Read Nguna Togoa Etafe North YOSHUA 11 Bible Online

YOSHUA 11 - Nguna Togoa Etafe North bible

YOSHUA 11

¹Go e pakilina, ragi waina Yabin nawota ni Hasor e dogo e, naga e dip̃aki lua pa punusi Yobab nawota ni Madon, go pa punusi nawota ni Shimron, go pa punusi nawota ni Aksaf,

²Go pa punusi nawota maga waina eu doko taleva ni north, navanua ni tava, go Arabah sauth ni Kinneroth, go navanua ni etano, go tava sula maga ni Dor taleva ni elo musu,

³Pa punusi naworawora ni Kanaan taleva ni elo sake go taleva ni elo musu, go naworawora ni Amor, go naworawora ni Heth, go naworawora ni Peris, go naworawora ni Yebus navanua ni tava, go naworawora ni Hivah waina eu doko etano ni Hermon navanua ni Mispah.

⁴Go eu dave pano, nara go taua adeada mamau puti eu sikoti ra, narei laapa, dapala naworaone waina e one nagole ni natasi nalo ni nalaapaana, go horse maga go kariot maga eu laapa sa.

⁵Go nawota mamau puti wanogoe eu saisai; go eu rumai po saisai m̃enaki pisari noai maga ni Merom, naga euga mari navakalo paki Israel.

⁶Go Yehovah e noa ki Yoshua, e naga, P̃a ta mataku pa dua ki naraeda mau: nalakena matamai dapala ragi waia kinau aga wo pitua ki da mamau puti euga wo pei tea vuri‐punueana narae ni Israel: p̃a takotovi nawaliu ni nakolovae ni horse adeada maga, go p̃a tap̃ara ki kariot adeada maga ki nakapu.

⁷Go Yoshua e umai, go narei mamau ni navakalo eu sikoti a, eu pakilina ki da pisari noai maga ni Merom m̃araverave, po dowo paki da.

⁸Go Yehovah e pitua ki da paki nam̃elearu ni Israel, go eu atugi ra, po kopasi ra pa pa paki Sidon warua, go pa pa paki Misrefot‐maim, go pa pa paki nap̃aloa ni Mispeh paki taleva ni elo sake; go eu atugi ra, pa pa eu da madeada doropusi tea sikai waina e mauri doko mau.

⁹Go Yoshua e mari paki da dapala waina Yehovah e noa ki nia asa: e dakotovi nawaliu ni nakolovae ni horse adeada maga, po dap̃ara ki kariot adeada maga ki nakapu.

¹⁰Go Yoshua e liliu ragi wanogoe, po puati Hasor, po atugi nawota kakana ki lova: nalakena Hasor nae e pei nap̃au ni namarakiana mamau puti wanogoe sala vea.

¹¹Go eu atugi naatam̃oli mamau puti waina eu doko asa ki nawoka ni lova, eu mari punuvunue ra: tea sikai waina e maromaro e da pei tea toropusiana mau: go e dap̃ara ki Hasor ki nakapu.

¹²Go natokoana mamau puti ki nawota maga wanogoe, go nawota mamau puti kakada, Yoshua e puati ra, go e atugi ra ki nawoka ni lova, po mari punuvunue ra; dapala waina Moses tea suasua ki Yehovah e pitip̃aki asa.

¹³Ma nalo ni natokoana maga waina eu lawodu tava sula kakada maga, Israel e da dap̃ara ki sikai kakada mau, masale ki Hasor sikina, waina Yoshua e dap̃ara ki nia.

¹⁴Go sara naleo vuti‐luapavakotoana ni natokoana maga wanogoe, go katel maga, Israel natuna maga eu dum̃ada madeada dape pavakoto ara: ma eu atugi naatam̃oli mamau puti ki nawoka ni lova, pa pa eu mari sa sa ki da, eu da doropusi tea sikai waina e maromaro mau.

¹⁵Dapala waina Yehovah e dip̃aki tea suasua aneana Moses, dapala nogoe Moses e dip̃aki Yoshua asa: go dapala nogoe Yoshua e mari a. E da dape lua te navatuna ni tea mamau puti waina Yehovah e dip̃aki Moses asa mau.

¹⁶Go Yoshua e dape navanua mamau wanogoe, tea ni tava, go tea mamau ni Sauth, go navanua mamau ni Coshen, go tea ni etano, go Arabah, go navanua ni tava ki Israel, go ni etano kakana;

¹⁷Pae tava Halak, waina e sake paki Seir, pa pa paki Baal‐kad waina e doko nap̃aloa ni Lebanon etano ni tava Hermon: go e puati nawota adeada mamau puti, po atugi ra, po mari punue ra.

¹⁸Yoshua e mari navakalo naaleatia laapa paki nawota mamau puti wanogoe.

¹⁹Natokoana sikai e da doko mau waina e mari natam̃ateana paki Israel natuna maga, ma naworawora ni Hivah eu masikida waina eu doko Cibeon: eu dape puti ra pae navakalo.

²⁰Nalakena e pei tea ni Yehovah naga ega mari nap̃op̃oda ega kasua, naga euga vaki navakalo dip̃a Israel, naga ega mari punuvunue ra, naga euga ta dape nasaup̃iaana mau, ma naga ega mari sa sa ki da, dapala waina Yehovah e dip̃aki Moses asa.

²¹Go Yoshua e umai ragi wanogoe po daelua Anakim maga m̃elu dua ki navanua ni tava, m̃elu dua ki Hebron, m̃elu dua ki Debir, m̃elu dua ki Anab, go m̃elu dua ki navanua ni tava mamau ki Yudah, go m̃elu dua ki navanua ni tava mamau ki Israel: Yoshua e mari punuvunue ra po mari sa sa ki natokoana adeada maga.

²²Tea sikai ni Anakim maga e da pei tea toropusiana doko navanua ki Israel natuna maga mau ma seara eu pei tea toropusiana doko Casa, doko Cath, go doko Ashdod sikida.

²³Go Yoshua e dape navanua mamau, dapala tea mamau puti waina Yehovah e pasa paki Moses asa, go Yoshua e pitua ki nia naga ega vei tea veani‐pioli‐kiana sikai agi Israel dapala natap̃otawotaeana kakada maga pae naworaworada maga. Go navanua e dam̃ate doko m̃elu dua ki navakalo.