Read Nguna Togoa Etafe North YOSHUA 9 Bible Online

YOSHUA 9 - Nguna Togoa Etafe North bible

YOSHUA 9

¹Go e pakilina, ragi waina nawota mamau puti waina eu doko taleva kerua ni Yordan, navanua ni tava, go navanua ni etano, go navanua ni elau mamau ni natasi warua paki kivea ni Lebanon, naworawora ni Heth, go naworawora ni Amor, naworawora ni Kanaan, naworawora ni Peris, naworawora ni Hivah, go naworawora ni Yebus, eu dogo e;

²Naga eu dum̃ada saisai ki da, naga euga mari navakalo paki Yoshua go paki Israel, nap̃atokoda e sikai maau asa.

³Ma ragi waina naka ni Cibeon eu dogo tea waina Yoshua e mari a paki Yeriko go paki Ai,

⁴Nara ma eu mari pae namarimanumatuaana, po pano po mari oli tea tautauana maga, po dape sak tuai maga paki ass adeada maga, go nawili ni waine tuai maga, waina eu mawora po pei tea otigoroana;

⁵Go nam̃elevasiana tuai maga go tea usuvakiana eu doko nam̃eleda maga, go sugoro tuai maga eu doko ara; go bred mamau puti ni navinaga kaniana adeada e garagara go e pusivusiga.

⁶Go eu pano punusi Yoshua paki tokora ni nam̃enakiana ni Cilcal, po noa ki nia, go ki naatam̃oli maga ni Israel, eu naga, Au pae navanua ni uvea umai: nalakena tea wanogoe kuga mari navasasokiana sikai paki gami.

⁷Go naatam̃oli maga ni Israel eu noa ki naworawora ni Hivah, eu naga, Mase nimu ku doko m̃aleoputo kakagami doko; go auga wo mari navasasokiana sikai paki mu dapale sava?

⁸Go eu noa ki Yoshua, eu naga, Kinami au pei tea suasua anigo maga. Go Yoshua e noa ki da, e naga, Nimu ku pei sei? Go ku pae esava umai?

⁹Go eu noa ki nia, eu naga, Tea suasua anigo maga eu pae navanua ni uvea sa umai nalakena nagisa ni Yehovah Sup̃e anigo: nalakena au dogo narogorogoana kakana, go tea mamau puti waina e mari a Ityipt,

¹⁰Go tea mamau puti waina e mari a paki nawota dua ki naworawora ni Amor, waina eu doko taleva kerua ni Yordan, paki Sihon nawota ni Heshbon, go paki Ok nawota ni Bashan, waina e doko Ashtaroth.

¹¹Go tea matua aginami maga go tea mamau puti waina eu doko navanua aginami eu noa ki gami, eu naga, Kuga tape navinaga kaniana ega toko nam̃elearumu raki napua, go kuga vano naga kuga sua ra, go kuga noa ki da, kuga naga, Kinami au pei tea suasua animu maga: go ragi waia kuga mari navasasokiana sikai paki gami.

¹²Bred aginami waia navinaga kaniana ni napua, au dape a e pivitinu m̃elu nasum̃a aginami maga naaleatia waina au dave pano naga auga umai punusi mu; go ragi waia, p̃a leo, e garagara, go e po pusivusiga:

¹³Go nawili ni waine maga waia, waina au pakavuro ra, eu pau; go p̃a leo, eu mawora: go sugoro aginami maga go nam̃elevasiana aginami maga waia eu po duai nalakena navarauana warua ni napua.

¹⁴Go eu piragi soki naatam̃oli maga wanogoe nalakena navinaga kaniana adeada, go eu da pusuusu paki nawoka ni Yehovah asa mau.

¹⁵Go Yoshua e mari natam̃ateana paki da, po mari navasasokiana sikai paki da, naga ega mauti ra euga mauri doko: go tea maraki maga ni navata eu pivisa paki da.

¹⁶Go e pakilina ragi waina naaleatia dolu eu nopu edaku ki eu mari navasasokiana sikai paki da, naga eu dogo naga nara eu pei tea ni m̃aladigi ki da, go naga nara eu doko m̃aleoputo kakada.

¹⁷Go Israel natuna maga eu surata pano, po umai paki natokoana adeada maga naaleatia ketolu. Go natokoana adeada maga eu pei Cibeon, go Kefirah, go Beeroth, go Kiriath‐yearim.

¹⁸Go Israel natuna maga eu da atugi ra mau, nalakena tea maraki maga ni navata eu pivisa sua paki da pae Yehovah, Sup̃e ki Israel. Go navata mamau eu daururu dip̃a tea maraki maga.

¹⁹Ma tea maraki mamau puti eu noa ki navata mamau, eu naga, Kinami au pivisa paki da pae Yehovah, Sup̃e ki Israel: go ragi waia tu da mariatae kisidogo ra mau.

²⁰Tuga mari tea waia paki da, po mauti ra euga mauri doko, go namaetoana ega wo da doko gida mau nalakena navivisaana waina au pivisa paki da asa.

²¹Go tea maraki maga eu noa ki da, eu naga, Euga mauri doko: go eu po pei tea tae nakapu maga go tea vautui noai maga agi navata maga; dapala waina tea maraki maga eu pasa ki da asa.

²²Go Yoshua e soso ra, go e pasa ki da, po naga, Ekasana ku soro gami, po naga, Kinami au madu uvea p̃arua ki mu, ragi waina nimu ku doko m̃aleoputo kakagami?

²³Nalakena tea wanogoe nimu ku pei tea vasasakiana, go kuga wo pei tea suasua maga ega ta makoto mau, go tea tae nakapu maga, go tea vautui noai maga agi nasum̃a ki Sup̃e aginau.

²⁴Go eu pasadara Yoshua, po naga, Nalakena e pei tea noasaisokisokiana paki tea suasua anigo maga, naga Yehovah Sup̃e anigo e dip̃aki tea suasua aneana Moses naga ega tua mu navanua mamau, go naga ega mari sa ki tea mamau puti waina eu doko navanua pa dua ki naraemu; go au magi namauriana aginami mataku p̃arua nalakena nimu, go au po mari naleo waia.

²⁵Go ragi waia, p̃a leo, kinami au doko nam̃elearum̃a: dapala waina e p̃ia go dapala waina e leana doko namatam̃a naga p̃a mari a paki gami asa, p̃a mari a.

²⁶Go e mari dapala nogoe paki da, po pualua ra m̃elu dua ki nam̃elearu ni Israel natuna maga, go eu da mari punue ra mau.

²⁷Go Yoshua e mari ra naaleatia wanogoe eu pei tea tae nakapu maga go tea vautui noai maga agi navata, go agi wede ni naviriana ki Yehovah, pa pa paki naaleatia waia, tokora waina ega wo matadoa e.