Read Nguna Togoa Etafe North 1 PAKI TEA NI THESSALONIKA 2 Bible Online

1 PAKI TEA NI THESSALONIKA 2 - Nguna Togoa Etafe North bible

1 PAKI TEA NI THESSALONIKA 2

¹Nalakena ku dum̃amu atae, tai maga, nasiliana aginami paloti punusi mu, naga e da pei tea p̃alo mau:

²ma ragi waina au pea sua narogokitesaana, po pei tea marisakiana Filippi, dakiusi waina ku atae a, au piviari doko Sup̃e anigida naga auga vasa paki mu narogorogoana wia ki Sup̃e doko namaripileleana warua.

³Nalakena navasaparatikiana aginami e da pei tea ni namidoakipeleana mau, go e da pei tea ni naloaana mau, go e da doko nasorosoroana mau:

⁴ma dakiusi waina au pei tea midoakip̃otaeana pae Sup̃e naga au p̃ia naga auga vei tea vavatuana ki narogorogoana wia, au do pasa dapala nogoe; e da dapala au do mari tea midoakim̃atakiana ki naatam̃oli maga mau, ma au do mari tea midoakim̃atakiana ki Sup̃e waina e maridogo nap̃op̃ogami.

⁵Nalakena au da noa navasaana ni nasorosorokiana te ragi mau, dakiusi waina ku atae a, go au da noa nakokorokiana ni namatam̃aguraana mau, Sup̃e e pei tea noa sokisoki;

⁶go au da laaga nasamasamaana waina e m̃elu naatam̃oli maga mau, au da laaga tea waina e pae mu mau, go au da laaga tea waina e pae tea p̃ota maga mau ragi waina au mari atae pei tea madaga dapala apostolo maga ki Kristo.

⁷Ma au pei tea matemate doko m̃aleoputo kakamu, dapala waina nagoroi vakale sikai e pakale natuna maga:

⁸dapala nogoe, nalakena au masau p̃arua ki mu, au midoaki m̃ata ki nia naga auga tua mu narogorogoana wia ki Sup̃e ega ta sikina mau, ma naatagami ma euga vilake a, nalakena ku pei tea dodomiana warua aginami.

⁹Nalakena tai maga, ku midoaki nawosimawosaana aginami go nawosipitinuana aginami: au do p̃osiwosi p̃ogi go aleati, naga auga ta pei tea madaga one te naata kakamu mau, po dogorogo paki mu ki narogorogoana wia ki Sup̃e.

¹⁰Nimu ku pei tea noa sokisoki, go Sup̃e, naga namariana aginami paki mu waina ku saralomau e dautau go e leana go e da pei tea vasadip̃aana mau:

¹¹dakiusi waina ku atae dapala waina au mari paki sara naata kakamu sikasikai, dapala waina tamana sikai e mari paki natuna maga, au do pasa paratiki mu, po do pasapakavakale mu, po do pasasokisoki paratiki,

¹²naga kuga surata ega tapala waina e pataka ni Sup̃e, waina e do soso mu paki namarakiana aneana go nasamasamaana aneana.

¹³Go nalakena tea wanogoe kinami ma au do pasadodom̃ata ki Sup̃e, au da makoto ki nia mau, nalakena, ragi waina ku dape navasaana ni narogoana m̃elu gami, navasaana ki Sup̃e, ku dape soki a waina e da pei navasaana ki naatam̃oli maga mau, ma, dakiusi waina e doko lomau, navasaana ki Sup̃e, go waina e do p̃osiwosi doko mu waina ku saralomau.

¹⁴Nalakena nimu, tai maga, ku pei tea mari oli ekalesia maga ki Sup̃e waina eu doko Yudea doko Kristo Yesu; nalakena nimu ma ku sua tea sikai maau maga pae tea ni navanua animu maga, dakiusi waina nara ma eu sua ra pae tea ni Yudea maga;

¹⁵waina eu mari punue Nawota Yesu go profeta maga, po kopalele gami au m̃elu pano, go eu da pei tea midoakim̃atakiana ki Sup̃e mau, go eu mari dip̃a naatam̃oli maga mamau puti;

¹⁶eu do dugoro gami naga auga ta pasa ki tea ni nalauna p̃ota maga mau naga euga vei tea mautipauriana; naga euga to pakavuro namarinaleosaana adeada maga sara ragi; ma namaetoana e po umai paki da pa pa paki namatap̃agona edaku.

¹⁷Ma kinami, tai maga, waina au pei tea mariana au puoli ki mu ragi kiki, nalo ni naraegami, e da pei nap̃op̃ogami mau, au mari m̃arekareka p̃arua liu pilake namasauana warua naga auga vunusi naraemu:

¹⁸nalakena tea wanogoe au masauna naga auga valoti punusi mu, kinau Paulo paka sikai go paka kerua; go Satan e dugoro gami.

¹⁹Nalakena naleogoroana aginami, kite nalaelaeaana aginami, kite vauvau ni navakavakaeana aginami e pei nasava? E da pei nimu ma kite, narae ni Nawota anigida Yesu ragi ni naumaiana aneana?

²⁰Nalakena nimu ku pei nasamasamaana aginami go nalealaeaana aginami.