Read Nguna Togoa Etafe North 2 PAKI TEA NI THESSALONICA 3 Bible Online

2 PAKI TEA NI THESSALONICA 3 - Nguna Togoa Etafe North bible

2 PAKI TEA NI THESSALONICA 3

¹Tea edaku, tai maga, kuga to maginami dapasavasa, naga navasaana ki Nawota ega sava po pei tea samasamaniana, ega takiusi waina e doko sikoti mu;

²go naga auga vei tea vualuaana m̃elu dua ki naatam̃oli maga waina eu midoaki sap̃o go waina eu sigisigileo nalakena tea maga mamau puti eu da peani nasaralomauana mau.

³Ma Nawota e pei lomau, waina ega wo lawo soki mu, po pavaigoro mu m̃elu dua ki tea sigisigileo.

⁴Go au pavatu doko Nawota nalo kakamu, naga ku do mari go naga kuga wo do mari tea maga waina au dip̃a ki mu ara.

⁵Go Nawota ega viragi nap̃op̃omu euga vaki nadodomi‐Sup̃eana, go paki nasokiana ki Kristo.

⁶Ma au dip̃aki mu, tai maga, doko nagisa ni Nawota anigida Yesu Kristo, naga kuga tum̃amu suka ki mu m̃elu dua ki sara taigida waina eu surata noginogi, go e da pae navasaana vituakiana mau waina eu dape a kiagami.

⁷Nalakena ku dum̃amu atae dapala waina e one mu one naga kuga mari oli gami: nalakena au da mari noginogi m̃aleoputo kakamu mau;

⁸go au da gani m̃oli ki navinaga ki te naata mau, ma doko nawosimawosaana go nawosipitinuana, au do p̃osiwosi p̃ogi go aleati, naga auga ta pei tea madaga one te naata kakamu mau:

⁹e da pei nalakena au da peani naveinawotaana kakana mau, ma naga auga tum̃agami mari gami auga manimu pei naatulakeana sikai, naga kuga mari oli gami.

¹⁰Go nalakena ragi waina au doko sikoti mu au dip̃a ki mu tea waia, naga Te naata e pe karai p̃osiwosi, ega ta ganikani mau.

¹¹Nalakena au dogo naga te naata seara eu surata noginogi m̃aleoputo kakamu, waina eu da p̃osiwosi te navatuna mau, ma eu do pasa pinoa ki nawosiana ki tea p̃ota maga.

¹²Ma tea maga waina eu dapala nogoe au dip̃a ki da po pasa parati ki da doko Nawota Yesu Kristo, naga euga to p̃osiwosi pilake natatam̃ateana, go naga euga to gani navinaga adeada.

¹³Ma nimu, tai maga, kuga ta pei tea p̃op̃otoro mari tea wia mau.

¹⁴Go te naata sikai e pe ta dogo parati ki navasaana aginami pae epistole waia, naga Te naata e pe karai wanogoe naga kuga ta sikoti‐sari a mau, naga ega maliere.

¹⁵Go kuga ta midoa ki nia dapala e pei tea kokona sikai mau, ma kuga tapavanau sa dapala e pei taigida sikai.

¹⁶Ma Nawota ni natam̃ateana ega tum̃ana dua mu natam̃ateana sara ragi pae sara napua. Nawota ega sikoti mu.

¹⁷Navasadodomiana aginau Paulo ki nam̃elearugu, waina e pei navaivaiana doko sara epistole: a do midiri dapala nogoe.

¹⁸Nasaup̃iaana ki Nawota anigida Yesu Kristo ega sikoti puti mu.