Read Nguna Togoa Etafe North 1 PAKI TEA NI THESSALONIKA 4 Bible Online

1 PAKI TEA NI THESSALONIKA 4 - Nguna Togoa Etafe North bible

1 PAKI TEA NI THESSALONIKA 4

¹Nalakena tea wanogoe tea edaku waia tai maga, au pavarani mu po pasa paratiki mu doko Nawota Yesu, naga, dakiusi waina ku dape kiagami tea tapala waina e one mu one naga kuga surata po pei tea midoakim̃atakiana ki Sup̃e, dakiusi waina ku do surata, naga kuga to mari p̃arua ki liu sa.

²Nalakena ku atae natip̃akiana maga waina au dua mu ara pae Nawota Yesu.

³Nalakena tea waia e pei namasauana ki Sup̃e, namaridautau‐ki‐mu‐ana, waina nimu kuga tum̃amu mauti mu ki namaripeleana;

⁴naga sara naata kakamu sikasikai ega atae naga ega talua lasa aneana doko namaridautaukiana go nadodomadaganiana,

⁵ega ta doko narogoana ni namasausauana mau, dakiusi tea ni nalauna maga waina eu da atae Sup̃e mau;

⁶naga te naata sikai ega ta pakalau, po m̃aukarolua taina naleo wanogoe mau: nalakena Yehovah e pei tea sikosiko nalo ni naleo maga mamau puti wanogoe, dakiusi waina au pea noa ki mu asa po noa sokisoki kasua ki nia.

⁷Nalakena Sup̃e e da soso gida raki naloaana mau, ma e soso gida doko namaridautaukiana.

⁸Nalakena tea wanogoe tea waina e dip̃adoa, e da dip̃adoa naatam̃oli mau, ma e dip̃adoa Sup̃e, waina e pitua ki Naatana Tapu aneana paki mu.

⁹Ma nalo ni nadodomi‐taigidaana, ku da dapala waina e p̃ia naga te naata ega midiri paki mu asa mau: nalakena nimu ku pei tea vasapiseikiana pae Sup̃e naga kuga tum̃amu dodomi mu;

¹⁰go nalakena ku do mari a paki taigida maga mamau puti waina eu doko Masedonia mamau. Ma au pasa parati ki mu, tai maga, naga kuga to mari p̃arua ki liu sa;

¹¹go naga kuga masau nadodomadaganiana ni waina kuga tatam̃ate doko, po do mari nawosiana animu, po do p̃osiwosi ki nam̃elearumu maga, ega takiusi waina au dip̃a ki mu asa;

¹²naga kuga surata pae nkiana paki tea ni etaku maga, go naga kuga ta dika ki te navatuna mau.

¹³Ma au da masauna mau naga kuga vei sap̃o, tai maga, nalo ni tea maga waina eu maturu; naga kuga ta susue mau, dakiusi tea p̃ota maga, waina eu da peani naleogoroana mau.

¹⁴Nalakena tu pe saralomau naga Yesu e mate po moro duleana, dapala nogoe tea maga waina eu maturu pae Yesu Sup̃e ega wo piragi ra euga sikoti a umai.

¹⁵Nalakena au noa ki mu tea waia doko navasaana ki Nawota, naga nigida waina tu mauri, waina tu doko pa pa paki naumaiana ki Nawota, tuga wo da pea ki tea maga waina eu maturu mau.

¹⁶Nalakena Nawota ega wo dum̃ana siwo pae nakoroatelagi umai, pilake naviosoana sikai, pilake nadaleo ni agelo warua liu, go pilake paiga ki Sup̃e: go tea mate maga doko Kristo euga wo pea duleana:

¹⁷edaku ki nia nigida waina tu mauri, waina tu doko, tuga wo mamau pei tea tapeana sake sikoti ra doko napopouru maga, naga tuga sua Nawota namalopa: go dapala nogoe tuga wo doko sikoti Nawota sara ragi.

¹⁸Nalakena tea wanogoe kuga tum̃amu pasa pakavakale mu ki navasaana maga wanogoe.