Read Nguna Togoa Etafe North YOSHUA 10 Bible Online

YOSHUA 10 - Nguna Togoa Etafe North bible

YOSHUA 10

¹Go e pakilina, ragi waina Adoni‐sedek nawota ni Yerusalem e dogo naga Yoshua e puati Ai, po mari sa sa ki nia; dapala waina e mari a paki Yeriko go paki nawota kakana, e mari dapala nogoe paki Ai go paki nawota kakana; go naga naka ni Cibeon eu mari natam̃ateana paki Israel, po doko m̃aleoputo kakada;

²Naga eu mataku p̃arua, nalakena Cibeon e pei natokoana warua, dapala natokoana maga sikai kakada ni namarakiana, go nalakena nae e p̃arua liu Ai, go naatam̃oli mamau puti kakana eu pei tea marimatua.

³Go Adoni‐sedek nawota ni Yerusalem e dip̃aki lua pa punusi Hoham nawota ni Hebron, go pa punusi Piram nawota ni Yarmuth, go pa punusi Yafia nawota ni Lakish, go pa punusi Debir nawota ni Eklon, e naga,

⁴Kuga sake umai punusi au, po silae au, go tuga atugi Cibeon: nalakena e po mari natam̃ateana paki Yoshua go paki Israel natuna maga.

⁵Go nawota lima ni naworawora ni Amor, nawota ni Yerusalem, nawota ni Hebron, nawota ni Yarmuth, nawota ni Lakish, nawota ni Eklon, eu dum̃ada saisai ki da, po sake pano, nara go taua mamau puti adeada, po m̃enakigoro Cibeon, po mari navakalo paki asa.

⁶Go naatam̃oli maga ni Cibeon eu dip̃aki lua pa punusi Yoshua paki tokora ni nam̃enakiana paki Cilcal, eu naga, P̃a ta doro nam̃elearum̃a m̃elu dua ki tea suasua anigo maga mau; p̃a sake umai punusi gami m̃araverave, go p̃a mauti gami, po silae gami: nalakena nawota mamau puti ni naworawora ni Amor waina eu doko navanua ni tava doko eu pei tea saisaikiana dip̃a gami.

⁷Go Yoshua e sake m̃elu dua ki Cilcal pano, nae go narei mamau ni navakalo eu sikoti a, go naatam̃oli kasua mamau puti ni namarimatuaana.

⁸Go Yehovah e noa ki Yoshua, e naga, P̃a ta matau ki da mau: nalakena a po pitua ki da paki nam̃elearum̃a; naatam̃oli sikai kakada ega wo da lawodu naraem̃a mau.

⁹Go Yoshua e umai pakilina ki da m̃araverave; e m̃elu dua ki Cilcal sake pano nap̃ogiana mamau.

¹⁰Go Yehovah e mari matua ki da narae ni Israel, go e atugi ra naatugiana warua sikai pisari Cibeon, po kopasi ra pae napua ni tokora ni nasakesakeana ni Beth‐horon, po atugi ra pa pa paki Asekah, go pa pa paki Makeda.

¹¹Go e pakilina, ragi waina nara eu do sava pa dua ki narae ni Israel, ragi waina eu doko tokora ni nasiwosiwoana ni Beth‐horon, naga Yehovah e nadi ki vatu warua maga paki da m̃elu dua ki nakoroatelagi pa pa paki Asekah, go eu mate: tea maga waina eu mate ki vatu maga ni usa eu laapa liu tea maga waina Israel natuna maga eu mari punue ra ki lova.

¹²Ragi wanogoe Yoshua e pasa ki Yehovah naaleatia waina Yehovah e pitua ki naworawora ni Amor narae ni Israel natuna maga: go e noa namata maga ni Israel, e naga, Elo, p̃a tu dorogo elagi ki Cibeon; Go atelagi, elagi ki nap̃aloa ni Aiyalon.

¹³Go elo e du dorogo, go atelagi e lawodu, Pa pa nalauna eu siko sua tea kokona ki da maga. Tea wanogoe e da pei tea midiriana tusi ki Yashar, kite? Go elo e lawodu m̃aleoputo ni nakoroatelagi, po da mari m̃araverave naga ega musu mau, dapala naaleatia mamau sikai.

¹⁴Go naaleatia sikai dakiusi naaleatia wanogoe e da doko mau pea ki nia kite edaku ki nia, ragi waina Yehovah e dogo parati ki nadaleo ni naatam̃oli sikai: nalakena Yehovah e magi Israel marimari.

¹⁵Go Yoshua e liliu, go Israel mamau puti eu sikoti a, paki tokora ni nam̃enakiana paki Cilcal.

¹⁶Go nawota lima wanogoe eu sava pano, po dum̃ada dasuru ki da valea ni Makeda.

¹⁷Go e pei tea noasaiana paki Yoshua, eu naga, Nawota lima eu pei tea vap̃aiana, eu pei tea tasurukiana valea ni Makeda.

¹⁸Go Yoshua e naga, Kuga malulua ki vatu warua maga paki nawoka ni valea, go kuga lawo ki naatam̃oli seara pisari a naga euga vavaigoro ra:

¹⁹Ma nimu kuga ta du dorogo mau; kuga sava dausi tea kokona ki mu maga, po daelua tea edaku kakada; kuga ta suasua ki da naga euga sili paki natokoana adeada maga mau: nalakena Yehovah Sup̃e animu e po pitua ki da paki nam̃elearumu.

²⁰Go e pakilina, ragi waina Yoshua go Israel natuna maga eu mari sua naatugi‐ra‐ana ki naatugiana warua liu, pa pa eu nopu, go tea kakada maga waina eu sava pano eu sili sua natokoana ni p̃aaka maga,

²¹Naga narei mamau eu liliu paki tokora ni nam̃enakiana punusi Yoshua paki Makeda eu mauri doko po p̃ia doko: te naata sikai e da sike namenana dip̃a Israel natuna maga sikai kakada mau.

²²Go Yoshua e naga, Kuga wolagati nawoka ni valea, po piragi dave umai punusi au nawota lima wanogoe euga m̃elu dua ki valea.

²³Go eu mari dapala nogoe, po piragi dave umai punusi a nawota lima wanogoe m̃elu dua ki valea, nawota ni Yerusalem, nawota ni Hebron, nawota ni Yarmuth, nawota ni Lakish, nawota ni Eklon.

²⁴Go e pakilina, ragi waina eu piragi dave nawota lima wanogoe umai punusi Yoshua, naga Yoshua e soso naatam̃oli mamau puti ni Israel, po noa ki tea maraki maga ki naatam̃oli maga ni navakalo waina eu pano sikoti a, e naga, Kuga umai paki m̃aladigi, kuga toropusi nam̃elemu maga paki nanoa maga ni nawota maga waia. Go eu rumai paki m̃aladigi, po doropusi nam̃eleda maga paki nanoada maga.

²⁵Go Yoshua e noa ki da, e naga, Kuga ta mataku mau, go kuga ta m̃anaunau mau; kuga kasua go kuga viviari: nalakena Yehovah ega wo mari dapala waia paki tea kokona ki mu mamau puti waina nimu ku mari navakalo paki da.

²⁶Go edaku ki tea wanogoe Yoshua e atugi ra, po mari punue ra, po sara ki da eu dau nakau lima: go eu dau nakau maga wanogoe dau pa pa paki ragi melu.

²⁷Go e pakilina ragi ni namusuana ni elo, naga Yoshua e pitip̃aki, go eu dape ra siwo m̃elu dua ki nakau maga, po nadi ki da paki ekopu ni valea waina eu dum̃ada dasuru ki da asa, go eu doropusi vatu warua maga namata ni valea, waina eu doko pa pa paki naaleatia ni nasoso waia.

²⁸Go Yoshua e puati Makeda naaleatia wanogoe, po atugi a ki nawoka ni lova, go nawota kakana; e mari punuvunue ra go naatam̃oli mamau puti waina eu doko asa, e da doropasi tea sikai waina e mauri doko au: go e mari paki nawota ni Makeda dapala waina e mari a paki nawota ni Yeriko.

²⁹Go Yoshua e pano m̃elu dua ki Makeda, go Israel mamau puti eu sikoti a, paki Libnah, po mari navakalo paki Libnah:

³⁰Go Yehovah e pitua ki nia nae ma, go nawota kakana, paki nam̃elearu ni Israel; go e atugi a ki nawoka ni lova, go naatam̃oli mamau puti waina eu doko asa; e da doropusi doko asa tea sikai waina e mauri doko mau; go e mari paki nawota kakana dapala waina e mari a paki nawota ni Yeriko.

³¹Go Yoshua e pano m̃elu dua ki Libnah, go Israel mamau puti eu sikoti a, paki Lakish, po m̃enakigoro e, po mari navakalo paki asa:

³²Go Yehovah e pitua ki Lakish paki nam̃elearu ni Israel, go e puati a naaleatia kerua, po atugi a ki nawoka ni lova, go naatam̃oli mamau puti waina eu doko asa, dapala tea mamau puti waina e mari a paki Libnah.

³³Ragi wanogoe Horam nawota ni Ceser e sake umai naga ega silae Lakish; go Yoshua e atugi a go narei aneana, pa pa e da maneana doropusi tea sikai waina e mauri doko mau.

³⁴Go Yoshua e pano m̃elu dua ki Lakish, go Israel mamau puti eu sikoti a, paki Eklon; go eu m̃enakigoro e, po mari navakalo paki asa;

³⁵Go eu puati a naaleatia wanogoe, po atugi a ki nawoka ni lova, go naatam̃oli mamau puti waina eu doko asa, e mari punuvunue ra naaleatia wanogoe, dapala tea mamau puti waina e mari a paki Lakish.

³⁶Go Yoshua e sake m̃elu dua ki Eklon, go Israel mamau puti eu sikoti a, paki Hebron; go eu mari navakalo paki asa:

³⁷Go eu puati a, po atugi a ki nawoka ni lova, go nawota kakana, go natokoana mamau puti kakana, go naatam̃oli mamau puti waina eu doko asa; e da doropusi tea sikai waina e mauri doko mau, dapala tea mamau puti waina e mari a paki Eklon: go e mari sa sa ki nia, go naatam̃oli mamau puti waina eu doko asa.

³⁸Go Yoshua e liliu, go Israel mamau puti eu sikoti a, paki Debir; po mari navakalo paki asa:

³⁹Go e puati a, go nawota kakana, go natokoana mamau puti kakana; go eu atugi ra ki nawoka ni lova, po mari punuvunue naatam̃oli mamau puti waina eu doko asa: e da doropusi tea sikai waina e mauri doko mau: dapala waina e mari a paki Hebron, e mari dapala nogoe paki Debir, go paki nawota kakana; go dapala waina e mari a paki Libnah, go paki nawota kakana.

⁴⁰Go Yoshua e atugi navanua mamau, tea ni tava, go tea ni Sauth, go tea ni etano, go tea ni nap̃aloa maga, go nawota mamau puti adeada; e da doropusi tea sikai waina e mauri doko mau: ma e mari punuvunue tea mamau puti waina eu maromaro, dapala waina Yehovah, Sup̃e ki Israel, e pitip̃aki asa.

⁴¹Go Yoshua e atugi ra pae Kadesh‐barnea pa pa paki Casa, go navanua mamau puti ni Coshen, pa pa paki Cibeon.

⁴²Go nawota mamau puti wanogoe go navanua adeada Yoshua e puati ra ragi sikai maau, nalakena Yehovah, Sup̃e ki Israel, e magi Israel marimari.

⁴³Go Yoshua e liliu, go Israel mamau puti eu sikoti a, paki tokora ni nam̃enakiana paki Cilcal.