Read Nguna Togoa Etafe North 1 TIMOTHEO 5 Bible Online

1 TIMOTHEO 5 - Nguna Togoa Etafe North bible

1 TIMOTHEO 5

¹P̃a ta pasa p̃okati tea matua sikai mau, ma p̃a vasa paratiki nia ega tapala mama sikai; natureai maga euga tapala tai maga:

²nagoroi matua maga euga tapala tete maga; nagoroi atara maga euga tapala gore maga doko sara natautauana.

³P̃a dodomadagani nagoroi malepu maga waina eu pei malepu lomau.

⁴Ma te nagoroi malepu sikai e pe veani natuna seara kite natu ni natuna seara, euga vea ataedogo naga euga mari pae namatau‐ki‐Sup̃e‐ana paki tea ni nasum̃a adeada, go naga euga lagati dua tea matua adeada maga: nalakena tea wanogoe e pei tea viragiana namata ni Sup̃e.

⁵Ma tea waina e pei nagoroi malepu lomau, po masikina doko, e do leogoro‐pavatu Sup̃e, po doko mau doko navavaraniana maga go natapasavasaana maga p̃ogi go aleati.

⁶Ma tea waina e do ganikani po do munu po do sori p̃aragoto e mate ragi waina e mauri doko.

⁷Tea maga wanogoe ma p̃a to pitip̃aki ara, naga euga tapala euga ta pei tea vasadip̃aana mau.

⁸Ma te naata sikai e pe ta pea midoaki tea aneana maga mau, go p̃arua liu ki nia ki tea maga ni nasum̃a aneana mau; e pasagoro nasaralomauana, go e sa liu tea waina e da saralomau mau.

⁹Te naata sikai ega ta pei tea midiriana naga e pei malepu waina e ko da pei tea ni natau rualima latesa mau, nagoroi ki naanoai sikai maau,

¹⁰tea noasokisokiana nalo ni nawosiana wia maga; e pe vakale sua piakiki seara, e pe viragi sua nam̃enaki maga, e pe sarue sua nam̃ele ni tea tautau maga, e pe silae sua tea riesokiana maga, e pe rausi sua sara nawosiana wia.

¹¹Ma nagoroi malepu kasua maga p̃a tip̃adoa ra: nalakena ragi waina euga marilagilagi dip̃a Kristo, euga wo masauna naga euga laki;

¹²eu peani navasap̃otaeana nalakena eu marimalauweluki paki nasaralomauana vea adeada.

¹³Go eu ataedogo ragi sikai maau wanogoe naga euga toko m̃oli, doko do surata pa sara nasum̃a maga; go eu da doko m̃oli sikina mau, ma eu pei tea vasa sarasaraape maga go tea vasa pinoa maga, po do pasa tea maga waina e da p̃ia mau naga euga vasa ara.

¹⁴Nalakena tea wanogoe a masauna naga tea malepu kasua maga euga laki, euga viragi pipia maga, euga maraki nasum̃a, euga ta dua tea kokona te nalakena ni nasuoriana mau:

¹⁵nalakena ragi waia te seara eu dawasi sua dausi Satan.

¹⁶Te naanoai kite te nagoroi saralomau sikai e pe veani tea malepu seara, euga silae ra, go ekalesia ega ta pei tea mariana ega madaga ki da mau; naga ega silae tea maga waina eu pei malepu lomau.

¹⁷Tea matua maga waina eu maraki p̃ia euga vei tea midoakiana naga eu p̃ia ki nadodomadaganiana warua, p̃arua liu ki nia tea maga waina eu do p̃osiwosi mawosa navasaana go navasapiseikiana.

¹⁸Nalakena navasaana midiriana e naga, P̃a ta p̃auasi oks mau ragi waina e do pasilesue korn. Go, Tea wosiwosi e p̃ia ki namoriana aneana.

¹⁹Navasadip̃aana sikai dip̃a tea matua sikai, e pe ta pei tea noasokisokiana pae tea noasokisoki dua kite dolu mau, p̃a ta dape a mau.

²⁰Tea maga waina eu mari naleo sa p̃a vasa kasua ki da namata ni tea maga mamau puti, naga tea p̃ota maga ma euga mataku.

²¹A noa sokisoki kasua paki‐go namata ni Sup̃e go ni Kristo Yesu, go ni agelo matadoaana maga, naga p̃a vavaigoro tea maga wanogoe masale ki naveapasap̃otaeana, doko da mari te navatuna pae nakereana mau.

²²P̃a ta pusake nam̃elearu maga m̃araverave te naata sikai mau, go p̃a ta saisaipeani namarinaleosaana maga ki naatam̃oli p̃ota maga mau; p̃a tum̃am̃a mauti ko p̃a tautau doko.

²³P̃a ta moro pei tea munu noai mau, ma p̃a munu waine ega kiki nalakena nap̃alolapam̃a go nasasanaana paka laapa anigo.

²⁴Namarinaleosaana maga ki naatam̃oli seara eu doko lina, eu do pea ki da paki navasap̃otaeana pano; ma tea ki naatam̃oli seara eu dausi ra pano.

²⁵Dapala nogoe nawosiana maga waina eu p̃ia eu doko lina; go tea maga waina eu panop̃ota eu mari sa pei tea tasurukiana.