Read Nguna Togoa Etafe North YOSHUA 24 Bible Online

YOSHUA 24 - Nguna Togoa Etafe North bible

YOSHUA 24

¹Go Yoshua e piragi saisai ki naworawora ni Israel mamau puti paki Shekem, po soso saisai ki tea matua maga ni Israel, go ki nap̃au nawota adeada maga, go ki tea vasap̃otae adeada maga, go ki tea maraki adeada maga; go eu dum̃ada lawo ki da narae ni Sup̃e.

²Go Yoshua e noa ki narei mamau, e naga, Yehovah, Sup̃e ki Israel e noa dapala nea, e naga, Tamamu maga eu doko taleva kerua ni Noaisara doko pae tuai pa pa, Terah, tama ni Abraham, go tama ni Nahor: go eu magi sup̃e p̃ota maga suasua.

³Go a piragi tamamu Abraham pae taleva kerua ni Noaisara umai, po maraki nia duaduru navanua mamau ni Kanaan, po mari naworana eu laapa, po dua e Isaak.

⁴Go a dua Isaak Yakob go Esau: go a dua Esau tava Seir, naga ega veani a: go Yakob go natuna maga eu siwo paki Ityipt.

⁵Go a dip̃aki lua Moses go Aaron, go a p̃okati Ityipt dapala tea waina a mari a m̃aleoputo kakana: go a edaku piragi lua mu m̃elu dua ki nia umai.

⁶Go a piragi lua tamamu maga m̃elu dua ki Ityipt umai: go ku umai paki natasi; go naka ni Ityipt eu sava dausi tamamu maga eu pilake kariot maga go naatam̃oli sakesaake horse maga paki Natasi ni Nam̃om̃o.

⁷Go eu pioso paki Yehovah, go e doropusi namaligo namawota kakamu go ki naka ni Ityipt, po piragi natasi e umai paki da, po dap̃augoro ra; go namatamu maga eu punusi tea waina a mari a Ityipt: go ku doko masop̃alo doko naaleatia laapa.

⁸Go a piragi mu umai paki navanua ki naworawora ni Amor, waina eu doko taleva kerua ni Yordan doko; go eu mari navakalo paki mu: go a pitua ki da paki nam̃elearumu, go ku peani navanua adeada; go a mari sa ki da pa dua ki naraemu.

⁹Go Balak natu ni Sippor, nawota ni Moab, e duleana po mari navakalo paki Israel; go e dip̃aki lua po soso Balaam natu ni Beor naga ega vasasa ki mu:

¹⁰Ma a da masauna mau naga aga rogo parati ki Balaam; go e pasap̃ia ki mu po do pasap̃ia ki mu: go a pualua mu m̃elu dua ki nam̃elearuna.

¹¹Go ku duagoto Yordan, po umai paki Yeriko: go naatam̃oli maga ni Yeriko eu mari navakalo paki mu, naworawora ni Amor, go naworawora ni Peris, go naworawora ni Kanaan, go naworawora ni Heth, go naworawora ni Circash, naworawora ni Hivah, go naworawora ni Yebus; go a pitua ki da paki nam̃elearumu.

¹²Go a dip̃aki lua lida e pea ki mu, waina e kopasi lua ra pa dua ki naraemu, nawota dua ki naworawora ni Amor; e da mari a ki lova anigo mau, kite ki naasu anigo mau.

¹³Go a dua mu navanua sikai waina ku da p̃osiwosi asa mau, go natokoana maga waina ku da davagi ra mau, go ku doko ara doko; roara maga ni vaine go ni oliva waina ku da lawo e mau, nimu ku do gani a.

¹⁴Go ragi waia kuga matau ki Yehovah, po maneana suasua ki nawialuaana go ki naveilomauana: go kuga mari puoli ki sup̃e maga waina tamamu maga eu madeada suasua taleva kerua ni Noaisara, go ragi waina eu doko Ityipt; go kuga magi Yehovah suasua.

¹⁵Go ku pe midoa ki nia naga e sa naga kuga magi Yehovah suasua, kuga tum̃amu manimu matadoa masoso tea waina kuga wo maneana suasua; sup̃e maga waina tamamu maga eu madeada suasua waina eu doko taleva kerua ni Noaisara, kite sup̃e maga ki naworawora ni Amor, waina nimu ku doko navanua adeada doko: ma kinau go nasum̃a aginau auga wo magi Yehovah suasua.

¹⁶Go narei eu pasadara, po naga, Ega madu uvea ki gami naga auga toropusi Yehovah, naga auga magi sup̃e p̃ota maga suasua;

¹⁷Nalakena Yehovah Sup̃e anigida, nae e pei tea waina e piragi gida go tamagida maga tu sake m̃elu dua ki navanua ni Ityipt, m̃elu dua ki nasum̃a ni navei‐naviti‐ana, po mari navaivaiana warua maga wanogoe namatagida maga, po pavaigoro gida napua mamau waina tu surata pae asa, go m̃aleoputo ni narei mamau puti waina tu liu ra pano m̃aleoputo kakada:

¹⁸Go Yehovah e kopasi lua pa dua ki naraegida narei mamau puti, naworawora ni Amor waina eu doko navanua doko: go kinami ma auga wo magi Yehovah suasua; nalakena nae e pei Sup̃e anigida.

¹⁹Go Yoshua e noa ki narei, e naga, Ku da mariatae magi Yehovah suasua mau; nalakena nae e pei Sup̃e tapu sikai; nae e pei Sup̃e totowo kasua sikai; ega wo da soki natapiriana animu maga go namarinaleosaana animu maga mau.

²⁰Nalakena kuga wo doropusi Yehovah, po magi sup̃e p̃ota maga suasua, go ega wo dum̃ana doa e po mari sa ki mu, po mari puoli ki mu, edaku ki e mari m̃ata ki sua mu.

²¹Go narei eu noa ki Yoshua, eu naga, Ee; ma auga wo magi Yehovah suasua.

²²Go Yoshua e noa ki narei, e naga, Nimu ku pei tea noasokisoki maga dum̃amu dip̃a mu naga nimu ku dum̃amu manimu matadoa Yehovah, naga kuga maneana suasua. Go eu naga, Au pei tea noasokisoki maga.

²³Go e naga, Nalakena tea wanogoe kuga mari puoli ki sup̃e p̃ota maga waina eu doko m̃aleoputo kakamu, go kuga kerea ki nap̃op̃omu paki Yehovah, Sup̃e ki Israel.

²⁴Go narei eu noa ki Yoshua, eu naga, Auga wo magi Yehovah Sup̃e aginami suasua, go auga wo dogo parati ki nadaleona.

²⁵Go Yoshua e mari navasasokiana sikai paki narei naaleatia wanogoe, po madeada lawo ki natawonakiana sikai go navasap̃otaeana sikai Shekem.

²⁶Go Yoshua e midiri navasaana maga wanogoe tusi ni nawotaeana ki Sup̃e, go e dape vatu warua sikai, po sike lawo ki nia tokora wanogoe etano ni oak waina e doko pisari tokora tapu ki Yehovah.

²⁷Go Yoshua e noa ki narei mamau, e naga, Kuga leo, vatu waia ega wo pei tea noasokisoki sikai dip̃a gida; nalakena nae e dogo navasaana mamau puti ki Yehovah waina e pasa ki gida asa: go ega wo pei tea noasokisoki sikai dip̃a mu, ku pe vasagoro Sup̃e animu.

²⁸Go Yoshua e dip̃aki lua narei, sara naatam̃oli eu sikasikai paki tea veani‐pioli‐kiana adeada maga.

²⁹Go e pakilina edaku ki naleo maga wanogoe, naga Yoshua natu ni Nun, tea suasua ki Yehovah, e mate, e pei tea ni natau p̃onotia sikai rualima takuna sikai.

³⁰Go eu ova ki nia e one kokoi ni tea veani‐pioli‐kiana aneana ni Timnathserah, waina e doko navanua ni tava ki Efraim, taleva ni north ni tava ni Caash.

³¹Go Israel e magi Yehovah suasua naaleatia mamau puti ki Yoshua, go naaleatia mamau puti ki tea matua maga waina eu mauri doko parau doko edaku ki Yoshua, go waina eu atae nawosiana mamau ki Yehovah, waina e magi Israel mari a.

³²Go navatu maga ni Yosef, waina Israel natuna maga eu dape ra pae Ityipt sake umai, eu ova ki da eu one Shekem, eu one matele ni vanua waina Yakob e pakatovi a paki Hamor natuna maga Shekem tamana ki matele ni m̃ane p̃onotia sikai: go eu po pei tea veani‐pioli‐kiana ki Yosef natuna maga.

³³Go Eleasar natu ni Aaron e mate; go eu ova ki nia e one tava ki natuna Finehas, waina e pei tea vituakiana paki nia doko navanua ni tava ki Efraim.