Read Nguna Togoa Etafe North PAKI TEA NE EFESO 6 Bible Online

PAKI TEA NE EFESO 6 - Nguna Togoa Etafe North bible

PAKI TEA NE EFESO 6

¹Piakirikiri maga, kuga rogo parati ki nadaleo ni tea matua animu maga doko Nawota: nalakena tea wanogoe e leana.

²P̃a dodomadagani tamam̃a go p̃ilam̃a (tea wanogoe e pei natip̃akiana vea waina e pilake nasaiana),

³naga p̃a wia doko, go naga p̃a mauri doko parau doko maramana.

⁴Go tamada maga kuga ta mari natumu maga euga maeto mau: ma kuga vakalepisei ki da doko navasapiseikiana go natapavanauana ki Nawota.

⁵Tea suasua maga, kuga rogo parati ki nadaleo ni tea maga waina eu pei nawota animu nalo ni nap̃atokomu, ega vilake namatakuana go narururuana, doko nasikaimaauana ni nap̃op̃omu, ega tapala ku pe magi Kristo mari a;

⁶ega ta pae nasuasuaana ni namata mau, dapala tea mari namasauana ki naatam̃oli maga, ma kuga tapala tea suasua maga ki Kristo, doko do mari namasauana ki Sup̃e m̃elu naatamu;

⁷doko do rakaraka suasua, ega tapala ku pe magi Nawota suasua, po da magi naatam̃oli maga suasua mau:

⁸ku atae naga tea wia waina sara naata sikasikai eu pe mari a, tea wanogoe eu pe wo dape a ki Nawota, eu pe vei naviti maga kite eu pe vei tea tum̃ada doko.

⁹Go nawota maga kuga mari tea sikai maau maga wanogoe paki da, go kuga toropusi navasadip̃akotoviana: ku atae naga Nawota adeada ma animu e doko nakoroatelagi, go naviraginaraeana e da doko sikoti a mau.

¹⁰Tea edaku, kuga vei tea mariana kuga kasua doko Nawota, go doko namaridagaragaraana ni nakasuaana aneana.

¹¹Kuga suni pulum̃a ki nalikau maga ki Sup̃e, naga kuga mariatae lawodu dip̃a namidoakip̃aiana maga ki diabolo.

¹²Nalakena napauana anigida e da dip̃a nap̃okasi go nada mau, ma e dipa namarakiana maga, dip̃a naveinawotaana maga, dip̃a tea maraki maga ni namaligo ni maramana waia, dip̃a taua maga ni naatana sa maga tokora maga ni nakoroatelagi.

¹³Nalakena tea wanogoe kuga tape dakati pulum̃a ki nalikau maga ki Sup̃e, naga kuga mari atae lawodugoro naaleatia sa, go naga kuga mari sua tea maga mamau puti, po lawodu.

¹⁴Nalakena tea wanogoe kuga lawodu, doko dasoki sua namalomu ki nalomauana, po suni sua kororum̃a ni namarinaleoleanaana,

¹⁵po pasi sua nam̃elevasiana ni namarim̃atakiana ni narogorogoana wia ni natam̃ateana;

¹⁶doko dape dakati sua sokari tea maga mamau puti nakokoro ni nasaralomauana, waina kuga wo mari atae mari punue puti natip̃a waina eu soro ki tea sigisigileo asa.

¹⁷Go kuga tape kalup̃au ni vatu ni namautipauriana, go lova ki Naatana, waina e pei navasaana ki Sup̃e:

¹⁸doko do dapasavasa sara ragi pae sara natapasavasaana go sara navavaraniana doko Naatana, po do leleogoro paki asa doko sara nanoadalikiana go sara navavaraniana nalo ni tea tautau maga mamau puti,

¹⁹go maginau, naga navasaana ega vei tea vituakiana paki nau ragi waina aga vasa, naga aga viviari dogorogo ki p̃aia ni narogorogoana wia,

²⁰waina a maneana pei tea tautauana sikai doko namori ni vatu; naga aga viviari pasa asa, ega tapala waina e one au one naga aga vasa.

²¹Ma naga nimu kuga atae naleo aginau maga, dapala waina a doko, Tukiko, taigida dodomiana go tea suasua lomau doko Nawota, ega wo noakisai mu tea maga mamau puti:

²²waina a dip̃aki lua e paloti punusi mu nalakena tea waia, naga kuga atae naleo maga nalo kaka gami, go naga ega vasapakavakale nap̃op̃omu.

²³Natam̃ateana ega vei agi taigida maga, go nadodomiana pilake nasaralomauana, m̃elu Sup̃e Tamana go Nawota Yesu Kristo.

²⁴Nasaup̃iaana ega sikoti tea maga mamau puti waina eu dodomi Nawota anigida Yesu Kristo doko nalomauana.