Read Nguna Togoa Etafe North YOSHUA 14 Bible Online

YOSHUA 14 - Nguna Togoa Etafe North bible

YOSHUA 14

¹Go tea maga waia eu pei tea veani‐pioli‐kiana maga waina Israel natuna maga eu dape ra navanua ni Kanaan, waina Eleasar tea viri, go Yoshua natu ni Nun, go nap̃au ni tea matua maga ni naworawora maga ni Israel natuna maga, eu madeada dap̃otawotae ra,

²Pae gole ni tea veani‐pioli‐kiana adeada, dapala waina Yehovah e pitip̃aki asa pae nam̃elearu ni Moses, agi naworawora loveti, go agi namagovai ni naworawora sikai.

³Nalakena Moses e pitua ki sua tea veani‐pioli‐kiana ki naworawora dua go ki namagovai ni naworawora sikai taleva kerua ni Yordan: ma paki naworawora ni Levi e da pitua ki tea veani‐pioli‐kiana sikai m̃aleoputo kakada mau.

⁴Nalakena Yosef natuna maga eu pei naworawora dua, Manasseh go Efraim: go eu da pitua ki te matele sikai paki naworawora ni Levi doko navanua mau, ma natokoana maga sikai maau naga euga toko ara, go napega kakada maga agi katel adeada maga go agi tea veaniana adeada maga.

⁵Dapala waina Yehovah e dip̃aki Moses asa, Israel natuna maga eu mari dapala nogoe, go eu dap̃otawotae navanua.

⁶Go Yudah natuna maga eu rumai paki m̃aladigi ki Yoshua Cilcal: go Kaleb natu ni Yefuneh nawora ni Kenes e noa ki nia, e naga, Nigo ku atae naleo waina Yehovah e pasa ki Moses asa naatam̃oli ki Sup̃e nalo kakagu go nalo kakam̃a, ragi waina toro doko Kadesh‐barnea.

⁷Kinau a pei tea ni natau rualima pati ragi waina Moses tea suasua ki Yehovah e dip̃aki lua au m̃elu dua ki Kadesh‐barnea naga aga leo pavaraka navanua; go a maneana dape navasaana liliu umai dapala waina e doko nap̃op̃ogu.

⁸Ma taigu maga waina eu sake pano sikoti au eu mari nap̃op̃o ni narei e sara: ma kinau a pakavuro dausi Yehovah Sup̃e aginau.

⁹Go Moses e pivisa naaleatia wanogoe, po naga, Lomau navanua waina nam̃elem̃a e pasi a ega vei tea veani‐pioli‐kiana anigo go agi natum̃a maga pa pa ega tu du po du mau du, nalakena ku pakavuro dausi Yehovah Sup̃e aginau.

¹⁰Go ragi waia, p̃a leo, Yehovah e mari au a mauri doko, dapala waina e pasa asa, natau rualima pati tamate lima waia, pae ragi waina Yehovah e pasa navasaana wanogoe paki Moses pa pa, ragi waina Israel e surata masop̃alo; go ragi waia, p̃a leo, kinau a pei tea ni natau rualima latolu tamate lima naaleatia waia.

¹¹A ko kasua naaleatia waia dapala waina a doko naaleatia waina Moses e dip̃aki lua au asa: dapala waina nakasuaana aginau e doko ragi wanogoe, nakasuaana aginau e dapala nogoe doko ragi waia, nalo ni navakalo, go naga aga tave pano go aga liliu umai.

¹²Nalakena tea wanogoe p̃a tua au tava waia, waina Yehovah e pasa asa naaleatia wanogoe; nalakena nigo ku dogo e naaleatia wanogoe naga Anakim maga eu doko asa, go natokoana warua maga waina eu pei p̃aaka maga: mase Yehovah ega wo sikoti au, go aga wo kopasi lua ra, dapala waina Yehovah e pasa asa.

¹³Go Yoshua e pasap̃ia ki nia; go e pitua ki Hebron paki Kaleb natu ni Yefuneh naga ega vei tea veani‐pioli‐kiana sikai.

¹⁴Nalakena tea wanogoe Hebron e pei tea veani‐pioli‐kiana ki Kaleb natu ni Yefuneh nawora ni Kenes, pa pa paki naaleatia waia; nalakena e pakavuro dausi Yehovah, Sup̃e ki Israel.

¹⁵Go nagisa ni Hebron sala vea e pei Kiriath‐arba; Arba wanogoe e pei naatam̃oli warua liu m̃aleoputo ni Anakim maga. Go navanua e dam̃ate doko m̃elu dua ki navakalo.