Read Nguna Togoa Etafe North 2 PAKI TEA NI THESSALONICA 1 Bible Online

2 PAKI TEA NI THESSALONICA 1 - Nguna Togoa Etafe North bible

2 PAKI TEA NI THESSALONICA 1

¹Paulo, go Silvano, go Timotheo au midiri paki ekalesia ni tea ni Thessalonika maga waina eu doko Sup̃e Tamagida go Nawota Yesu Kristo.

²Nasaup̃iaana ega vei animu go natam̃ateana m̃elu Sup̃e Tamagida go Nawota Yesu Kristo.

³E one gami one naga auga vasadodom̃ata ki Sup̃e sara ragi nalo kakamu, tai maga, dakiusi waina e p̃ia, nalakena nasaralomauana animu e do disu p̃arua liu, go nadodomiana ki sara naata kakamu mamau puti dum̃amu paki mu e p̃arua;

⁴dapala waina kinami au do pakavakae mu doko ekalesia maga ki Sup̃e nalakena nasokiana animu go nasaralomauana animu doko nakopalele‐mu‐ana maga mamau puti go nariesokiana maga waina ku soki ra.

⁵Waina e pei navaivaiana lina sikai ni navasap̃otaeana leana ki Sup̃e; naga kuga vei tea midoakiana naga ku p̃ia ki namarakiana ki Sup̃e, waina ku sua tea sa asa:

⁶e pe vei tea leana lomau sikoti Sup̃e naga ega vitua dip̃a ki nariesokiana paki tea maga waina eu diesoki mu,

⁷go paki mu waina ku pei tea riesokiana ki namaromaroana sikoti gami, ragi ni navakilinaana ki Nawota Yesu pae nakoroatelagi umai nara ma agelo maga ni nakasuana aneana pilake soro ni nakapu,

⁸doko do pitua ki nasikosikoana paki tea maga waina eu da atae Sup̃e mau, go paki tea maga waina eu da dogo parati ki narogorogoana wia ki Nawota anigida Yesu mau:

⁹naatam̃oli maga waina euga wo sua nasikoana, namarisakiana waina ega wo du mau du pa dua ki narae ni Nawota go pa dua ki nasamasamaana ni nakasuaana aneana,

¹⁰ragi waina ega wo umai naga ega vei tea samasamaniana doko tea tautau aneana maga, go naga ega vei tea ni namagaana doko tea maga mamau puti waina eu saralomau (nalakena nanoasokisokiana aginami paki mu e pei tea saralomauana) naaleatia wanogoe.

¹¹Go naga ega tapala nogoe au do manimu dapasavasa sara ragi, naga Sup̃e anigida ega midoa ki mu naga ku p̃ia ki nasoso‐mu‐ana, go naga ega vakavuro sara namidoakim̃atakiana ni nawiaana go sara nawosiana ni nasaralomauana, ki nakasuaana;

¹²naga nagisa ni Nawota anigida Yesu ega vei tea samasamaniana doko mu, go naga nimu kuga vei tea samasamaniana doko asa, ega vae nasaup̃iaana ki Sup̃e anigida go ki Nawota Yesu Kristo.