Read Nguna Togoa Etafe North YOSHUA 13 Bible Online

YOSHUA 13 - Nguna Togoa Etafe North bible

YOSHUA 13

¹Go Yoshua e pei tea matua tea ni natau laapa, go Yehovah e noa ki nia, e naga, Nigo ku pei tea matua ku pei tea ni natau laapa; go navanua waina e ko doko waina kuga veani a e p̃arua sa.

²Navanua waina e ko doko e pei tea waia: navanua mamau puti ki Filistine maga, go naworawora ni Ceshur mamau puti;

³Pae Shihor waina e doko narae ni Ityipt, go pa pa paki kokoi ni Ekron paki north, waina e pei tea midoakiana naga e pei agi naworawora ni Kanaan; nawota lima ki Filistine maga; naka ni Casa, go naka ni Ashdod, go naka ni Ashkelon, naka ni Cath, go naka ni Ekron; go Avvim maga, taleva ni sauth:

⁴Navanua mamau ki naworawora ni Kanaan, go Mearah waina e pei agi naka ni Sidon, pa pa paki Afek, pa pa paki kokoi ki naworawora ni Amor:

⁵Go navanua ki naka ni Kebal, go Lebanon mamau, paki taleva ni elo sake, pae Baal‐kad etano ni tava Hermon pa pa paki tokora ni nasiliana ni Hamath:

⁶Tea mamau puti waina eu doko navanua ni tava pae Lebanon pa pa paki Misrefot‐maim, naka ni Sidon mamau puti; kinau aga wo kopasi lua ra pa dua ki narae ni Israel natuna maga: ma p̃a magi Israel mari a ega rowo pae gole naga ega vei tea veani‐pioli‐kiana sikai, ega tapala waina a dip̃aki‐go asa.

⁷Go ragi waia p̃a tap̃otawotae navanua waia naga ega vei tea veani‐pioli‐kiana sikai agi naworawora loveti, go agi namagovai ni naworawora ni Manasseh.

⁸Waina naworawora ni Reuben go naworawora ni Cad eu dape sua tea veani‐pioli‐kiana adeada sikoti a, waina Moses e dua ra asa, taleva kerua ni Yordan paki elo sake, dapala waina Moses tea suasua ki Yehovah e dua ra asa;

⁹Pae Aroer, waina e doko nadigi ni nap̃aloa ni Arnon, go natokoana waina e doko m̃aleoputo ni nap̃aloa, go malo matemate mamau ni Medeba pa pa paki Dibon;

¹⁰Go natokoana mamau puti ki Sihon, nawota ki naworawora ni Amor, waina e maramara doko Heshbon, pa pa paki kokoi ki Ammon natuna maga;

¹¹Go Cilead, go kokoi ki naworawora ni Ceshur go ki naworawora ni Maakah, go tava Hermon mamau, go Bashan mamau pa pa paki Salekah;

¹²Namarakiana mamau ki Ok ni Bashan, waina e maramara doko Ashtaroth go Edrei (nae e pei tea toropusiana ni namagovai ni Refaim maga waina eu ko doko;) nalakena Moses e atugi ra po kopasi lua ra.

¹³Ma Israel natuna maga eu da kopasi lua naworawora ni Ceshur, go naworawora ni Maakah mau: ma Ceshur go Maakah ero doko m̃aleoputo ni Israel pa pa paki naaleatia waia.

¹⁴Ma e da dua naworawora ni Levi tea veani‐pioli‐kiana sikai mau; naviriana maga ki Yehovah, Sup̃e ki Israel, waina eu pei tea mariana pae nakapu, eu pei tea veani‐pioli‐kiana adeada, dapala waina e pasa ki da asa.

¹⁵Go Moses e pitua paki naworawora ni Reuben natuna maga pae naworada maga.

¹⁶Go kokoi adeada e pae Aroer, waina e doko nadigi ni nap̃aloa ni Arnon, go natokoana waina e doko m̃aleoputo ni nap̃aloa, go malo matemate mamau waina e pisari Medeba;

¹⁷Heshbon go natokoana kakana mamau puti waina eu doko malo matemate; Dibon, go Bamot‐baal, go Beth‐baal‐meon;

¹⁸Go Yahas, go Kedemoth, go Mefaath; Go Kiriathaim,

¹⁹go Sibmah, go Seret‐shahar waina e doko tava ni nap̃aloa;

²⁰Go Beth‐peor, go tokora maga ni nasiwosiwoana ni Piskah, go Beth‐yeshimoth;

²¹Go natokoana mamau puti ni malo matemate, go namarakiana mamau ki Sihon, nawota ki naworawora ni Amor, waina e maramara doko Heshbon, waina Moses e atugi a, go nawota maga ni Midian, Evi, go Rekem, go Sur, go Hur, go Reba, tea maraki maga ki Sihon, waina eu doko navanua.

²²Go Balaam natu ni Beor, tea vasapua, Israel natuna maga eu mari punue a ki lova m̃aleoputo ni tea maripunueana adeada maga.

²³Go Yordan go kokoi kakana ero pei kokoi ki Reuben natuna maga. Tea wanogoe e pei tea veani‐pioli‐kiana ki Reuben natuna maga pae naworada maga, natokoana maga go natokoana kiki kakada maga.

²⁴Go Moses e pitua paki naworawora ni Cad, paki Cad natuna maga, pae naworada maga.

²⁵Go Yaser e pei kokoi adeada, go natokoana mamau puti ni Cilead, go namagovai ni navanua ki Ammon natuna maga, pa pa paki Aroer waina e doko narae ni Rabbah;

²⁶Go pae Heshbon pa pa paki Ramat‐mispeh, go Betonim; go pae Mahanaim pa pa paki kokoi ni Debir;

²⁷Go tea ni nap̃aloa, Beth‐haram, go Beth‐nimrah, go Sukkoth, go Safon, namagovai waina e ko doko ni namarakiana ki Sihon nawota ni Heshbon, Yordan go kokoi kakana, pa pa paki namatap̃ago ni uvea ni natasi ni Kinnereth, taleva kerua ni Yordan paki elo sake.

²⁸Tea wanogoe e pei tea veani‐pioli‐kiana ki Cad natuna maga pae naworada maga, natokoana maga go natokoana kiki adeada maga.

²⁹Go Moses e pitua ki tea veani‐pioli‐kiana paki namagovai ni naworawora ni Manasseh: go e pei agi namagovai ni naworawora ni Manasseh natuna maga pae naworada maga.

³⁰Go kokoi adeada e pae Mahanaim, Bashan mamau, namarakiana mamau ki Ok nawota ni Bashan, go natokoana mamau puti ki Yair, waina eu doko Bashan, natokoana rualima latesa:

³¹Go namagovai ni Cilead, go Ashtaroth, go Edrei, natokoana maga ni namarakiana ki Ok ni Bashan, eu pei agi Makir natuna maga Manasseh natuna, agi namagovai ni Makir natuna maga pae naworada maga.

³²Tea maga wanogoe eu pei tea veani‐pioli‐kiana maga waina Moses e dap̃otawotae ra malo matemate maga ki Moab, taleva kerua ni Yordan pisari Yeriko, paki elo sake.

³³Ma paki naworawora ni Levi, Moses e da pitua ki tea veani‐pioli‐kiana sikai mau: Yehovah, Sup̃e ki Israel, nae e pei tea veani‐pioli‐kiana adeada, dapala waina e pasa ki da asa.