Read Nguna Togoa Etafe North YOSHUA 6 Bible Online

YOSHUA 6 - Nguna Togoa Etafe North bible

YOSHUA 6

¹(Go Yeriko e kokoro po pei tea kokoroana nalakena Israel natuna maga: te naata e da dave mau go te naata e da sili mau.)

²Go Yehovah e noa ki Yoshua, e naga, P̃a vunusi, a po pitua ki Yeriko paki nam̃elearum̃a, go ki nawota kakana, go ki naatam̃oli marimatua maga ni navakalo.

³Go kuga taliviri ki natokoana, naatam̃oli mamau puti ni navakalo, kuga taliviri ki nia paka sikai. P̃a mari ega tapala nogoe naaleatia latesa.

⁴Go tea viri larua euga vuati paiga larua ni napati ni nap̃au ni shiip anoai euga vea ki areka: go naaleatia kelarua kuga taliviri ki natokoana paka larua, go tea viri maga euga sui paiga maga.

⁵Go ega wo doko, naga ragi waina euga wo sui dosagi napati ni nap̃au ni shiip anoai, go ragi waina kuga wo dogo nadaleo ni paiga wanogoe, narei mamau euga rarasa nararasaana warua sikai; go nakoro ni natokoana ega wo dowo pae laketano kakana, go narei euga sake pano, sara naatam̃oli euga vaki kivea ki da.

⁶Go Yoshua natu ni Nun e soso tea viri maga, po noa ki da, e naga, Kuga tape dakati areka ni navasasokiana, go tea viri larua euga vuati paiga larua ni napati ni nap̃au ni shiip anoai euga vea ki areka ki Yehovah.

⁷Go eu noa ki narei, eu naga, Kuga surata pano po daliviri ki natokoana, go tea vuati nalikau maga euga surata pano pea ki areka ki Yehovah.

⁸Go e dapala nogoe, ragi waina Yoshua e pasa ki sua narei, tea viri larua waina eu puati paiga larua ni napati ni nap̃au ni shiip anoai pea ki Yehovah eu surata pano, po sui paiga maga: go areka ni navasasokiana ki Yehovah e dausi ra pano.

⁹Go tea vuati nalikau maga eu surata pea ki tea viri maga waina eu sui paiga maga, go tea viragi saisai ki tea edaku maga eu dausi areka pano, tea viri maga eu do pano po do sui paiga maga.

¹⁰Go Yoshua e dip̃aki narei, po naga, Kuga ta darasa mau, go kuga ta mari nadaleomu ega vei tea rogoana mau, go te navasaana sikai ega ta dave m̃elu dua ki nawokamu mau, pa pa paki naaleatia waina aga wo noa ki mu naga kuga rarasa; go kuga wo darasa.

¹¹Go e mari areka ki Yehovah e daliviri ki natokoana, e daliviri ki nia paka sikai: go eu rumai paki tokora ni nam̃enakiana, po m̃enaki tokora ni nam̃enakiana.

¹²Go Yoshua e duleana malip̃ogi loaloa, go tea viri maga eu dape dakati areka ki Yehovah.

¹³Go tea viri larua waina eu puati paiga larua ni napati ni nap̃au ni shiip anoai eu pea ki areka ki Yehovah eu do surata pano, po do sui paiga maga: go tea vuati nalikau maga eu do pea ki da pano; go tea viragi saisai ki tea edaku maga eu dausi areka ki Yehovah pano, tea viri maga eu do pano po do sui paiga maga.

¹⁴Go naaleatia kerua eu daliviri ki natokoana paka sikai, po liliu paki tokora ni nam̃enakiana: eu mari dapala nogoe naaleatia latesa.

¹⁵Go e pakilina naaleatia kelarua, naga eu duleana malip̃ogi loaloa ragi ni namakotokotoana dapala namariana wanogoe paka larua: ma naaleatia wanogoe eu daliviri natokoana paka larua.

¹⁶Go e pakilina ragi ni sala kelarua, naga tea viri maga eu sui paiga maga, go Yoshua e noa ki narei, e naga, Kuga rarasa; nalakena Yehovah e po dua mu natokoana.

¹⁷Go natokoana ega vei tea vasasakiana, nae go tea mamau puti waina eu doko asa, ki Yehovah: Rahab nagoroi masausara ega masikina mauri, nae go tea mamau puti waina eu sikoti a ekopu ni nasum̃a, nalakena e dasuru ki tea tautauana dua waina tu dip̃aki lua ra.

¹⁸Go nimu kuga tum̃amu pavaigoro mu pa dua ki naleo vasasakiana wanogoe; mase ragi waina ku mari a e pei tea vasasakiana sua, ku pe tape tea vasasakiana seara kakana, po mari taua ni Israel eu pe vei tea vasasakiana, po mari duletulea ki da.

¹⁹Ma silver mamau puti, go kold, go naloriki maga ni brass go ni airon, nara eu pei tea tapu ki Yehovah: euga umai paki ekopu ni nasum̃a ni natauakiana ni naleo wia maga ki Yehovah.

²⁰Go narei eu darasa, go tea viri maga eu sui paiga maga: go e pakilina, ragi waina narei eu dogo nadaleo ni paiga, naga narei eu darasa nararasaana warua sikai, go nakoro e dowo pae laketano kakana, go narei eu sake paki natokoana, sara naatam̃oli eu paki kivea ki da, go eu puati natokoana.

²¹Go eu mari punuvunue tea mamau puti waina eu doko natokoana, naanoai go nagoroi, tea vusavusa go tea matua, go oks, go shiip, go ass, ki nawoka ni lova.

²²Go Yoshua e noa ki naatam̃oli dua waina ero leo pavaraka navanua, e naga, Koroga vaki ekopu ni nasum̃a ki nagoroi masausara waina, go koroga viragi euga tave asa umai nagoroi wanogoe, go tea mamau puti waina e peani ra, ega tapala waina koro pivisa paki nia asa.

²³Go natureai dua wanogoe tea leo pavaraka ero paki ekopu, po piragi paki katama Rahab, go tamana, go p̃ilana, go gorena maga, go naleo mamau puti waina e peani a, go ero piragi paki katama namatarau aneana mamau puti; go ero doropusi ra etaku ni tokora ni nam̃enakiana ki Israel.

²⁴Go eu dap̃ara ki natokoana ki nakapu, go naleo mamau puti waina e doko asa: ma silver, go kold, go naloriki maga ni brass go ni airon eu doropusi ra ekopu ni nasum̃a ni natauakiana ni naleo wia maga ni nasum̃a ki Yehovah.

²⁵Ma Rahab nagoroi masausara, go nasum̃a ki tamana, go tea mamau puti waina e peani ra, Yoshua e mauti ra eu mauri doko; go e doko m̃aleoputo ni Israel doko pa pa paki naaleatia waia; nalakena e dasuru ki tea tautauana dua, waina Yoshua e dip̃aki lua ra naga eroga leo pavaraka Yeriko.

²⁶Go Yoshua e mari ra eu pivisa ragi wanogoe, e naga, Naatam̃oli waina ega wo duleana po davagi natokoana waia Yeriko, ega vei tea vasasakiana narae ni Yehovah: ega wo nadi ki laketano kakana natuna takalapa, go ega wo lawo ki namata‐pua kakana maga natuna takariki.

²⁷Go Yehovah e doko sikoti Yoshua, go narogorogoana kakana e doko usuraki navanua mamau.