Read Nguna Togoa Etafe North YOSHUA 8 Bible Online

YOSHUA 8 - Nguna Togoa Etafe North bible

YOSHUA 8

¹Go Yehovah e noa ki Yoshua, e naga, P̃a ta mataku mau, go p̃a ta m̃anaunau mau: p̃a viragi narei ni navakalo mamau euga sikoti ko, go p̃a tuleana, p̃a sake paki Ai pano: p̃a vunusi, a po pitua ki nawota ni Ai paki nam̃elearum̃a, go narei aneana, go natokoana aneana go natano aneana;

²Go p̃a mari paki Ai go paki nawota kakana ega tapala waina ku mari a paki Yeriko go paki nawota kakana; ma naleo vuti‐lua‐pavakotoana kakana maga, go katel kakana maga, kuga tum̃amu manimu dape pavakoto ara: p̃a manigo lawo ki tea kusugoro maga sikai raki natokoana natakuna.

³Go Yoshua e duleana, go narei mamau ni navakalo, naga euga sake paki Ai pano: go Yoshua e matadoa naatam̃oli tivilia dolu, tea marimatua maga ni navakalo, po dip̃aki lua ra p̃ogi.

⁴Go e dip̃aki da, po naga, Kuga vunusi, nimu kuga kusugoro dip̃a natokoana, nataku ni natokoana: kuga ta paki uvea p̃arua ki natokoana mau, ma kuga mamau puti pei tea marim̃atakiana sua:

⁵Go kinau, go narei mamau waina eu sikoti au, auga wo paki m̃aladigi ki natokoana: go ega wo pakilina, ragi waina euga wo dave umai naga euga sua gami, dapala sala vea, naga auga wo sava pa dua ki naraeda;

⁶Go euga wo dave dausi gami, pa pa auga wo pualua sua ra m̃elu dua ki natokoana pano; nalakena euga wo naga, Eu sava pa dua ki naraegida dapala sala vea; go auga wo sava pa dua ki naraeda:

⁷Go nimu kuga wo duleana m̃elu dua ki nakusugoroana pano, po dape natokoana: nalakena Yehovah Sup̃e animu ega wo pitua ki nia paki nam̃elearumu.

⁸Go ega wo doko, ragi waina kuga wo puati sua natokoana, naga kuga tokoni natokoana ki nakapu; kuga mari ega tapala navasaana ki Yehovah: kuga vunusi, a po dip̃aki mu asa.

⁹Go Yoshua e dip̃aki lua ra: go eu paki tokora ni nakusugoroana pano, po doko namawota ni Beth‐el go ni Ai, taleva ni elo musu ni Ai: ma Yoshua e m̃enaki nap̃ogiana wanogoe m̃aleoputo ni narei.

¹⁰Go Yoshua e duleana malip̃ogi loaloa, po peve saisai ki narei, po sake pano, nae go tea matua maga ni Israel eu pea ki narei paki Ai pano.

¹¹Go narei mamau, naatam̃oli maga ni navakalo waina eu sikoti a, eu sake pano, po paki m̃aladigi, po umai paki narae ni natokoana, po m̃enaki taleva ni north ni Ai: go nap̃aloa e doko namawota kakana go ni Ai.

¹²Go e pila lua naatam̃oli maga eu dapala manu lima, po lawo ki da eu kusugoro namawota ni Beth‐el go ni Ai, taleva ni elo musu ni natokoana.

¹³Go eu lawo ki narei, taua mamau ni navakalo waina eu doko taleva ni north ni natokoana, go tea kusugoro adeada maga waina eu doko taleva ni elo musu ni natokoana; go nap̃ogiana wanogoe Yoshua e paki m̃aleoputo ni nap̃aloa pano.

¹⁴Go e pakilina, ragi waina nawota ni Ai e p̃unusi a, naga eu mari m̃araverave po duleana malip̃ogi loaloa, go naatam̃oli maga ni natokoana eu dave naga euga sua Israel paki navakalo, nae go narei aneana mamau, tokora ni natatutakiana narae ni Arabah; ma nae e da atae mau naga tea kusugoro maga sikai eu doko raki nia nataku ni natokoana.

¹⁵Go Yoshua go Israel mamau puti eu mari dapala eu pei tea marimatuakiana naraeda, go eu sava pae napua waina e paki masop̃alo pano.

¹⁶Go narei mamau waina eu doko natokoana, eu pei tea soso‐saisai‐kiana naga euga sava dausi ra: go eu sava dausi Yoshua, po pei tea vuati‐lua‐ana m̃elu dua ki natokoana.

¹⁷Go naatam̃oli sikai e da doko Ai go Beth‐el mau, waina e da dave dausi Israel mau: go eu doropusi natokoana e dap̃olaga doko, po sava dausi Israel.

¹⁸Go Yehovah e noa ki Yoshua, e naga, P̃a sai ki naio waina e doko nam̃elearum̃a paki Ai, nalakena aga wo pitua ki nia paki nam̃elearum̃a. Go Yoshua e sai naio waina e doko nam̃elearuna paki natokoana.

¹⁹Go tea kusugoro maga eu duleana m̃araverave m̃elu dua ki tokora adeada, go eu sava ragi waina e sai ki nam̃elearuna, go eu sili paki natokoana, po puati a; go eu mari m̃araverave po dokoni natokoana ki nakapu.

²⁰Go naatam̃oli maga ni Ai eu leo kitaku, po punusi, go kuga leo, naasua ni natokoana e sake paki nakoroatelagi pano, go eu da peani nakasuaana naga euga sava paki nea kite paki nana mau: go narei waina eu sava paki masop̃alo pano, eu dum̃ada doa ra paki tea sava dausi maga.

²¹Go ragi waina Yoshua go Israel mamau puti eu punusi naga tea kusugoro maga eu puati sua natokoana, go naga naasua ni natokoana e sake, ragi wanogoe eu liliu po mari punue naatam̃oli maga ni Ai.

²²Go tea p̃ota maga eu dave m̃elu dua ki natokoana naga euga sua ra; go eu doko m̃aleoputo ni Israel, seara eu doko taleva waia go seara eu doko taleva wanana, go eu atugi ra, pa pa eu da madeada doropusi tea sikai waina e mauri doko kite waina e sava pano mau.

²³Go nawota ni Ai eu puati a e mauri, po piragi a umai punusi Yoshua.

²⁴Go e pakilina, ragi waina Israel eu mari punue sua tea mamau puti waina eu doko Ai namalasi, go masop̃alo waina eu sava dausi ra asa, go eu mamau puti dowo ki nawoka ni lova pa pa eu nopu, naga Israel mamau puti eu liliu paki Ai, po atugi a ki nawoka ni lova.

²⁵Go tea mamau puti waina eu dowo naaleatia wanogoe, naanoai maga go nagoroi maga, eu pei tivilia sikai go manu dua, naatam̃oli mamau puti ni Ai.

²⁶Nalakena Yoshua e da dosagi liliua ki nam̃elearuna mau, waina e sai ki naio asa, pa pa e mari punuvunue sua tea mamau puti waina eu doko Ai.

²⁷Ma katel maga go naleo vuti‐lua‐pavakotoana maga ni natokoana wanogoe Israel eu dum̃ada madeada dape pavakoto ara, dapala navasaana ki Yehovah waina e dip̃aki Yoshua asa.

²⁸Go Yoshua e dap̃ara ki Ai, po mari a e pei taua sikai pa pa ega tu du po du mau du, go maso maladi sikai pa pa paki naaleatia waia.

²⁹Go nawota ni Ai e sara ki nia e dau nakau dau pa pa paki ragi melu: go ragi waina elo e musu Yoshua e pitip̃aki, go eu dape nap̃atokona siwo m̃elu dua ki nakau, po nadi ki nia pisari namasova ni namata‐pua ni natokoana, po sike daua ki dap̃augoro e taua warua sikai ni vatu maga, waina e doko pa pa paki naaleatia waia.

³⁰Ragi wanogoe Yoshua e davagi wede ni naviriana sikai agi Yehovah, Sup̃e ki Israel, doko tava Ebal,

³¹Dapala waina Moses tea suasua ki Yehovah e dip̃aki Israel natuna maga asa, dapala waina e pei tea midiriana tusi ni nawotaeana ki Moses, wede ni naviriana sikai ni vatu mamau maga, waina te naata e da sike te airon paki ara mau: go eu pitua ki naviriana tap̃arakiana maga asa paki Yehovah, po mari punue naviriana maga ni natam̃ateana.

³²Go e midiri tokora wanogoe doko vatu maga tea vataka sikai ni nawotaeana ki Moses, waina e midiri a, narae ni Israel natuna maga.

³³Go Israel mamau puti, go tea matua adeada maga, go tea maraki adeada maga, go tea vasap̃otae adeada maga, eu lawodu taleva waia go taleva wanana ni Areka, narae ni tea viri maga naworawora ni Levi, waina eu pauvausi areka ni navasasokiana ki Yehovah, nam̃enaki dapala naatatoko; namagovai kakada paki kivea ni tava Cerisim, go namagovai kakada paki kivea ni tava Ebal; dapala waina Moses tea suasua ki Yehovah e pitip̃aki sua asa, naga euga vasap̃ia ki narei ni Israel ega vea.

³⁴Go edaku ki tea wanogoe e peve navasaana mamau puti ni nawotaeana, navasap̃iakiana go navasasakiana, dapala tea mamau puti waina e pei tea midiriana tusi ni nawotaeana.

³⁵Navasaana sikai e da doko mau ni tea mamau puti waina Moses e pitip̃aki asa, waina Yoshua e da peve a mau narae ni nasaisaiana mamau ni Israel, go nagoroi maga go piakirikiri maga, go nam̃enaki maga waina eu surata m̃aleoputo kakada.