Read Nguna Togoa Etafe North YOSHUA 18 Bible Online

YOSHUA 18 - Nguna Togoa Etafe North bible

YOSHUA 18

¹Go navata mamau ni Israel natuna maga eu saisai paki Shiloh, po sike lawo ki tap̃aup̃au ni nasaisaiana tokora wanogoe: go navanua e pei tea marimatuakiana naraeda.

²Go naworawora larua eu ko doko m̃aleoputo ni Israel natuna maga waina eu ko da dap̃otawotae tea veani‐pioli‐kiana adeada mau.

³Go Yoshua e noa ki Israel natuna maga, e naga, Nimu ku dodosua pa pa paki seve ragi naga kuga sili pano naga kuga veani navanua, waina Yehovah, Sup̃e ki tamamu maga e dua mu asa?

⁴Kuga tum̃amu manimu pitua ki naatam̃oli euga tolutolu agi sara naworawora sarasara ra: go aga wo dip̃aki lua ra, go euga wo duleana po surata duaduru navanua, po midiri dawona ki nia ega vae tea veani‐pioli‐kiana adeada; go euga wo umai punusi au.

⁵Go euga tap̃otawotae a ega vei matele larua: Yudah ega toko kokoi aneana taleva ni sauth, go nasum̃a ni Yosef euga toko kokoi adeada taleva ni north.

⁶Go nimu kuga midiri navanua ega vei matele larua, go kuga tape namidiriana kakana umai paki nau: go aga wo manimu nadi ki gole tokora waia narae ni Yehovah Sup̃e anigida.

⁷Nalakena naworawora ni Levi eu da peani te matele sikai m̃aleoputo kakamu mau; nalakena navei‐tea‐viriana ki Yehovah e pei tea veani‐pioli‐kiana adeada: go Cad go Reuben go namagovai ni naworawora ni Manasseh eu dape sua tea veani‐pioli‐kiana adeada taleva kerua ni Yordan paki elo sake, waina Moses tea suasua ki Yehovah e dua ra asa.

⁸Go naatam̃oli maga wanogoe eu duleana, po pano: go Yoshua e dip̃aki tea maga waina eu pano naga euga midiri navanua, e naga, Kuga vano po surata duaduru navanua, po midiri a, go kuga moro umai punusi au, go aga wo manimu nadi ki gole tokora waia narae ni Yehovah Shiloh.

⁹Go naatam̃oli maga wanogoe eu pano, po surata duaduru navanua, po midiri a pae natokoana maga naga ega vei matele larua doko tusi sikai, go eu rumai punusi Yoshua paki tokora ni nam̃enakiana Shiloh.

¹⁰Go Yoshua e madeada nadi ki gole Shiloh narae ni Yehovah: go tokora wanogoe Yoshua e magi Israel natuna maga dap̃otawotae navanua dapala natap̃otawotaeana kakada maga.

¹¹Go gole ki naworawora ni Benyamin natuna maga e sake umai pae naworada maga: go kokoi ni gole adeada e dave pano namawota ni Yudah maga go ni Yosef natuna maga.

¹²Go kokoi adeada taleva ni north e doko pae Yordan pano; go kokoi e sake paki taleva ni Yeriko taleva ni north, po sake duaduru navanua ni tava paki taleva ni elo musu; go tokora waina e liliu asa e dip̃a masop̃alo ni Beth‐aven.

¹³Go kokoi e pae tokora wanogoe pano paki Lus, paki taleva ni Lus (nae e pei Beth‐el), paki sauth; go kokoi e siwo paki Ataroth‐addar, pae tava waina e one paki sauth ni Beth‐horon ni etano.

¹⁴Go kokoi e pei tea midiri‐dawona‐kiana po maradoa taleva ni elo musu paki sauth, pae tava waina e one narae ni Beth‐horon paki sauth; go tokora waina e liliu asa e dip̃a Kiriath‐baal (nae e pei Kiriath‐yearim), natokoana sikai ki Yudah natuna maga: tea wanogoe e pei taleva ni elo musu.

¹⁵Go taleva ni sauth e doko pae namatap̃ago ni uvea ni Kiriath‐yearim, go kokoi e dave pano paki taleva ni elo musu, po dave pano paki namata noai ni noai maga ni Neftoah:

¹⁶Go kokoi e siwo paki namatap̃ago ni uvea ni tava waina e one narae ni nap̃aloa ki natu ni Hinnom, waina e doko nap̃aloa ki Refaim maga paki north; go e siwo paki nap̃aloa ki Hinnom, paki taleva ni naworawora ni Yebus paki sauth, po siwo paki En‐rokel;

¹⁷Go e pei tea midiridawona‐kiana taleva ni north, po liliu En‐shemesh, po dave pano paki Celilot, waina e doko kivea ki tokora ni nasakesakeana ni Adummim; go e siwo paki vatu ki Bohan natu ni Reuben;

¹⁸Go e pano paki taleva waina e doko kivea ki Arabah paki north, po siwo paki Arabah:

¹⁹Go kokoi e pano paki taleva ni Beth‐hoklah paki north: go tokora waina kokoi e liliu asa e dip̃a nap̃olulua ni north ni Natasi ni Natasimena, pisari namatap̃ago ni Yordan ni sauth; tea wanogoe e pei kokoi ni sauth.

²⁰Go Yordan e pei kokoi kakana taleva ni elo sake. Tea wanogoe e pei tea veani‐pioli‐kiana ki Benyamin natuna maga, pae kokoi kakana maga daliviri, pae naworada maga.

²¹Go natokoana maga ki naworawora ni Benyamin natuna maga, pae naworada maga eu pei Yeriko, go Beth‐hoklah, go Emekkesis;

²²Go Beth‐arabah, go Semaraim, go Beth‐el;

²³Go Avvim, go Parah, go Ofrah;

²⁴Go Kefar‐ammoni, go Ofni, go Ceba; natokoana rualima sikai tamate dua go natokoana kiki kakada maga:

²⁵Cibeon, go Ramah, go Beeroth;

²⁶Go Mispeh, go Kefirah, go Mosah;

²⁷Go Rekem, go Irpeel, go Taralah;

²⁸Go Selah, Elef, go naworawora ni Yebus (nae e pei Yerusalem), Cibeath, go Kiriath, natokoana rualima sikai tamate pati go natokoana kiki kakada maga. Tea wanogoe e pei tea veani‐pioli‐kiana ki Benyamin natuna maga pae naworada maga.