Read Nguna Togoa Etafe North YOSHUA 22 Bible Online

YOSHUA 22 - Nguna Togoa Etafe North bible

YOSHUA 22

¹Go Yoshua e soso naworawora ni Reuben, go naworawora ni Cad, go namagovai ni naworawora ni Manasseh,

²Po noa ki da, e naga, Nimu ku pavaigoro tea mamau puti waina Moses tea suasua ki Yehovah e dip̃a ki mu asa, go ku dogo parati ki nadaleogu nalo ni tea mamau puti waina a dip̃aki mu asa.

³Ku da doropusi taimu naaleatia laapa waina pa pa paki naaleatia waia mau, ma ku pavaigoro navavaigoroana ni natip̃akiana ki Yehovah Sup̃e animu.

⁴Go ragi waia Yehovah Sup̃e animu e po pitua ki namaromaroana paki taimu maga dapala waina e pasa ki da asa: go tea wanogoe kuga tum̃amu doa mu, go kuga vano paki tap̃aup̃au animu maga, paki navanua ni tea veaniana animu, waina Moses tea suasua ki Yehovah e dua mu asa taleva kerua ni Yordan.

⁵Ma kuga vavaigoro parati ki nia naga kuga mari natip̃akiana go nawotaeana, waina Moses tea suasua ki Yehovah e dip̃aki mu asa, naga kuga dodomi Yehovah Sup̃e animu, go naga kuga surata pae napua aneana mamau puti, go naga kuga vavaigoro natip̃akiana aneana maga, go naga kuga vuluti a, go naga kuga maneana suasua ki nap̃op̃omu mamau go ki naatamu mamau.

⁶Go Yoshua e pasap̃ia ki da, po dip̃aki lua ra: go eu pano paki tap̃aup̃au adeada maga.

⁷Go paki namagovai sikai ni naworawora ni Manasseh Moses e pitua ki sua tea veani‐pioli‐kiana doko Bashan; ma paki namagovai kerua Yoshua e pitua ki nia m̃aleoputo ni taida maga taleva kerua ni Yordan paki elo musu. Go ragi waina Yoshua e dip̃aki lua ra paki tap̃aup̃au adeada maga, e pasap̃ia ki da,

⁸Go e noa ki da, e naga, Kuga vilake nasogolapaana warua liliu paki tap̃aup̃au animu maga, go katel maga laapa liu, go silver, go kold, go brass, go airon, go sugoro maga laapa liu: kuga tap̃otawotae tea tape‐pavakotoana ki tea kokona ki mu maga dua taimu maga.

⁹Go Reuben natuna maga go Cad natuna maga go namagovai ni naworawora ni Manasseh eu liliu, po pano m̃elu dua ki Israel natuna maga m̃elu dua ki Shiloh, waina e doko navanua ni Kanaan, naga euga vaki navanua ni Cilead, paki navanua ni tea veaniana adeada, waina eu peani a, pae natip̃akiana ki Yehovah doko nam̃elearu ni Moses.

¹⁰Go ragi waina eu rumai paki tokora welukia maga ni Yordan waina eu doko navanua ni Kanaan, Reuben natuna maga go Cad natuna maga go namagovai ni naworawora ni Manasseh eu davagi wede ni naviriana sikai tokora wanogoe pisari Yordan, wede ni naviriana warua sikai tea tataragiana.

¹¹Go Israel natuna maga eu dogo e eu noa, Kuga leo, Reuben natuna maga go Cad natuna maga go namagovai ni naworawora ni Manasseh eu po davagi wede ni naviriana sikai doko kivea ki navanua ni Kanaan, doko tokora welukia maga ni Yordan, doko taleva ki Israel natuna maga.

¹²Go ragi waina Israel natuna maga eu dogo e, navata mamau ni Israel natuna maga eu dum̃ada saisai ki da Shiloh, naga euga sake pano naga euga mari navakalo paki da.

¹³Go Israel natuna maga eu dip̃aki lua pa punusi Reuben natuna maga, go Cad natuna maga, go namagovai ni naworawora ni Manasseh, paki navanua ni Cilead, Finehas natu ni Eleasar tea viri;

¹⁴Go tea maraki rualima sikai eu sikoti a pano, tea maraki sikasikai agi nasum̃a ni tamada maga sarasara ra agi naworawora mamau puti ni Israel; go eu sikasikai puti pei nap̃au nawota ni nasum̃a ni tamada maga sarasara ra m̃aleoputo ni manu maga ni Israel.

¹⁵Go eu rumai punusi Reuben natuna maga, go Cad natuna maga, go namagovai ni naworawora ni Manasseh, paki navanua ni Cilead, go eu pasa ki da,

¹⁶eu naga, Navata mamau ki Yehovah eu noa dapala nea, eu naga, Seve natapiriana waia waina ku mari a dip̃a Sup̃e ki Israel, naga kuga liliu naaleatia waia m̃elu dua ki narausi‐Yehovah‐ana, nalo ni ku dum̃amu manimu davagi wede ni naviriana sikai, naga kuga mari p̃auluulu naaleatia waia dip̃a Yehovah?

¹⁷Nasigisigileoana ni Peor e kiki ki gida, kite? Waina tu ko da dum̃agida mari gida tu dautau m̃elu dua ki nia mau pa pa paki naaleatia waia, go naatugiana sikai e pakilina ki navata ki Yehovah,

¹⁸Go nimu ku liliu naaleatia waia m̃elu dua ki narausi‐Yehovah‐ana; go ega wo doko, nalakena nimu ku mari p̃auluulu masoso paki Yehovah, naga matamai ega wo maeto ki navata mamau ni Israel.

¹⁹Ma navanua ni tea veaniana animu e pe ta dautau mau, kuga tuagoto paki navanua ni tea veaniana ki Yehovah, waina tap̃aup̃au ki Yehovah e doko asa, go kuga tape tea veaniana m̃aleoputo kakagami: ma kuga ta mari p̃auluulu paki Yehovah mau, go kuga ta mari p̃auluulu paki gami mau, nalo ni ku dum̃amu manimu davagi wede ni naviriana sikai masale ki wede ni naviriana ki Yehovah Sup̃e anigida.

²⁰Akan natu ni Serah e da mari natapiriana sikai nalo ni naleo vasasakiana, kite? Go namaetoana e doko navata mamau ki Israel, go naatam̃oli wanogoe e mate e da sikina mau nasigisigileoana aneana.

²¹Go Reuben natuna maga, go Cad natuna maga, go namagovai ni naworawora ni Manasseh eu pasadara, po pasa ki nap̃au nawota maga ni manu maga ni Israel, po naga, Yehovah,

²²Sup̃e ki sup̃e maga, Yehovah, Sup̃e ki sup̃e maga, nae e atae, go Israel nae ega wo atae; au pe tum̃agami maginami davagi wede ni naviriana sikai nalakena namari‐p̃auluulu‐ana, kite nalakena natapiriana dip̃a Yehovah, (p̃a ta mauti gami naaleatia waia mau),

²³Naga auga liliu m̃elu dua ki narausi Yehovah‐ana; kite naga auga vitua ki naviriana tap̃arakiana go navituaana ni navinaga m̃oli asa, kite naga auga mari naviriana maga ni natam̃ateana asa, Yehovah nae ega tatago asa;

²⁴Go au pe ta mari tea waia nalakena namidoaki‐parati‐kiana nalakena naleo sikai, au naga, Ragi edaku natumu maga eu pe noa ki natugami maga, eu pe naga, Nimu kuga kasa ki Yehovah, Sup̃e ki Israel?

²⁵Nalakena Yehovah e mari Yordan e pei kokoi sikai namawota kakagami go kakamu, Reuben natuna maga go Cad natuna maga; nimu ku da peani te matele sikai doko Yehovah mau: go natumu maga eu pe mari natugami maga eu pe makoto ki namatauki‐Yehovah‐ana.

²⁶Go au naga, Tuga mari naga tuga tum̃agida manigida davagi wede ni naviriana sikai, ega ta pei agi naviriana tap̃arakiana mau, go ega ta pei agi naviriana kaniana mau:

²⁷Ma nae ega vei nanoasokisokiana sikai namawota kakagami go kakamu, go namawota ni tagona anigida maga waina euga wo edakugoro gida, naga auga mari nasuasuaana ki Yehovah naraena ki naviriana tap̃arakiana aginami maga, go ki naviriana kaniana aginami maga, go ki naviriana ni natam̃ateana aginami maga; go naga natumu maga euga ta noa ki natugami maga ragi edaku, euga ta naga, Nimu ku da peani te matele sikai doko Yehovah mau.

²⁸Nalakena tea wanogoe au naga, Go ega wo doko, ragi waina euga wo noa ki gami asa go ki tagona aginami maga asa ragi edaku, naga auga wo noa, Kuga vunusi naleo‐dawona‐kiana ni wede ni naviriana ki Yehovah, waina tamagami maga eu mari a, waina e da pei agi naviriana tap̃arakiana mau, go e da pei agi naviriana kaniana mau; ma nae e pei nanoasokisokiana sikai namawota kakagami go kakamu.

²⁹Ega madu uvea ki gami naga auga mari p̃auluulu paki Yehovah, go naga auga liliu naaleatia waia m̃elu dua ki narausi‐Yehovah ana, naga auga tavagi wede ni naviriana agi naviriana tap̃arakiana, agi navituaana ni navinaga m̃oli, kite agi naviriana kaniana, masale ki wede ni naviriana ki Yehovah Sup̃e anigida waina e doko narae ni nasum̃atokoana aneana.

³⁰Go ragi waina Finehas tea viri, go tea maraki maga ni navata, go nap̃au nawota maga ki manu maga ni Israel waina eu sikoti a, eu dogo navasaana maga waina Reuben natuna maga go Cad natuna maga go Manasseh natuna maga eu pasa asa, eu midoa ki m̃ata ki nia.

³¹Go Finehas natu ni Eleasar tea viri e noa ki Reuben natuna maga, go ki Cad natuna maga, go ki Manasseh natuna maga, e naga, Naaleatia waia au atae naga Yehovah e doko m̃aleoputo kakagida, nalakena ku da mari natapiriana wanogoe dip̃a Yehovah mau: ragi waia ku po pualua Israel natuna maga m̃elu dua ki nam̃elearu ni Yehovah.

³²Go Finehas natu ni Eleasar tea viri, go tea maraki maga eu liliu m̃elu dua ki Reuben natuna maga, go m̃elu dua ki Cad natuna maga, m̃elu dua ki navanua ni Cilead, paki navanua ni Kanaan punusi Israel natuna maga, po madeada dape navasaana liliu.

³³Go Israel natuna maga eu midoa ki m̃ata ki naleo wanogoe, go Israel natuna maga eu pasap̃ia ki Sup̃e, go eu da noa mau naga euga sake pano naga euga mari navakalo paki da, naga euga mari sa ki navanua waina Reuben natuna maga go Cad natuna maga eu doko asa doko.

³⁴Go Reuben natuna maga go Cad natuna maga eu soso wede ni naviriana wanogoe ki Ed: Nalakena, eu noa e, nae e pei nanoasokisokiana namawota kakakagida naga Yehovah e pei Sup̃e.