Read Nguna Togoa Etafe North YOSHUA 7 Bible Online

YOSHUA 7 - Nguna Togoa Etafe North bible

YOSHUA 7

¹Ma Israel natuna maga eu mari natapiriana sikai nalo ni naleo vasasakiana: nalakena Akan, natu ni Karmi, natu ni Sabdi, natu ni Serah, ni naworawora ni Yudah, e dape tea vasasakiana seara kakana; go namaetoana ki Yehovah e pavaga dip̃a Israel natuna maga.

²Go Yoshua e dip̃aki lua naatam̃oli seara m̃elu dua ki Yeriko paki Ai, waina e doko pisari Beth‐aven, taleva ni elo sake ni Beth‐el, go e noa ki da, e naga, Kuga sake pano po leo pavaraka navanua. Go naatam̃oli maga wanogoe eu sake pano po leo pavaraka Ai.

³Go eu liliu umai punusi Yoshua, po noa ki nia, eu naga, Narei euga ta mamau puti sake pano mau; ma naatam̃oli maga dapala manu dua kite dapala manu dolu euga sake pano po atugi Ai; p̃a ta mari narei mamau euga mawosa paki asa mau; nalakena nara eu pisa maau.

⁴Go narei naatam̃oli maga kakada dapala manu dolu eu sake paki asa pano: go eu sava pa dua ki narae ni naatam̃oli maga ni Ai.

⁵Go naatam̃oli maga ni Ai eu atugi seara kakada eu dapala naatam̃oli rualima dolu tamate latesa: go eu kopasi ra pa dua ki narae ni namata‐pua pa pa paki Sebarim, po atugi ra tokora ni nasiwosiwoana: go nap̃op̃o ni narei e sara, go e po dapala noai.

⁶Go Yoshua e pua p̃orae sugoro aneana maga, po dowo dap̃olosiwo pakitano narae ni areka ki Yehovah pa pa paki ragi melu, nae go tea matua maga ni Israel; go eu doropusi nam̃otam̃ota doko nap̃auda.

⁷Go Yoshua e naga, Ako, Nawota, Yehovah O, ekasana ku piragi narei waia duagoto Yordan umai, naga p̃a vitua ki gami paki nam̃elearu ni naworawora ni Amor, naga p̃a mari gami auga vuoli? Go au pe suasua po doko taleva kerua ni Yordan doko, e pe wia!

⁸A pavara, Nawota O, aga wo noa nasava edaku ki Israel eu po doa nanoada narae ni tea kokona ki da maga?

⁹Nalakena naworawora ni Kanaan, go tea mamau puti waina eu doko navanua euga wo dogo e, go euga wo dalivirigoro gami, go euga wo daelua nagisagami m̃elu dua ki maramana: go p̃a wo magi nagisam̃a waina e p̃arua mari nasava?

¹⁰Go Yehovah e noa ki Yoshua, e naga, P̃a tuleana; ekasana waia nigo ku do dowo dap̃olosiwo?

¹¹Israel e po mari naleo sa: go eu po dapiri navasasokiana aginau waina a dip̃aki da asa: go eu po dape tea vasasakiana seara kakana, go eu po panako, go eu po sorosoro, go eu po doropusi a m̃aleoputo ni naloriki adeada maga.

¹²Go Israel natuna maga eu mari sa lawodu narae ni tea kokona ki da maga, eu doa nanoada narae ni tea kokona ki da maga, nalakena eu po pei tea vasasakiana: ku pe ta mari sa ki tea vasasakiana m̃elu dua ki m̃aleoputo kakamu mau, a pe wo da moro doko sikoti mu mau.

¹³P̃a tuleana, p̃a mari narei euga tautau, go p̃a naga, Kuga tum̃amu mari mu kuga tautau raki matamai: nalakena Yehovah, Sup̃e ki Israel, e noa dapala nea, e naga, Tea vasasakiana sikai e doko m̃aleoputo kakamu, Israel O: ku mari sa lawodu narae ni tea kokona ki mu maga, pa pa kuga wo dape lua sua tea vasasakiana ega m̃elu dua ki mu pano.

¹⁴Go kuga wo pei tea viragiana paki m̃aladigi malip̃ogi pae naworaworamu maga: go ega wo doko, naga naworawora waina Yehovah ega wo puati ra euga umai paki m̃aladigi pae naworada maga; go nawora waina Yehovah ega wo puati ra, euga umai paki m̃aladigi pae nasum̃a maga; go nasum̃a waina Yehovah ega wo puati ra euga umai paki m̃aladigi pae naatam̃oli maga.

¹⁵Go ega wo doko, naga tea waina ega wo pei tea vuatiana sikoti tea vasasakiana ega vei tea tap̃arakiana ki nakapu, nae go tea mamau puti waina e peani ra: nalakena e dapiri navasasokiana ki Yehovah, go nalakena e mari naveilalaana doko Israel.

¹⁶Go Yoshua e duleana malip̃ogi loaloa, po piragi Israel umai paki m̃aladigi pae naworaworada maga; go naworawora ni Yudah eu pei tea vuatiana:

¹⁷Go e piragi nawora ni Yudah umai paki m̃aladigi, go e puati nawora ni Serah: go e piragi nawora ni Serah umai paki m̃aladigi pae naatam̃oli maga; go Sabdi e pei tea vuatiana:

¹⁸Go e piragi nasum̃a aneana umai paki m̃aladigi pae naatam̃oli maga; go Akan, natu ni Karmi, natu ni Sabdi, natu ni Serah, ni naworawora ni Yudah e pei tea vuatiana.

¹⁹Go Yoshua e noa ki Akan, e naga, Natugu, p̃a vitua, a pavara ni ko asa, ki nasamasamaana paki Yehovah, Sup̃e ki Israel, go p̃a mari nanoasaiana paki nia; go p̃a noa ki nau a pavara, tea waina ku mari a; p̃a ta dasuru ki nia paki nau mau.

²⁰Go Akan e pasadara Yoshua, po naga, Lomau kinau a mari naleo sa paki Yehovah, Sup̃e ki Israel, go a mari dapala waia go dapala waia:

²¹Ragi waina a punusi m̃aleoputo ni tea vuti‐lua‐pavakotoana maga sugoro kovagoro sikai ni Sinar tea wia sikai, go shekel p̃onotia dua ni silver, go namena sikai ni kold ni shekel rowogiana rualima lima, ragi wanogoe a matam̃agura ki da, po dape ra: go p̃a leo, eu pei tea tasurukiana natano m̃aleoputo ni tap̃aup̃au aginau, go silver wanogoe e doko etano ki nia.

²²Go Yoshua e dip̃aki lua tea tautauana maga, go eu sava paki tap̃aup̃au wanogoe, go p̃a leo, e pei tea tasurukiana ekopu ni tap̃aup̃au aneana, go silver wanogoe e doko etano ki nia.

²³Go eu dape ra m̃elu dua ki m̃aleoputo ni tap̃aup̃au wanogoe, po dape ra umai paki Yoshua, go paki Israel natuna mamau puti; go eu doropusi ra narae ni Yehovah.

²⁴Go Yoshua go Israel mamau puti sikoti a, eu piragi Akan natu ni Serah, go silver wanogoe, go sugoro kovagoro wanogoe, go namena wanogoe ni kold, go natuna naanoai maga go natuna nagoroi maga, go oks aneana maga, go ass aneana maga, go shiip aneana maga, go tap̃aup̃au aneana, go naleo mamau puti waina e peani ra, go eu piragi ra sake paki nap̃aloa ni Akor pano.

²⁵Go Yoshua e naga, Ekasana ku mari duletulea ki gami? Yehovah ega wo mari duletulea ki‐go naaleatia waia. Go Israel mamau puti eu nadi a ki vatu maga; go eu dap̃ara ki da ki nakapu, go eu nadi ra ki vatu maga.

²⁶Go eu sike daua ki dap̃augoro e taua warua sikai ni vatu maga, pa pa paki naaleatia waia; go Yehovah e maradoa m̃elu dua ki navivitinuana ni namaetoana aneana. Nalakena tea wanogoe nagisa ni tokora wanogoe e pei tea sosoana ki Nap̃aloa ni Akor, pa pa paki naaleatia waia.