Read Nguna Togoa Etafe North YOSHUA 1 Bible Online

YOSHUA 1 - Nguna Togoa Etafe North bible

YOSHUA 1

¹Go e pakilina edaku ki namateana ki Moses tea suasua ki Yehovah, naga Yehovah e noa ki Yoshua natu ni Nun, tasiga ki Moses, e naga, Moses tea suasua aginau e mate;

²go ragi waia p̃a tuleana, p̃a tuagoto Yordan waia, nimu ma narei mamau waia, paki navanua waina kinau a do pitua ki nia paki da, paki Israel natuna maga.

³Sara tokora waina nam̃ele ni natuamu ega wo pasi a, a pitua ki da paki mu, dapala waina a pasa paki Moses asa.

⁴Pae masop̃alo, go Lebanon waia, pa pa paki noaisara warua, noaisara Eufrates, navanua mamau ki naworawora ni Heth, go pa pa paki natasi warua paki elo musu, ega wo pei kokoi animu.

⁵Te naatam̃oli sikai ega wo da mariatae lawodu naraem̃a mau naaleatia mamau puti ni namauriana anigo: dapala waina a doko sikoti Moses, aga wo doko sikoti ko: aga wo da puoli ki‐go mau, go aga wo da doropusi ko mau.

⁶P̃a kasua, go p̃a viviari: nalakena nigo p̃a wo mari narei waia euga wo peani pioli ki navanua waina a pivisa paki tamada maga naga aga tua ra asa.

⁷Ma p̃a kasua go p̃a viviari p̃arua, naga p̃a vavaigoro naga a mari dapala nawotaeana maau, waina Moses tea suasua aginau e dip̃aki‐go asa: p̃a ta dawasi m̃elu dua ki nia paki taleva ni matua kite paki taleva ni mawiri mau, naga p̃a mari manumatua sara tokora waina p̃a wo paki asa.

⁸Tusi waia ni nawotaeana ega ta m̃elu dua ki nawokam̃a pano mau, ma p̃a tamaniginigi asa aleati go p̃ogi, naga p̃a vavaigoro naga p̃a mari dapala tea mamau puti waina e pei tea midiriana asa: nalakena ragi wanogoe p̃a wo mari napua anigo ega risu p̃ia, go ragi wanogoe p̃a wo mari manumatua.

⁹A po da dip̃aki‐go asa kite? P̃a kasua go p̃a viviari: p̃a ta mataku mau, go p̃a ta m̃anaunau mau: nalakena Yehovah Sup̃e anigo e sikoti ko nasurataana anigo mamau puti.

¹⁰Go Yoshua e dip̃aki tea maraki maga ni narei, e naga,

¹¹Kuga surata duaduru pasara m̃aleoputo ni tokora ni nam̃enakiana, go kuga tip̃aki narei, po naga, Kuga tum̃amu manimu mari m̃ata ki navinaga; nalakena m̃ogi dolu nimu kuga wo duagoto Yordan waia, naga kuga vano naga kuga veani navanua waina Yehovah Sup̃e animu e dua mu asa naga kuga veani a.

¹²Go Yoshua e noa ki naworawora ni Reuben, go ki naworawora ni Cad, go ki namagovai ni naworawora ni Manasseh,

¹³e naga, Kuga midoa ki navasaana waina Moses tea suasua ki Yehovah e dip̃aki mu asa, po naga, Yehovah Sup̃e animu e dua mu namaromaroana, go ega wo dua mu navanua waia.

¹⁴Nagoroi animu maga, piakirikiri animu maga, go katel animu maga, euga toko navanua waina Moses e dua mu asa taleva kerua ni Yordan; ma nimu kuga tuagoto pua nalikau maga pea ki taimu maga, naatam̃oli kasua mamau puti ni namarimatuaana, go kuga silae ra.

¹⁵Pa pa Yehovah ega wo dua taimu maga namaromaroana ega tapale waina e dua mu asa, go nara ma euga wo peani navanua waina Yehovah Sup̃e animu e dua ra asa: ragi wanogoe kuga wo liliu paki navanua veaniana animu, go kuga wo peani a, waina Moses tea suasua ki Yehovah e dua mu asa taleva kerua ni Yordan paki elo sake.

¹⁶Go eu pasadara Yoshua, po naga, Tea mamau puti waina ku po dip̃aki gami asa auga wo mari a, go te tokora waina ku pe wo dip̃aki lua gami paki asa, auga wo paki asa pano.

¹⁷Dapala waina au dogo parati ki Moses nalo ni naleo mamau puti, dapala nogoe auga wo do dogo parati ki‐go: ma Yehovah Sup̃e anigo ega toko sikoti ko, ega tapala waina e doko sikoti Moses.

¹⁸Sara naatam̃oli waina euga wo mari p̃auluulu paki natip̃akiana anigo, po da dogo parati ki navasaana anigo maga mau nalo ni naleo mamau puti waina p̃a wo dip̃aki da asa, euga vei tea maripunueana: ma p̃a kasua go p̃a viviari.