta peani a nalo ni tea p̃ota mau.

⁵Nalakena sara naatam̃oli euga wo sikasikai dapetape natapetapeana adeada.

⁶Ma tea waina e pei tea vasapiseikiana navasaana ega tua tea waina e pasapiseiki nia namagovai ni naleo wia aneana maga mamau puti.

⁷Kuga ta midoaki pele mau; Sup̃e e da pei tea marisaudoakiana mau: nalakena tea waina naatam̃oli sikai e pe sapuraki nia, tea wanogoe ega wo dagaukotovi a.

⁸Nalakena tea waina e do sapuraki paki nap̃okasina ega wo dagaukotovi m̃elu nap̃okasi namesoana; ma tea waina e do sapuraki paki Naatana ega wo dagaukotovi m̃elu Naatana namauriana waina e du mau du.

⁹Ma tuga ta pei tea p̃op̃otoro mari tea wia mau: nalakena tu pe ta dodosua mau, tu pe wo dagaukotovi ragi kakana.

¹⁰Nalakena tea wanogoe, dapala waina tu peani ragi tuga to mari tea waina e p̃ia paki tea maga mamau puti, go ega warua liu paki tea maga waina eu pei tea ni nasaralomauana.

¹¹Kuga vunusi leter warua maga waina a midiri paki mu ara ki nam̃elearugu.

¹²Tea maga waina eu masauna naga euga mari naviseikiana wia nalo ni nap̃okasi, eu do maridie mu naga kuga vei tea tovadaviviana; nalakena tea sikai maau naga euga ta pei tea kopaleleana mau nalakena nakau valadagoto ki Kristo.

¹³Nalakena tea maga waina eu do pei tea tovadaviviana nara eu da pavaigoro nawotaeana mau; ma eu masauna naga nimu kuga vei tea tovadaviviana, naga euga vakavakae nalo ni nap̃okasimu.

¹⁴Ma ega ta pakilina ki nau mau naga aga vakavakae, ma aga vakavakae nalo ni nakau valadagoto ki Nawota anigida Yesu Kristo ega sikina, waina maramana e pei tea turiana nakau valadagoto pae asa paki nau, go kinau paki maramana.

¹⁵Nalakena natovadaviviana e da pei te navatuna mau, go natikaana ni natovadaviviana mau, ma tea tawonakiana vau.

¹⁶Go tea maga waina euga wo surata pae totowo wanogoe, natam̃ateana ega toko ara, go nadodomiana, go eroga toko Israel ki Sup̃e.

¹⁷Te naata ega ta mari navitinuana paki nau mau pae ragi waia pa pa: nalakena kinau a do pilake wotu maga ki Yesu doko nap̃atokogu.

¹⁸Nasaup̃iaana ki Nawota anigida Yesu Kristo ega sikoti naatamu, tai maga. Amen.