Read Nguna Togoa Etafe North PAKI TEA NE EFESO 4 Bible Online

PAKI TEA NE EFESO 4 - Nguna Togoa Etafe North bible

PAKI TEA NE EFESO 4

¹Nalakena tea wanogoe kinau, tea soliana doko Nawota, a pasa parati ki mu naga kuga surata ega tapala waina e pataka ni nasosoana waina ku pei tea sosoana asa,

²ega vilake sara naveip̃op̃ovakitanoana go namatemateana, pilake naveimaritasokiparauana, doko do dum̃amu soki mu doko nadodomiana;

³doko do m̃arekareka naga kuga vavaigoro naveitea‐sikai‐maau‐ana ni Naatana doko natali ni natam̃ateana.

⁴Nap̃atoko sikai maau e doko, go Naatana sikai maau, dapala waina ku pei tea sosoana doko naleogoroana sikai maau ni nasoso‐mu‐ana;

⁵Nawota sikai maau, nasaralomauana sikai maau, nabapetisoana sikai maau,

⁶Sup̃e sikai maau go Tama ni tea maga mamau puti, waina e dap̃au tea maga mamau puti, po pakapule tea maga mamau puti, po doko tea maga mamau puti.

⁷Ma nasaup̃iana e pei tea vituakiana paki sara naata kakagida sikasikai pae totowo ni navituam̃olikiana ki Kristo.

⁸Nalakena tea wanogoe e naga, Ragi waina e sake paki tokora ni elagi, e piragiluapavakoto tea vuapavakotoana maga, Po dua naatam̃oli maga navituaana maga.

⁹(Ma tea wanogoe, E sake, e pei nasava ma naga e pea siwo paki tokora maga ni etano ni maramana?

¹⁰Tea waina e siwo nae e pei tea waina e sake pakilagi liu nakoroatelagi maga mamau puti, naga ega vakavuro naleo maga mamau puti).

¹¹Go nae e pitua ki te seara eu pei apostolo maga, go te seara eu pei profeta maga, go te seara eu pei tea rogorogo maga ni narogorogoana wia, go te seara eu pei tea leo paratiki maga go tea vasapiseiki maga;

¹²raki namarip̃ialuaana ni tea tautau maga, paki nawosiana ni nasuasuaana, paki natavagiana ni nap̃atoko ni Kristo:

¹³pa pa tuga mamau puti pa paratiki navei‐tea‐sikai‐maau‐ana ni nasaralomauana, go ni naataem̃atakiana ni Sup̃e Natuna, paki naveinaatam̃oli‐matua‐ana, paki totowo ni navarauana ni navakavuroana ki Kristo:

¹⁴naga tuga ta moro pei pipia maga mau, tea duletuleakiana dapala napeao maga go tea tapetapeana pasara ki sara nalagi ni navasapiseikiana, doko namarisoreana ki naatam̃oli maga, doko namarimanumatuaana, pae namidoakip̃aiana ni namidoakipeleana;

¹⁵ma tuga vei tea mari lomau doko nadodomiana, po do disu atum̃aki lavulavu paki nia nalo ni naleo maga mamau puti, waina e pei nap̃augida, Kristo;

¹⁶waina m̃elu asa nap̃atokona mamau tea tasokatakim̃atakiana go tea marisaisaikiana pae tea waina sara kolopu eu pitua ki nia, pae nawosiwosiana doko totowo ni sara tokora sikasikai kakana, e do mari narisu‐atum̃aki‐lavulavu‐ana ni nap̃atokona paki natum̃ana‐tavagi‐a‐ana doko nadodomiana.

¹⁷Nalakena tea wanogoe a noa tea waia, po noa sokisoki kasua ki nia doko Nawota, naga nimu kuga ta moro surata dapala waina tea ni nalauna p̃ota maga eu do surata, nap̃aloana ni namidodoana adeada,

¹⁸eu maligo nalo ni namidoakiataeana adeada, tea vanop̃ota maga paki namauriana ki Sup̃e nalakena nasalup̃eana waina e doko ara, nalakena nakasuaana ni nap̃op̃oda;

¹⁹waina eu pei mataku dika po dum̃ada pitua ki da paki namasausauana, naga euga wosiwosi ki sara naloaana pilake namatam̃aguraana.

²⁰Ma nimu ku da ataedogo Kristo dapala nogoe mau;

²¹ku pe rogo e lomau, po pei tea vasapiseikiana doko asa, dapala tea waina e pei nalomauana doko Yesu:

²²naga nimu nalo ni natomariana vea animu, kuga toropusi naatam̃oli tuai, waina e do meso pae namasauana sa maga ni nasurueana;

²³go naga kuga vei tea maripaukiana ki Naatana ni namidodoana animu,

²⁴po suni naatam̃oli vau, waina e pei tea tawonakiana pae Sup̃e doko namarinaleoleanaana go natautauana ni nalomauana.

²⁵Nalakena tea wanogoe, kuga toropusi nasorosoroana, go kuga vasa nalomauana, sara naata sikasikai paki tea ni m̃aladigi ki da: nalakena tu dum̃agida pei naleo kakagida maga.

²⁶Kuga maeto, po da mari naleo sa mau: elo ega ta musu goro namaritausuana animu mau:

²⁷go kuga ta pitua ki tokora paki diabolo mau.

²⁸Tea waina e panako ega ta moro panako mau: ma e p̃ia naga ega wosiwosi‐mawosa, doko do p̃osiwosi ki nam̃elearuna maga tea waina e p̃ia, naga ega veani naga ega vitua dua tea waina e dika.

²⁹Te navasaana sa sikai ega ta m̃elu nawokamu mau, ma tea waina e p̃ia raki natavagiana ni tea waina e dika, naga ega vitua ki nasaup̃iaana paki tea maga waina eu dogo.

³⁰Go kuga ta mari Naatana Tapu ni Sup̃e ega susue mau, waina ku pei tea vulusokiana asa raki naaleatia ni natauluaana.

³¹Sara nakokonaana, go sara namaritausuana, go sara namaetoana, go sara navasap̃araiana, go sara navasasakiana, euga vei tea toropusiana m̃elu dua ki mu pano, go sara navilosiana:

³²ma kuga vei tea vakale dum̃amu paki mu, tea vei maritadodomi, doko do dum̃amu manimu midoakikorokoro, ega takiusi waina Sup̃e doko Kristo e manimu midoakikorokoro.