Read Nguna Togoa Etafe North 1 TIMOTHEO 3 Bible Online

1 TIMOTHEO 3 - Nguna Togoa Etafe North bible

1 TIMOTHEO 3

¹Navasaana waia e pei lomau, Te naata e pe laaga naveitealeoparatikiana e masau nawosiana wia sikai.

²Nalakena tea wanogoe e one tea leo paratiki one naga ega tapala ega ta pei tea vasadip̃aana mau, ega vei anawota ki nagoroi sikai maau, ega ta pei tea matamaloku mau, ega vei tea midodoa p̃ia, tea tum̃ana mari usi a, tea dodomi nam̃enaki maga, tea mari atae pasa piseiki; ega ta pei tea vasa puka mau,

³ega ta pei tea vivitip̃a mau; ma ega vei tea mari matemate, ega ta pei tea vululu mau, ega ta pei tea dodomi m̃ane mau;

⁴ega vei tea maraki m̃ata ki nasum̃a aneana, doko peani natuna maga euga toko etano paki nia pilake sara naveinavunutawiaana;

⁵(ma te naata e pe ta atae naga ega maraki nasum̃a aneana mau, ega wo leo paratiki ekalesia ki Sup̃e dapale sava?)

⁶Ega ta pei tea saralomau vau mau, naga nap̃op̃ona ega ta pakilagi mau, go naga ega ta dowo paki natip̃akotoviana ni diabolo mau.

⁷Go e one asa one naga ega veani nanoasokisokiana wia m̃elu tea ni etaku maga; naga ega ta dowo paki navasapinoakiana go vaivai ki diabolo mau.

⁸Dapala nogoe e one diakona maga one naga euga vei navunuta wia, euga ta pei tea daleo dua mau, euga ta pei tea munu p̃arua ki waine mau, euga ta pei tea masau nataluaana sa mau;

⁹euga to dape soki p̃aia ni nasaralomauana doko natum̃ada atae‐ana tautau.

¹⁰Go nara ma euga vei tea maridogoana pea; edaku ki nia eu pe ta pei tea vasadip̃aana mau, euga mari nawosiana ki diakona.

¹¹Dapala nogoe e one nagoroi maga one naga euga vei navunuta wia, euga ta pei tea vasa dip̃a mau, euga ta pei tea matamaloku mau, euga vei lomau nalo ni naleo maga mamau puti.

¹²Diakona maga euga vei adawota ki nagoroi sikasikai sarasara ra, tea maraki m̃ata ki natuda maga go nasum̃a adeada maga.

¹³Nalakena tea maga waina eu mari m̃ata ki nawosiana ki diakona eu dum̃ada madeada dalua malo vaduana wia, go naviviariana warua doko nasaralomauana waina e doko Kristo Yesu.

¹⁴A midiri tea maga wanogoe paki‐go, doko do leogoro naga aga valoti punusi ko m̃araverave;

¹⁵ma a pe mari daliali, naga p̃a atae dapala waina e one ako one naga p̃a to mari a doko nasum̃a ki Sup̃e, waina e pei ekalesia ki Sup̃e mauri, tip̃a go laketano ni nalomauana.

¹⁶Go pae nanoasaiana p̃aia ni namatau‐ki‐Sup̃e‐ana e p̃arua; nae waina e pakilina doko nap̃okasi, waina e pei tea marileanakiana doko naatana, waina e pei tea vunusiana ki agelo maga, waina e pei tea rogorogokiana m̃aleoputo ni nalauna maga, waina e pei tea saralomauana doko maramana; waina e pei tea viragiana sake paki nasamasamaana.