Read Nguna Togoa Etafe North PAKI TEA NI KOLOSSE 4 Bible Online

PAKI TEA NI KOLOSSE 4 - Nguna Togoa Etafe North bible

PAKI TEA NI KOLOSSE 4

¹Kuga to dapasavasa pitip̃atip̃a, po do leleogoro doko asa ega vilake navasadodom̃atakiana.

²Go kuga to maginami ma dapasavasa,

³naga Sup̃e ega maginami p̃olagati namata sikai ni navasaana, naga aroga vasa p̃aia ni Kristo, waina e pei nalakena a pei tea soliana;

⁴naga aga mari a ega toko lina ega tapala waina e one au one naga aga vasa.

⁵Kuga surata pae namanumatuaana paki tea maga ni etaku, doko do daulua ragi.

⁶Navasaana animu ega vilake nasaup̃iaana sara ragi, ega vei tea mariana ega gagadi ki natasimena, naga kuga atae dapala waina e one mu one naga kuga vasadara sara naata sikasikai.

⁷Naleo aginau maga mamau puti Tukiko ega wo noa ki sai mu ara, waina e pei taigida dodomiana go minister lomau go tea suasua sikoti gami doko Nawota:

⁸waina a dip̃aki lua e paloti punusi mu nalakena tea waia, naga kuga atae naleo maga nalo kakagami, go naga ega vasapakavakale nap̃op̃omu; sikoti Onesimo,

⁹taigida lomau go dodomiana, waina e pei sikai kakamu. Eroga wo noa ki sai mu naleo maga mamau puti waina eu pei tea mariana tokora waia.

¹⁰Aristarko tea viragiluapavakotoana sikoti au e pasadodomi mu, go Marko, p̃elemata ni Barnaba (waina ku dape sua natip̃akiana maga nalo kakana; e pe valoti punusi mu, kuga viragi a),

¹¹go Yesu waina e pei tea sosoana ki Yusto, waina eu pei tea ni tea tovadaviviana maga: nara eu sikida pei tea wosiwosi sikoti au paki namarakiana ki Sup̃e, naatam̃oli maga waina eu pei navakavakaleana sikai paki nau.

¹²Epafra, waina e pei sikai kakamu, tea suasua sikai ki Kristo Yesu, e pasadodomi mu, doko do manimu pilele natapasavasaana aneana maga sara ragi, naga kuga lawodu tea wia lua go tea saralomau pakavuro doko sara namasauana ki Sup̃e.

¹³Nalakena a maneana noa sokisoki naga e manimu pei naawa p̃arua, go magi tea maga waina eu doko Laodikeia, go magi tea maga waina eu doko Hierapoli.

¹⁴Luka, tea maripauri dodomiana, go Dema ero pasa dodomi mu.

¹⁵Kuga vasa dodomi taigida maga waina eu doko Laodikeia, go Numfa, go ekalesia waina eu doko nasum̃a adeada.

¹⁶Go ragi waina epistole waia ega vei tea veveana sua m̃aleoputo kakamu, kuga mari naga ega moro pei tea veveana paki ekalesia ni tea ni Laodikeia maga go naga nimu ma kuga veve epistole waina e m̃elu Laodikeia.

¹⁷Go kuga noa ki Arkippo, kuga naga, P̃a leo paratiki nasuasuaana waina ku dape a doko Nawota, naga p̃a vakavuro e.

¹⁸Navasadodomiana aginau Paulo ki nam̃elearugu. Kuga midoa ki natali solisoli aginau maga. Nasaup̃iaana ega sikoti mu.