Read Nguna Togoa Etafe North 2 TIMOTHEO 1 Bible Online

2 TIMOTHEO 1 - Nguna Togoa Etafe North bible

2 TIMOTHEO 1

¹Paulo, apostolo sikai ki Kristo Yesu pae namasauana ki Sup̃e, dapala nasaiana ni namauriana waina e doko Kristo Yesu,

²paki Timotheo, natugu dodomiana: Nasaup̃iaana, nadodomiana, natam̃ateana, m̃elu Sup̃e Tama go Kristo Yesu Nawota anigida.

³A pasadodom̃ata ki Sup̃e, waina a maneana suasua pae tea matua vea aginau maga pa pa doko natum̃aguataeana dautau, dapala waina a peani namidoakiana nalo kakam̃a pitip̃atip̃a doko navavaraniana aginau maga,

⁴p̃ogi go aleati a do masau p̃arua ki naga aga vunusi ko, a do midoaki naririmatam̃a maga, naga aga vei tea vakavuroana ki nalaelaeana;

⁵a dape namidoakiana ni nasaralomauana waina e da pei nakalep̃oana mau waina e doko ako, waina e pea doko atenam̃a Lois, go p̃ilam̃a Eunike; go a saralomau kasua naga e doko ako.

⁶Tea wanogoe e pei nalakena a mari ko p̃a midoaki naga p̃a suipugoni navituam̃olikiana ki Sup̃e, waina e doko ako pae navusakeana ni nam̃elearugu maga.

⁷Nalakena Sup̃e e da dua gida naatana ni nap̃ilakeana mau; ma e dua gida naatana ni nakasuaana go ni nadodomiana go ni namarimidodoap̃iaana.

⁸Nalakena tea wanogoe p̃a ta maliere ki nanoasokisokiana ni Nawota anigida mau, go p̃a ta maliere ki nau tea soliana aneana mau: ma p̃a magi narogorogoana wia soki tea sa sikoti au ega vae nakasuaana ki Sup̃e;

⁹waina e mautipauri gida, po soso gida ki nasosoana tautau sikai, e da pae nawosiana anigida maga mau, ma e pae namidoakisokiana aneana go nasaup̃iaana, waina e pei tea vituakiana paki‐gida doko Kristo Yesu pea ki ragi maga ni tuai mau,

¹⁰ma ragi waia e pei tea mariana e doko lina pae navakilinaana ki Tea Maumau pauri anigida Kristo Yesu, waina e mari puoli ki namateana, po maramalagati namauriana go namesosap̃oana pae narogorogoana wia.

¹¹Waina kinau a pei tea tawonakiana raki nia tea rogorogo sikai, go apostolo sikai, go tea vasa piseiki sikai.

¹²Go tea wanogoe e pei nalakena a sua tea sa maga waia: ma a da maliere mau; nalakena a atae tea waina a pavatu asa, go a saralomau kasua naga e mari atae pavaigoro tea waina a pitua ki nia paki asa raki naaleatia wanogoe.

¹³P̃a tape soki naatulakeana ni navasaana maga ni namauriana waina ku dogo e kiagu, doko nasaralomauana go nadodomiana waina e doko Kristo Yesu.

¹⁴Tea wia wanogoe waina e pei tea vituakiana paki‐go p̃a vavaigoro e pae Naatana Tapu waina e doko gida doko.

¹⁵Ku atae tea waia, naga tea maga mamau puti waina eu doko Asia eu maradoa m̃elu dua ki nau pano; Fucelo go Hermocene ero pei edua kakada.

¹⁶Nawota ega vitua ki nadodomiana paki nasum̃a ni Onesiforo: nalakena e paka laapa paka maromaro ki nau, go e da maliere ki namori ni vatu aginau mau;

¹⁷ma ragi waina e doko Roma, e m̃arekareka laaga au,

¹⁸po pap̃ai au (Nawota ega tua e naga ega vap̃ai nadodomiana m̃elu Nawota naaleatia wanogoe); go naleo laapa waina e maginau suasua ara Efeso, nigo ku atae m̃ata ki nia.