Read Nguna Togoa Etafe North YOSHUA 17 Bible Online

YOSHUA 17 - Nguna Togoa Etafe North bible

YOSHUA 17

¹Go tea waia e pei gole agi naworawora ni Manasseh; nalakena nae e pei takalapa ki Yosef. Nalo ni Makir tea takalapa ki Manasseh, tama ni Cilead, nalakena nae e pei naatam̃oli ni navakalo, go e peani Cilead go Bashan.

²Go gole e pei agi Manasseh natuna p̃ota maga pae naworada maga; agi Abieser natuna maga, go agi Helek natuna maga, go agi Asriel natuna maga, go agi Shekem natuna maga, go agi Hefer natuna maga, go agi Shemida natuna maga: tea maga wanogoe eu pei Manasseh natuna naanoai maga, natu ni Yosef pae naworada maga.

³Ma Selofehad, natu ni Hefer, natu ni Cilead, natu ni Makir, natu ni Manasseh, e dika natuna naanoai maga, ma e peani natuna nagoroi maga eu sikida: go tea maga waia eu pei nagisa maga ni natuna nagoroi maga, Malah, go Noah, Hoklah, Milkah, go Tirsah.

⁴Go eu rumai paki m̃aladigi punusi Eleasar tea viri, go punusi Yoshua natu ni Nun, go punusi tea maraki maga, eu naga, Yehovah e dip̃aki Moses naga ega tua gami tea veani‐pioli‐kiana sikai m̃aleoputo ni goregami maga: go e dua ra pae natip̃akiana ki Yehovah tea veani‐pioli‐kiana sikai m̃aleoputo ni tamada taina maga.

⁵Go matele rowogiana rualima sikai eu magi Manasseh dowo, masale ki navanua ni Cilead go ni Bashan, waina e one taleva kerua ni Yordan;

⁶Nalakena Manasseh natuna nagoroi maga eu peani tea veani‐pioli‐kiana sikai m̃aleoputo ni natuna naanoai maga: go navanua ni Cilead e pei agi Manasseh natuna p̃ota maga.

⁷Go kokoi ki Manasseh e doko pae Asher paki Mikmetat, waina e doko narae ni Shekem; go kokoi e pano paki taleva ni matua, paki naka ni En‐tappuah.

⁸Navanua ni Tappuah e pei agi Manasseh: ma Tappuah waina e doko kokoi ki Manasseh e pei agi Efraim natuna maga.

⁹Go kokoi e siwo paki noaisara ni Kanah, paki sauth ni noaisara: natokoana maga wanogoe eu pei agi Efraim m̃aleoputo ni natokoana maga ki Manasseh go kokoi ki Manasseh e doko taleva ni north ni noaisara, go tokora waina e liliu asa e dip̃a natasi:

¹⁰Paki sauth e pei agi Efraim, go paki north e pei agi Manasseh, go natasi e pei kokoi aneana: go ero pa dip̃a Asher taleva ni north, go Issakar taleva ni elo sake.

¹¹Go Manasseh e peani doko Issakar go doko Asher Beth‐shean go natokoana kakana maga, go Ibleam go natokoana kakana maga, go naka ni Dor go natokoana kakana maga, go naka ni En‐dor go natokoana kakana maga, go naka ni Taanak go natokoana kakana maga, go naka ni Mekiddo go natokoana kakana maga, tava sula dolu waina.

¹²Go Manasseh natuna maga eu da mariatae kopasi lua naka ni natokoana maga wanogoe mau; ma naworawora ni Kanaan eu masauna naga euga toko navanua wanogoe.

¹³Go e pakilina, ragi waina Israel natuna maga eu kasua, naga eu pitua ki naworawora ni Kanaan paki nawosiana ni nasautoga, po da kopasi lua puti ra mau.

¹⁴Go Yosef natuna maga eu pasa ki Yoshua, eu naga, Ekasana ku dua au gole sikai maau go matele rowogiana sikai maau waina ega vei tea veani‐pioli‐kiana sikai, go kinau a pei narei warua sikai, go Yehovah e pasap̃ia ki nau pa pa paki ragi waia?

¹⁵Go Yoshua e noa ki da, e naga, Nigo ku pe vei narei warua sikai, p̃a sake paki mala ni nakau, po dum̃am̃a manigo daelua tokora wanogoe navanua ki naworawora ni Peris go ni Refaim maga; nalakena navanua ni tava ki Efraim e kiki ki‐go.

¹⁶Go Yosef natuna maga eu naga, Navanua ni tava e da pataka gami mau: go naworawora ni Kanaan waina eu doko navanua ni nap̃aloa eu mamau puti peani kariot ni airon maga, tea maga waina eu doko Beth‐shean go natokoana kakana maga, go tea maga waina eu doko nap̃aloa ni Yesreel.

¹⁷Go Yoshua e noa ki nasum̃a ki Yosef, ki Efraim, go ki Manasseh, e naga, Nigo ku pei narei warua sikai, go ku peani nakasuaana warua: p̃a wo da peani gole sikai maau mau:

¹⁸Nalakena navanua ni tava ega wo pei anigo; nalakena nae e pei mala ni nakau, go p̃a wo daelua e, go tokora maga waina e liliu ara euga wo pei anigo: nalakena p̃a wo kopasi lua naworawora ni Kanaan, nalakena eu peani kariot ni airon maga, go nalakena eu kasua.