Read Nguna Togoa Etafe North YOSHUA 15 Bible Online

YOSHUA 15 - Nguna Togoa Etafe North bible

YOSHUA 15

¹Go gole agi naworawora ni Yudah natuna maga pae naworada maga e doko paki kokoi ki Edom, paki masop̃alo ni Sin paki sauth, pisari namatap̃ago ni uvea ni sauth.

²Go kokoi ni sauth adeada e doko pae namatap̃ago ni uvea ni Natasi ni Natasimena, pae nap̃olulua waina e leo paki sauth:

³Go e dave pano paki sauth ni tokora ni nasakesakeana ni Akrabbim, po pano paki Sin, po sake pano pae sauth ni Kadesh‐barnea, po pano pae Hesron, po sake paki Addar, po maradoa paki Karka;

⁴Go e pano paki Asmon, po liliu noaisara ni Ityipt; go tokora waina kokoi e liliu asa e dip̃a natasi: tea wanogoe ega vei kokoi ni sauth animu.

⁵Go kokoi ni taleva ni elo sake e pei Natasi ni Natasimena pa pa paki namatap̃ago ni Yordan. Go kokoi ni taleva ni north e pae nap̃olulua ni natasi pisari namatap̃ago ni Yordan:

⁶Go kokoi e sake paki Beth‐hoklah, po pano pae north ni Beth‐arabah; go kokoi e sake paki vatu ni Bohan natu ni Reuben:

⁷Go kokoi e pae nap̃aloa ni Akor po sake paki Debir, go e paki north, e do leo paki Cilcal, waina e doko kivea ki tokora ni nasakesakeana ni Adummim, waina e doko taleva ni sauth ni noaisara: go kokoi e pano paki noai maga ni En‐shemesh, go tokora waina e liliu asa e dip̃a En‐rokel:

⁸Go kokoi e sake pae nap̃aloa ni natu ni Hinnom paki taleva ni naworawora ni Yebus paki sauth (nae e pei Yerusalem:) go kokoi e sake paki nap̃au ni tava waina e one narae ni nap̃aloa ni Hinnom paki elo musu, waina e pisari namatap̃ago ni uvea ni nap̃aloa ni Refaim maga paki north:

⁹Go kokoi e pei tea midiri‐dawona‐kiana pae nap̃au ni tava wanogoe paki namata noai ni noai maga ni Neftoah, po dave pano paki natokoana maga ni tava Efron; go kokoi e pei tea midiri‐dawona‐kiana paki Baalah (nae e pei Kiriath‐yearim:)

¹⁰Go kokoi e maradoa pae Baalah paki elo musu, paki tava Seir, po pano paki taleva ni tava Yearim paki north (nae e pei Kesalon), po siwo paki Beth‐shemesh, po pano paki Timnah:

¹¹Go kokoi e dave pano paki taleva ni Ekron paki north: go kokoi e pei tea midiri‐dawona‐kiana paki Sikeron, po pano paki tava Baalah, po liliu Yabneel; go tokora waina kokoi e liliu asa e dip̃a natasi.

¹²Go kokoi ni elo musu e paki natasi warua, go kokoi kakana. Tea wanogoe e pei kokoi ki Yudah natuna maga daliviri pae naworada maga.

¹³Go paki Kaleb natu ni Yefuneh e pitua ki matele sikai m̃aleoputo ni Yudah natuna maga, pae natip̃akiana ki Yehovah paki Yoshua, Kiriath‐arba, Arba wanogoe e pei tama ni Anak (nae e pei Hebron).

¹⁴Go Kaleb e kopasi lua m̃elu dua ki nia Anak natuna dolu, Sheshai, go Ahiman, go Talmai, Anak natuna maga.

¹⁵Go e pae tokora wanogoe sake pano dip̃a naka ni Debir: go nagisa ni Debir sala vea e pei Kiriath‐sefer.

¹⁶Go Kaleb e naga, Naata waina ega wo atugi Kiriath‐sefer, po puati a, aga wo dua e natugu Aksah ega vei anagoroi.

¹⁷Go Othniel natu ni Kenas, tai ni Kaleb, e puati a: go e dua e natuna Aksah e pei anagoroi.

¹⁸Go e pakilina, ragi waina e umai punusi a, naga e pasadie a naga ega tatagovi tamana ki vanua sikai: go e siwo m̃elu dua ki ass aneana; go Kaleb e noa ki nia, e naga, Ku masau nasava?

¹⁹Go e naga, P̃a tua au navasap̃iakiana sikai; nalakena ku po doropusi au navanua ni sauth, go p̃a tua au namata noai maga ni noai. Go e dua e namata noai maga ni elagi go namata noai maga ni etano.

²⁰Tea waia e pei tea veani‐pioli‐kiana ki naworawora ni Yudah natuna maga pae naworada maga.

²¹Go natokoana maga ni namatap̃ago ni uvea ki naworawora ni Yudah natuna maga paki kokoi ki Edom taleva ni Sauth eu pei Kabseel, go Eder, go Yakur;

²²Go Kinah, go Dimonah, go Adadah;

²³Go Kedesh, go Hasor, go Itnan;

²⁴Sif, go Telem, go Bealoth;

²⁵Go Hasor‐hadatah, go Kerioth‐hesron (nae e pei Hasor); Amam,

²⁶go Shema, go Moladah; Go Hasar‐kadah,

²⁷go Heshmon, go Beth‐pelet;

²⁸Go Hasar‐shual, go Beer‐sheba, go Bisiotia;

²⁹Baalah, go Iim, go Esem;

³⁰Go Eltolad, go Kesil, go Hormah;

³¹Go Siklak, go Madmannah, go Sansannah;

³²Go Lebaot, go Silim, go Ain, go Rimmon: natokoana mamau puti eu pei rualima dua tamate loveti, go natokoana kiki kakada maga.

³³Tea maga ni navanua ni etano, Eshtaol, go Sorah, go Asna;

³⁴Go Sanoah, go En‐kannim, Tappuah, go Enam;

³⁵Yarmuth, go Adullam, Sokoh, go Asekah;

³⁶Go Shaaraim, go Aditaim, go Cederah, go Cederotaim; natokoana rualima sikai tamate pati, go natokoana kiki kakada maga.

³⁷Senan, go Hadasa, go Mikdal‐kad;

³⁸Go Dilan, go Mispeh, go Yoktheel;

³⁹Lakish, go Boskath, go Eklon;

⁴⁰Go Kabbon, go Lamam, go Kitlis;

⁴¹Go Cederoth, Beth‐dakon, go Naamah, go Makeda; natokoana rualima sikai tamate latesa, go natokoana kiki kakada maga.

⁴²Libnah, go Eter, go Ashan; Go Ifta,

⁴³go Asna, go Nesib; Go Keilah, go Aksib, go Mareshah;

⁴⁴natokoana loveti go natokoana kiki kakada maga.

⁴⁵Ekron, go natokoana kakana maga go natokoana kiki kakana maga.

⁴⁶Pae Ekron go paki natasi, tea mamau puti waina e doko taleva ni Ashdod, go natokoana kiki kakada maga.

⁴⁷Ashdod, natokoana kakana maga go natokoana kiki kakana maga; Casa, natokoana kakana maga go natokoana kiki kakana maga; pa pa paki noaisara ni Ityipt, go natasi warua, go kokoi kakana.

⁴⁸Go tea maga ni navanua ni tava, Shamir, go Yattir, go Sokoh;

⁴⁹Go Danna, go Kiriath‐sanna (nae e pei Debir);

⁵⁰Go Anab, go Eshtemoh, go Anim;

⁵¹Go Coshen, go Holon, go Ciloh; natokoana rualima sikai tamate sikai go natokoana kiki kakada maga.

⁵²Arab, go Dumah, go Esan;

⁵³Go Yanim, go Beth‐tappuah, go Afeka;

⁵⁴Go Humta, go Kiriath‐arba (nae e pei Hebron), go Sior; natokoana loveti go natokoana kiki kakada maga.

⁵⁵Maon, Karmel, go Sif, go Yuta;

⁵⁶Go Yesreel, go Yokdeam, go Sanoah; Kain, Cibeah, go Timnah;

⁵⁷natokoana rualima sikai go natokoana kiki kakada maga.

⁵⁸Halhul, Beth‐sur, go Cedor;

⁵⁹Go Maarat, go Beth‐anot, go Eltekon; natokoana latesa go natokoana kiki kakada maga.

⁶⁰Kiriath‐baal (nae e pei Kiriath‐yearim), go Rabbah; natokoana dua go natokoana kiki kakada maga.

⁶¹Tea maga ni masop̃alo, Beth‐arabah, Middin, go Sekaka;

⁶²Go Nibsan, go Natokoana ni Natasimena, go En‐kedi; natokoana latesa go natokoana kiki kakada maga.

⁶³Go nalo ni naworawora ni Yebus waina eu doko Yerusalem doko, Yudah natuna maga eu da mariatae kopasi lua ra mau: ma naworawora ni Yebus eu doko sikoti Yudah natuna maga Yerusalem doko pa pa paki naaleatia waia.