Read Nguna Togoa Etafe North 2 PAKI TEA NI THESSALONICA 2 Bible Online

2 PAKI TEA NI THESSALONICA 2 - Nguna Togoa Etafe North bible

2 PAKI TEA NI THESSALONICA 2

¹Ma au pavarani mu, tai maga, nalo ni naumaiana ki Nawota anigida Yesu Kristo, go ni nasaisaiana anigida paki nia,

²naga kuga ta pei tea varivariakiana m̃araverave m̃elu dua ki namidodoana animu mau, go naga kuga ta mataku mau, pae naatana, kite pae navasaana, kite pae epistole dapala e pae gami, dapala naga naaleatia ki Nawota e doko ragi waia;

³te naata ega ta pilasurue mu dapala vatuna mau: nalakena ega wo da umai mau pa pa nam̃elupanoana ega vea umai, go naatam̃oli ni namarinaleosaana ega vei tea maripakasakiana, natu ni namatepuoliana,

⁴tea waina e dugoro po dum̃ana dape a pakilagi dap̃au tea maga mamau puti waina eu pei tea sosoana ki Sup̃e kite waina eu pei tea lotukiana: dapala waina nae e dasake ekopu ni nasum̃a tapu ki Sup̃e, e dum̃ana pisei ki nia naga e pei Sup̃e.

⁵Ku da midoa ki nia, naga, ragi waina a ko doko sikoti mu, a noa ki mu tea maga wanogoe kite?

⁶Go ragi waia ku atae tea waina e do puagoro, naga nae ega vei tea maripakasakiana ragi aneana.

⁷Nalakena p̃aia ni nasigisigileoana e do p̃osiwosi sua: ma sikai e doko waina e do puagoro ragi waia pa pa ega wo pei tea tapeluaana m̃elu dua ki m̃aleoputo.

⁸Go ragi wanogoe tea sigisigileo ega wo pei tea maripakasakiana, waina Nawota Yesu ega wo mari punue a ki namero ni nawokana, po maripuoli ki nia ki navakilinaana ni naumaiana aneana;

⁹nae waina naumaiana aneana e pae nawosiwosiana ki Satan doko sara nakasuaana go sara navaivaiana go sara tea ni namagaana ni nasorosoroana,

¹⁰go doko sara nasurueana ni namarinaleotageleana magi tea maga waina eu do mate puoli; nalakena eu da dape nadodomiana ni nalomauana mau, naga euga vei tea mautipauriana.

¹¹Go nalakena tea wanogoe Sup̃e e do dip̃aki lua paki da nawosiwosiana sikai ni namidoakipeleana, naga euga saralomau nasorosoroana:

¹²naga euga mamau puti pei tea vasap̃otaeana waina eu da saralomau nalomauana mau, ma eu midoakim̃ata ki namarinaleotageleana.

¹³Ma e one gami one naga auga vasadodom̃ata ki Sup̃e sara ragi nalo kakamu, tai maga tea dodomiana pae Nawota, nalakena Sup̃e e matadoa mu pae ragi vea pa pa paki namautipauriana doko namaridautaukiana ki Naatana go nasaralomauana ni nalomauana;

¹⁴waina e soso mu paki asa pae narogorogoana wia aginami, paki nataluaana ni nasamasamaana ki Nawota anigida Yesu Kristo.

¹⁵Nalakena tea wanogoe, tai maga, kuga lawodu, go kuga tape soki navasaana vituakiana maga waina ku pei tea vasapiseikiana ara, e pe vae navasaana, kite e pe vae epistole aginami.

¹⁶Ma Nawota anigida Yesu Kristo nae, go Sup̃e Tamagida waina e dodomi gida po dua gida navakavakaleana waina e du mau du go naleogoroana wia doko nasaup̃iaana,

¹⁷eroga vasapakavakale nap̃op̃omu po lawosoki mu doko sara nawosiana wia go sara navasaana wia.