Read Nguna Togoa Etafe North 1 TIMOTHEO 2 Bible Online

1 TIMOTHEO 2 - Nguna Togoa Etafe North bible

1 TIMOTHEO 2

¹Nalakena tea wanogoe a pasa paratiki, pea ki tea maga mamau puti, naga kuga magi naatam̃oli maga mamau puti mari natarotaroana maga, natapasavasaana maga, navavaraniana maga;

²navasadodom̃atakiana maga, kuga magi nawota maga go tea maga mamau puti waina eu pakilagi; naga tuga viragi duaduru namauriana matemate go tatam̃ate sikai doko waina tu matau ki Sup̃e go sara navunutaana wia.

³Tea wanogoe e p̃ia go e pei tea viragiana namata ni Sup̃e Tea Maumau pauri anigida;

⁴waina e masauna naga naatam̃oli maga mamau puti euga vei tea mautipauriana, po umai paki naataem̃atakiana ni nalomauana.

⁵Nalakena Sup̃e sikai maau e doko, go tea vae namawota sikai maau e doko namawota ni Sup̃e go ni naatam̃oli maga, nae me pei naatam̃oli sikai, Kristo Yesu,

⁶waina e dum̃ana pitua ki nia, e magi tea maga mamau puti pei naulu ni natauluaana; nanoasokisokiana kakana ega wo pei tea mariana ragi kakana maga;

⁷waina kinau a pei tea tawonakiana raki nia tea rogorogo sikai go Apostolo sikai (a noa nalomauana, a da sorosoro mau), tea vasa piseiki sikai ki tea ni nalauna p̃ota maga doko nasaralomauana go nalomauana.

⁸Nalakena tea wanogoe a masauna naga naanoai maga euga to dapasavasa sara tokoro, doko do darasike nam̃elearu tautau maga, masale ki namaetoana go navululuana.

⁹Dapala nogoe, naga nagoroi maga euga tum̃ada dekei ki da ki tea suniana mariusiana, pilake namaliereana go namidodoap̃iaana; ega ta doko viria maga ni naloluda, go kold kite napati ni vilavila maga kite sugoro maga waina navakokotoana kakada e p̃arua mau;

¹⁰ma (tea waina e pataka ni nagoroi maga waina eu lagasai po matau ki Sup̃e) ega vae nawosiana wia maga.

¹¹Nagoroi ega ataedogo doko natatam̃ateana doko sara natoko‐etano‐ana.

¹²Ma a da suasua ki nagoroi sikai naga ega vasa piseiki mau, kite naga ega maramara dap̃au naanoai mau, ma naga ega toko natatam̃ateana.

¹³Nalakena Adam e pei tea maridawonakiana pea, Eva e edaku;

¹⁴go Adam e da pei tea vilasurueana mau, ma nagoroi e pei tea vilasurueana po dowo paki natapiriana:

¹⁵ma ega wo pei tea mautipauriana pae naviragi‐pipia‐ana, eu pe toko nasaralomauana doko go nadodomiana go namaridautaukiana pilake namidodoap̃iaana.