Read Nguna Togoa Etafe North YOSHUA 23 Bible Online

YOSHUA 23 - Nguna Togoa Etafe North bible

YOSHUA 23

¹Go e pakilina edaku ki naaleatia laapa, ragi waina Yehovah e dua sua Israel namaromaroana pa dua ki tea kokona ki da mamau puti daliviri, go Yoshua e pei tea matua, tea ni naaleatia laapa;

²Naga Yoshua e soso saisai ki Israel mamau puti, ki tea matua adeada maga go ki nap̃au nawota adeada maga, go ki tea vasap̃otae adeada maga go ki tea maraki adeada maga, po noa ki da, e naga, Kinau a pei tea matua, tea ni naaleatia laapa:

³Go nimu ku punusi tea mamau puti waina Yehovah Sup̃e animu e mari a paki nalauna mamau puti waia nalakena nimu; nalakena Yehovah Sup̃e animu, nae e po manimu marimari.

⁴Kuga vunusi, a manimu mari nalauna maga waina eu pei tea toropusiana eu doko eu dowo pae gole, naga euga vei tea veani‐pioli‐kiana sikai agi naworaworamu maga, pae Yordan, go nalauna mamau puti waina a daelua ra, pa pa paki natasi warua paki elo musu.

⁵Go Yehovah Sup̃e animu nae ega wo sai ki da pa dua ki naraemu, po kopasi lua ra pa dua ki narae ni namatamu; go kuga wo peani navanua adeada, dapala waina Yehovah Sup̃e animu e pasa ki mu asa.

⁶Go kuga kasua p̃arua liu naga kuga vavaigoro po mari tea mamau puti waina e pei tea midiriana tusi ni nawotaeana ki Moses, naga kuga ta dawasi m̃elu dua ki nia paki taleva ni matua kite paki taleva ni mawiri mau;

⁷Naga kuga ta umai doko sari nalauna maga waia mau, tea maga waina eu pei tea toropusiana eu doko m̃aleoputo kakamu; go kuga ta pasa lagati nagisa ni sup̃e adeada maga mau, kite mari euga vivisa pae ara, kite madeada suasua, kite kolo suai natano paki da mau:

⁸Ma kuga vuluti Yehovah Sup̃e animu, ega tapala waina ku mari a pa pa paki naaleatia waia.

⁹Go Yehovah ega wo kopasi lua pa dua ki naraemu nalauna warua go kasua maga: go nimu, te naata sikai e da lawodu naraemu mau pa pa paki naaleatia waia.

¹⁰Naatam̃oli sikai kakamu ega wo kopasi manu sikai: nalakena Yehovah Sup̃e animu nae e do manimu marimari, dapala waina e pasa ki mu asa.

¹¹Go kuga tum̃amu pavaigoro parati ki mu, naga kuga dodomi Yehovah Sup̃e animu.

¹²Nalakena ku pe liliu ki naliliuana, po puluti namagovai ni nalauna maga waia waina eu ko doko, tea maga waina eu pei tea toropusiana eu doko m̃aleoputo kakamu, go ku pe vitua ki natumu nagoroi maga eu pe laki ara, po dawiri natuda nagoroi maga, go ku pe vaki ekopu punusi ra, go nara eu pe umai paki ekopu punusi mu:

¹³Kuga atae ki naataeana naga Yehovah Sup̃e animu ega wo da moro kopasi lua nalauna maga wanogoe pa dua ki narae ni namatamu maga mau; ma euga wo pei nasasa sikai go tea alasoki sikai paki mu, go tea varati sikai doko navidimu maga, go natip̃a maga doko namatamu maga; pa pa kuga wo mate puoli m̃elu dua ki navanua wia waia waina Yehovah Sup̃e animu e dua mu asa.

¹⁴Go kuga leo, kinau a do pano naaleatia waia pae napua ni maramana mamau: go ku atae doko nap̃op̃omu mamau go doko naatamu mamau, naga naleo sikai e da dowo mau ni naleo wia mamau puti waina Yehovah Sup̃e animu e pasa ara nalo kakamu; tea mamau puti eu manimu umai, naleo sikai kakada e da dowo mau.

¹⁵Go ega wo pakilina, naga dapala waina naleo wia mamau puti eu rumai paki mu waina Yehovah Sup̃e animu e pasa ki mu ara, dapala nogoe Yehovah ega wo piragi umai paki mu naleo sa mamau puti, pa pa ega wo mari a ki mu m̃elu dua ki navanua wia waia waina Yehovah Sup̃e animu e dua mu asa.

¹⁶Ragi waina kuga wo dapiri navasasokiana ki Yehovah Sup̃e animu, waina e dip̃aki mu asa, go kuga wo pano po magi sup̃e p̃ota maga suasua, po kolo suai natano paki da; go namaetoana ki Yehovah ega wo pavaga dip̃a mu, go kuga wo mate puoli m̃araverave m̃elu dua ki navanua wia waina e dua mu asa.