Read Nguna Togoa Etafe North YOSHUA 3 Bible Online

YOSHUA 3 - Nguna Togoa Etafe North bible

YOSHUA 3

¹Go Yoshua e duleana malip̃ogi loaloa, go eu surata m̃elu dua ki Shittim pano, po umai paki Yordan, nae go Israel natuna mamau puti; go eu m̃enaki tokora wanogoe e pea ki eu duagoto.

²Go e pakilina ragi waina naaleatia dolu eu nopu, naga tea maraki maga eu surata duaduru pasara m̃aleoputo ni tokora ni nam̃enakiana;

³Go eu dip̃aki narei, po naga, Ragi waina kuga wo punusi areka ni navasasokiana ki Yehovah Sup̃e animu, go tea viri maga tea ni naworawora ni Levi eu do pauvausi a, go nimu kuga m̃elu dua ki tokora animu, po surata dausi a pano.

⁴Ma namalopa sikai ega toko namawota kakamu ma nae, dapala kubit manu dua pae totowo: kuga ta paki m̃aladigi ki nia mau, naga kuga atae napua waina kuga wo surata pae asa; nalakena ku da pae napua waia pano sala vea mau.

⁵Go Yoshua e noa ki narei, e naga, Kuga tum̃amu mari mu kuga tautau: nalakena matamai Yehovah ega wo mari tea ni namagaana maga m̃aleoputo kakamu.

⁶Go Yoshua e noa ki tea viri maga, e naga, Kuga tape dakati areka ni navasasokiana, go kuga tuagoto pea ki narei. Go eu dape dakati areka ni navasasokiana po surata pea ki narei.

⁷Go Yehovah e noa ki Yoshua, e naga, Naaleatia waia aga wo atulake naga aga mari ko p̃a wo pei tea warua namata maga ni Israel mamau puti, naga euga atae naga, dapala waina a doko sikoti Moses, aga wo doko sikoti ko.

⁸Go nigo p̃a tip̃aki tea viri maga waina eu do pauvausi areka ni navasasokiana, p̃a naga, Ragi waina kuga wo umai paki nadigi ni noai maga ni Yordan, kuga lawodu dorogo doko Yordan.

⁹Go Yoshua e noa ki Israel natuna maga, e naga, Kuga umai paki m̃aladigi, go kuga rogo navasaana maga ki Yehovah Sup̃e animu.

¹⁰Go Yoshua e naga, Kuga wo atae ki tea waia naga Sup̃e mauri e doko m̃aleoputo kakamu, go naga ega wo kopasi po kopasi lua pa dua ki naraemu naworawora ni Kanaan, go naworawora ni Heth, go naworawora ni Hivah, go naworawora ni Peris, go naworawora ni Circash, go naworawora ni Amor, go naworawora ni Yebus.

¹¹Kuga leo, areka ni navasasokiana ki Nawota ni maramana mamau e do duagoto pea ki mu paki Yordan.

¹²Go ragi waia kuga tum̃amu manimu piragi naatam̃oli rualima sikai tamate dua m̃elu naworawora maga ni Israel, naatam̃oli sikasikai agi naworawora sikasikai sarasara ra.

¹³Go ega wo pakilina, ragi waina nam̃ele maga ni natua maga ni tea viri maga waina eu do pauvausi areka ki Yehovah, Nawota ni maramana mamau, euga wo lawodu dorogo noai maga ni Yordan, naga noai maga ni Yordan euga wo pei tea taeluaana, noai maga waina eu siwo pae elagi umai; go euga wo lawodu pei taua sikai.

¹⁴Go e pakilina, ragi waina narei eu m̃elu dua ki tap̃aup̃au adeada maga pano, naga euga tuagoto Yordan, go tea viri maga waina eu do pauvausi areka ni navasasokiana eu pea ki narei;

¹⁵Go ragi waina tea maga waina eu do pauvausi areka eu rumai paki Yordan, go natua maga ni tea viri maga waina eu do pauvausi areka, eu pei tea pupugiana nadigi ni noai, (go Yordan e puragoro natavaaki kakana mamau puti naaleatia mamau puti ni ragi ni natagaukotoviana,)

¹⁶Naga noai maga waina eu pae elagi siwo umai eu lawodu, po duleana pei taua sikai, eu madu uvea, pisari Adam, natokoana waina e doko pisari Sarethan: go tea maga waina eu siwo pano paki natasi ni Arabah, Natasi ni Natasimena, eu pei tea taelua‐puti‐ana: go narei eu duagoto leana dip̃a Yeriko.

¹⁷Go tea viri maga waina eu do pauvausi areka ni navasasokiana ki Yehovah, eu lawodu kasua natano garagara m̃aleoputo ni Yordan, go Israel mamau puti eu duagoto pae natano garagara, pa pa nalauna mamau eu duagoto puti Yordan.