Read Nguna Togoa Etafe North YOSHUA 4 Bible Online

YOSHUA 4 - Nguna Togoa Etafe North bible

YOSHUA 4

¹Go e pakilina, ragi waina nalauna mamau eu duagoto puti Yordan, naga Yehovah e noa ki Yoshua, e naga,

²Kuga tum̃amu manimu piragi naatam̃oli rualima sikai tamate dua m̃elu narei, naatam̃oli sikasikai m̃elu naworawora sikasikai sarasara ra,

³Go p̃a tip̃aki da, p̃a naga, Kuga tum̃amu manimu dape m̃elu dua ki tokora waia, m̃elu dua ki m̃aleoputo ni Yordan, m̃elu dua ki tokora waina natua maga ni tea viri maga eu lawodu kasua asa, vatu rualima sikai tamate dua, go kuga tapetape ra duagoto sikoti mu, go kuga toropusi ra tokora ni nam̃enakiana, waina kuga wo m̃enaki asa nap̃ogiana waia.

⁴Go Yoshua e soso naatam̃oli rualima sikai tamate dua, waina e pasa dawona ki sua ra ni Israel natuna maga, naatam̃oli sikasikai m̃elu naworawora sikasikai sarasara ra:

⁵Go Yoshua e noa ki da, e naga, Kuga tuagoto pea ki areka ki Yehovah Sup̃e animu paki m̃aleoputo ni Yordan, go kuga tum̃amu dape dakati vatu sikasikai euga sarasara mu sake paki napaumu, euga vae naveveana ni naworawora maga ni Israel natuna maga:

⁶Naga tea wanogoe ega vei navaivaiana sikai m̃aleoputo kakamu, ragi waina natumu maga euga wo pusuusu ragi edaku, po naga, Vatu maga waia eu manimu pei nasava?

⁷Go kuga wo noa ki da, kuga wo naga, Nalakena noai maga ni Yordan eu pei tea taeluaana pa dua ki narae ni areka ni navasasokiana ki Yehovah; ragi waina e duagoto Yordan, noai maga ni Yordan eu pei tea taeluaana: go vatu maga wanogoe euga wo magi Israel natuna maga pei namidoakilagati‐ana sikai pa pa ega tu du po du mau du.

⁸Go Israel natuna maga eu mari dapala nogoe, dapala waina Yoshua e pitip̃aki asa, go eu dape dakati vatu rualima sikai tamate dua m̃elu dua ki m̃aleoputo ni Yordan, dapala waina Yehovah e pasa ki Yoshua asa, pae naveveana ni naworawora ni Israel natuna maga; go eu dapetape ra duagoto sikoti ra paki tokora waina eu m̃enaki asa, po doropusi ra tokora wanogoe.

⁹Go Yoshua e sike lawo ki vatu rualima sikai tamate dua m̃aleoputo ni Yordan, tokora waina natua maga ni tea viri maga waina eu do pauvausi areka ni navasasokiana eu lawodu asa: go eu doko tokora wanogoe, pa pa paki naaleatia waia.

¹⁰Go tea viri maga waina eu do pauvausi areka eu lawodu m̃aleoputo ni Yordan, pa pa sara naleo eu pei tea mari‐suana waina Yehovah e dip̃aki Yoshua naga ega vasa ki narei asa, dapala tea mamau puti waina Moses e dip̃aki Yoshua asa: go narei eu mari m̃araverave po duagoto.

¹¹Go e pakilina, ragi waina narei mamau eu duagoto puti, naga areka ki Yehovah e duagoto, go tea viri maga, narae ni narei.

¹²Go Reuben natuna maga, go Cad natuna maga, go namagovai ni naworawora ni Manasseh, eu duagoto pua nalikau maga pea ki Israel natuna maga, dapala waina Moses e pasa ki da asa:

¹³Dapala tivilia pati tea mari‐matakiana maga raki navakalo eu duagoto narae ni Yehovah paki navakalo, paki malo matemate maga ni Yeriko.

¹⁴Naaleatia wanogoe Yehovah e mari Yoshua e pei tea warua namata maga ni Israel mamau puti; go eu matau ki nia, dapala waina eu matau ki Moses naaleatia mamau puti ni namauriana aneana.

¹⁵Go Yehovah e noa ki Yoshua,

¹⁶e naga, P̃a tip̃aki tea viri maga waina eu do pauvausi areka ni nanoasokisokiana, naga euga sake m̃elu dua ki Yordan umai.

¹⁷Go Yoshua e dip̃aki tea viri maga, e naga, Kuga sake m̃elu dua ki Yordan umai.

¹⁸Go e pakilina, ragi waina tea viri maga waina eu do pauvausi areka ni navasasokiana ki Yehovah eu sake sua m̃elu dua ki m̃aleoputo ni Yordan umai, go nam̃ele maga ni natua maga ni tea viri maga eu pei tea vaku‐dakati‐ana paki natano garagara, naga noai maga ni Yordan eu liliu paki tokora adeada, dakiusi sala vea, po pano puragoro natavaaki kakana mamau puti.

¹⁹Go narei eu sake m̃elu dua ki Yordan umai, naaleatia kerualima ni atelagi vea, po m̃enaki Cilcal, taleva ni elo sake ni Yeriko.

²⁰Go vatu rualima sikai tamate dua wanogoe, waina eu dape ra m̃elu dua ki Yordan, Yoshua e sike lawo ki da Cilcal.

²¹Go e noa ki Israel natuna maga, e naga, Ragi waina natumu maga euga wo pusuusu paki tamada maga ragi edaku, po naga, Vatu maga waia eu pei nasava?

²²Go kuga wo mari natumu maga euga atae, kuga wo naga, Israel e duagoto Yordan waia natano garagara.

²³Nalakena Yehovah Sup̃e animu e mari noai maga ni Yordan waia eu garagara pa dua ki naraemu, pa pa ku duagoto sua, dakiusi waina Yehovah Sup̃e animu e mari a paki Natasi ni Nam̃om̃o, waina e mari a e garagara pa dua ki naraegami, pa pa au duagoto sua;

²⁴Naga narei mamau puti ni maramana euga atae nam̃elearu ni Yehovah, naga nae e kasua; naga kuga matau ki Yehovah Sup̃e animu naaleatia mamau puti.