Read Nguna Togoa Etafe North YOSHUA 2 Bible Online

YOSHUA 2 - Nguna Togoa Etafe North bible

YOSHUA 2

¹Go Yoshua natu ni Nun e dip̃aki lua m̃elu dua ki Shittim naatam̃oli dua tea leo pavaraka pei p̃aia pano, po naga, Koroga vano, koroga vunusi navanua, go Yeriko. Go ero pano, po umai paki ekopu ni nasum̃a ki nagoroi masausara sikai, waina nagisana e pei Rahab, go ero one tokora wanogoe.

²Go e pei tea noaana paki nawota ni Yeriko, eu naga, P̃a leo, naatam̃oli maga eu rumai paki nea nap̃ogiana waia, tea ni Israel natuna maga, naga euga leousiusi navanua.

³Go nawota ni Yeriko e dip̃aki lua pa punusi Rahab, po naga, P̃a viragi paki katama naatam̃oli maga waina eu po umai punusi ko, waina eu paki ekopu ni nasum̃a anigo nalakena eu rumai naga euga leousiusi navanua mamau.

⁴Go nagoroi wanogoe e piragi naatam̃oli dua wanogoe po dasuru ki da; go e naga, Io, naatam̃oli maga wanogoe eu rumai punusi au, ma a da atae tokora waina nara eu pae asa umai mau:

⁵Go e pakilina ragi ni nakokoroana ni namata‐pua, ragi waina e maligo, naga naatam̃oli maga wanogoe eu paki katama: a da atae tokora waina naatam̃oli maga wanogoe eu paki asa mau: kuga sava dausi ra m̃araverave; nalakena kuga wo pa parati ki da.

⁶Ma nae e piragi sua ra sake paki nap̃au ni nasum̃a, po dasuru ki da ki nakau ni flaks maga, waina e maneana pei tea toropusi‐ovara‐kiana one nap̃au ni nasum̃a.

⁷Go naatam̃oli maga waina eu pei tea tip̃aki‐lua‐ana eu sava dausi ra pae napua waina e paki Yordan paki tokora maga ni natuagotoana: go ragi waina tea maga waina eu sava dausi ra eu dave pano eu kokoro namata‐pua.

⁸Go ragi waina nara ero ko da one mau, nae e sake pano punusi ra paki nap̃au ni nasum̃a;

⁹Go e noa ki naatam̃oli dua wanogoe, e naga, A atae naga Yehovah e dua mu navanua, go naga namatauki‐mu‐ana e dowo paki gami, go naga tea mamau puti waina eu doko navanua eu sara pa dua ki naraemu.

¹⁰Nalakena au dogo naga Yehovah e mari noai ni Natasi ni Nam̃om̃o e garagara pa dua ki naraemu, ragi waina ku m̃elu dua ki Ityipt umai; go tea waina ku mari a paki nawota dua ki naworawora ni Amor, waina ero doko taleva kerua ni Yordan, paki Sihon go paki Ok, waina ku mari punuvunue ra.

¹¹Go ragi waina au dogo e, nap̃op̃ogami e sara, go naatana e da moro lawodu te naata mau nalakena nimu: nalakena Yehovah Sup̃e animu, nae e pei Sup̃e doko nakoroatelagi ni elagi, go maramana ni etano.

¹²Go ragi waia, koroga vivisa paki nau pae Yehovah, a pavara ni mu asa, nalakena a po mari nadodomiana paki mu, naga nimu ma kuga wo mari nadodomiana paki nasum̃a ki tamagu, go koroga tua au navaivaiana lomau;

¹³Go naga kuga wo mauti euga mauri tamagu, go p̃ilagu, go goregu maga, go taigu maga, go tea mamau puti waina eu peani ra, go naga kuga wo pualua namauriana aginami pa dua ki namateana.

¹⁴Go naatam̃oli dua wanogoe ero noa ki nia, ero naga, Ku pe ta noasai naleo aginami waia mau, namauriana aginami ega toko oli mu paki namateana; go ega wo doko ragi waina Yehovah ega wo dua gami navanua, naga auga wo mari nadodomiana go naveilomauana paki mu.

¹⁵Go e doro ra pakitano ki namea sikai duaduru namata leoduru: nalakena nasum̃a aneana e doko nakoro ni natokoana, go nae e doko nakoro doko.

¹⁶Go e noa ki da, e naga, Koroga vaki tava pano, tea sava dausi mu maga eu pe va parati ki mu; go koroga tum̃amu dasuru ki mu tokora wanogoe naaleatia dolu, pa pa tea sava dausi mu maga euga wo liliu sua: go koroga wo edaku surata pae napua animu pano.

¹⁷Go naatam̃oli dua wanogoe ero noa ki nia, ero naga, Kinami auga wo dautau m̃elu dua ki navivisaana anigo waia waina ku mari gami aro pivisa asa.

¹⁸P̃a leo, ragi waina kinami auga wo umai paki navanua, p̃a likoti namea ni nalolu miala kalakala waia paki namata leoduru waina ku doro gami pakitano asa: go tamam̃a, go p̃ilam̃a, go gorem̃a maga, go nasum̃a mamau ki tamam̃a, p̃a viragi saisai ki da umai punusi ko paki ekopu ni nasum̃a.

¹⁹Go ega wo doko, naga tea maga waina euga wo dave pae namata maga ni nasum̃a anigo paki katama, nadada ega wo doko nap̃auda, go kinami auga wo dautau: go tea maga waina euga wo doko sikoti ko ekopu ni nasum̃a, nam̃elearu ni te naata e pe toko ara, nadada e pe wo doko nap̃augami.

²⁰Ma ku pe noasai naleo aginami waia, go au pe wo dautau m̃elu dua ki navivisaana anigo waina ku mari gami au pivisa asa.

²¹Go e naga, Ega tapala waina koro po noa e. Go e dip̃aki lua ra, go ero surata pano. Go e likoti namea miala kalakala wanogoe paki namata leoduru.

²²Go ero surata pano, po umai paki tava, po doko asa naaleatia dolu, pa pa tea sava dausi maga eu liliu sua: go tea sava dausi maga eu laaga ara pae napua mamau, ma eu da pap̃ai ra mau.

²³Go naatam̃oli dua wanogoe ero liliu, po siwo m̃elu dua ki tava, po duagoto, po umai punusi Yoshua natu ni Nun; go ero dogorogo paki nia ki tea mamau puti waina e pakilina ki da.

²⁴Go ero noa ki Yoshua, ero naga, Lomau Yehovah e po pitua ki navanua mamau paki nam̃elearugida, go tea mamau puti waina eu doko navanua eu sara pa dua ki naraegida.