Read Nguna Togoa Etafe North 1 TIMOTHEO 4 Bible Online

1 TIMOTHEO 4 - Nguna Togoa Etafe North bible

1 TIMOTHEO 4

¹Ma Naatana e noa sai lomau naga ragi edaku maga te naata seara euga wo m̃elu dua ki nasaralomauana pano, doko do dogo parati ki naatana vila surue maga, go navasapiseikiana maga ki dimon maga,

²pae naveinakalep̃oana ki tea maga waina eu do pasa sorosoro, doko aso natum̃adaataeana ki airon vivitinu sikai;

³doko do dip̃agoro naga euga ta pitawiri mau, po do dip̃aki naga euga vali ki navinaga maga, waina Sup̃e e dawona ki da naga euga vei tea tapeana pilake navasadodom̃atakiana pae tea maga waina eu saralomau po atae m̃ata ki nalomauana.

⁴Nalakena sara nalo tawonakiana ki Sup̃e eu p̃ia, go te navatuna sikai ega ta pei tea tip̃adoaana mau, e pe vei tea tapeana pilake navasadodom̃atakiana:

⁵nalakena e pei tea maridautaukiana pae navasaana ki Sup̃e go natapasavasaana.

⁶Ku pe mari taigida maga euga midoaki tea maga wanogoe, p̃a wo pei tea suasua wia sikai ki Kristo Yesu, tea tum̃am̃a pisei ki‐go ki navasaana maga ni nasaralomauana, go ni navasapiseikiana wia waina ku dausi sikoti a:

⁷ma navasaana sorosoro m̃oli maga ki nagoroi matua maga pa tip̃adoa ra. Go p̃a to dum̃am̃a p̃osiwosi ako naga pa matau ki Sup̃e.

⁸Nalakena nawosiwosiana ni nap̃atoko e silae raki tea kiki, ma namatauki‐Sup̃e‐ana e silae raki naleo maga mamau puti, e peani nasaiana ni namauriana waina e doko ragi waia, go ni tea waina ega wo umai.

⁹Navasaana wanogoe e pei lomau, go e p̃ia ki sara natapesokiana.

¹⁰Nalakena tu do p̃osiwosi‐mawosa raki tea wanogoe po pei tea vasapinoakiana, nalakena tu do leogoro‐pavatu Sup̃e mauri, waina e pei Tea Maumau pauri ki naatam̃oli maga mamau puti, p̃arua liu ki nia ki tea maga waina eu saralomau.

¹¹P̃a to dip̃aki da naleo maga wanogoe po do pasapisei ki da ara.

¹²Te naata sikai ega ta midoaki p̃alo ki navei‐natureai‐ana anigo mau; ma p̃a vei naatulakeana sikai ni tea saralomau maga, nalo ni navasaana, nalo ni natomariana, nalo ni nadodomiana, nalo ni nasaralomauana, nalo ni natautauana.

¹³P̃a to mari, pa pa aga valoti, naveveana, navasaparatikiana, navasapiseikiana.

¹⁴P̃a ta midoaki kalau navituam̃olikiana waina e doko ako, waina e pei tea vituakiana paki‐go pae naveanoasaiana, pilake navusakeana ni nam̃elearu maga ni nasaisaiana ni tea matua maga.

¹⁵P̃a midoaki paratiki tea maga wanogoe, p̃a toko tea maga wanogoe, naga narisuana anigo ega toko lina ki tea maga mamau puti.

¹⁶P̃a tum̃am̃a leo parati ki‐go go ki navasapiseikiana anigo. P̃a toko mau doko tea maga wanogoe; nalakena p̃a to mari tea wanogoe, go p̃a wo dum̃am̃a mautipauri ko asa go tea maga waina eu do dogo ko.