Read Nguna Togoa Etafe North PAKI TEA NE EFESO 5 Bible Online

PAKI TEA NE EFESO 5 - Nguna Togoa Etafe North bible

PAKI TEA NE EFESO 5

¹Nalakena tea wanogoe kuga vei tea mari oli Sup̃e, ega tapala natuna dodomiana maga;

²go kuga surata nadodomiana, ega takiusi waina Kristo ma e dodomi mu, po manigida dum̃ana pitua ki nia oli gida, navituaana sikai go naviriana sikai paki Sup̃e naga ega vei nap̃o lolo sikai.

³Ma namaripeleana, go sara naloaana, kite namatam̃aguraana, ega ta pei tea noaana m̃aleoputo kakamu mau, ega takiusi waina e pataka ni tea tautau maga;

⁴go tea ni namaliereana, go navasaolilalaana, kite navasakalakalaana, waina e da patakamu mau: ma ega vei navasadodom̃atakiana.

⁵Nalakena ku atae m̃ata ki tea waia, naga te naata sikai waina e maripele, kite waina e da dautau mau, kite waina e matam̃agura, waina e pei tea lotu ki nasup̃e maga, e da peani te naveaniana sikai namarakiana ki Kristo go ki Sup̃e mau.

⁶Te naata sikai ega ta pilasurue mu ki navasaana p̃alo maga mau: nalakena tea maga wanogoe eu pei nalakena namaetoana ki Sup̃e e umai paki narogopiriana natuna maga.

⁷Nalakena tea wanogoe kuga ta pei tea veanip̃otae sikoti ra mau;

⁸nalakena sala vea ku pei namaligo, ma ragi waia ku pei namarama doko Nawota: kuga to surata dapala

⁹namarama natuna maga (nalakena nawa ni namarama e doko sara nawiaana go sara namarinaleoleanaana go sara nalomauana),

¹⁰doko do maridogo tea waina e pei tea midoakim̃atakiana ki Nawota;

¹¹go kuga ta mamau saisaipeani nawosiana oro maga ni namaligo mau, ma kuga vasa kasua ki da:

¹²nalakena naleo maga waina eu pei tea mariana pae ara dokoloku nanoa‐ra‐ana e pei tea malierekiana.

¹³Ma naleo maga mamau puti ragi waina eu pei tea vasakasuakiana eu pei tea mariana eu doko lina pae namarama: nalakena sara naleo waina eu pei tea mariana eu doko lina eu pei namarama.

¹⁴Nalakena tea wanogoe e naga, P̃a tarapa, tea maturu, go p̃a tuleana m̃elu dua ki tea mate maga, go Kristo ega wo maramalagati ko.

¹⁵Nalakena tea wanogoe kuga vunusi m̃ata ki nia dapala waina ku do surata, ega ta dapala tea manumatavusa maga mau, ma ega tapala tea manumatua maga;

¹⁶doko do daulua ragi, nalakena naaleatia maga eu sa.

¹⁷Nalakena tea wanogoe kuga ta pei tea midoaki sap̃o mau, ma kuga midoaki atae namasauana ki Nawota e pei nasava.

¹⁸Go kuga ta matamaloku ki waine mau, waina namaridarataraana e doko asa, ma kuga vei tea vakavuroana ki Naatana.

¹⁹Doko do dum̃amu pasa ki mu ki salamo maga go humno maga go nalegaana maga ki Naatana, doko do lega po do mari nalegaana nap̃op̃om̃u paki Nawota.

²⁰Doko do pasadodom̃ata ki Sup̃e, Tama, sara ragi nalakena naleo maga mamau puti doko nagisa ni Nawota anigida Yesu Kristo.

²¹Po do doko etano dum̃amu paki mu doko namatau ki‐Kristo‐ana.

²²Nagoroi maga, kuga toko etano paki naanoai animu maga, ega tapala waina e pe vaki Nawota.

²³Nalakena naanoai e pei nap̃au ni nagoroi, dapala waina Kristo e pei nap̃au ni ekalesia, go nae e pei tea mautipauri nap̃atokona.

²⁴Ma dapala waina ekalesia e doko etano paki Kristo, dapala nogoe nagoroi maga euga toko etano paki naanoai adeada maga nalo ni sara naleo.

²⁵Naanoai maga, kuga dodomi nagoroi animu maga, ega tapala waina Kristo e dodomi ekalesia, po maneana dum̃ana pitua ki nia;

²⁶naga ega tapugoro e, po mari a ega tautau ki nasarueana ni noai pae navasaana,

²⁷naga ega tum̃ana maneana mari ekalesia ega lawodu naraena ega vei tea samasamaniana, ega ta pilake te naloaana kite te nasakurukuruana kite te navatuna dapala nogoe mau; ma naga ega vei tea tautau go tea mamaau.

²⁸Dapala nogoe e one naanoai maga one naga euga dodomi nagoroi adeada maga ega tapala waina eu dum̃ada dodomi nap̃atokoda. Tea waina e dodomi anagoroi e dum̃ana dodomi a:

²⁹nalakena te naata e da pilosi nap̃okasina te ragi mau; ma e do pakale a po kulugoro e, dakiusi waina Kristo e do pakale ekalesia.

³⁰Nalakena tu pei naleo maga ni nap̃atokona.

³¹Nalakena tea wanogoe naatam̃oli sikai ega toropusi tamana go p̃ilana, go ega vuluti anagoroi; go nara dua eroga wo pei nap̃okasi sikai maau.

³²P̃aia wanogoe e p̃arua: ma kinau a noa e nalo ni Kristo go nalo ni ekalesia.

³³Ma nimu sara naata kakamu euga sikasikai dodomi nagoroi adeada ega tapala waina eu dum̃ada dodomi ra; go nagoroi naga ega matauki anawota.