Read Nguna Togoa Etafe North 2 TIMOTHEO 2 Bible Online

2 TIMOTHEO 2 - Nguna Togoa Etafe North bible

2 TIMOTHEO 2

¹Nalakena tea wanogoe, natugu, p̃a kasua doko nasaup̃iana waina e doko Kristo Yesu.

²Go tea maga waina ku dogo ra kiagu narae ni tea noa sokisoki laapa, p̃a vitua ki tea maga wanogoe paki naatam̃oli lomau maga, waina euga wo mari atae pasa piseiki tea p̃ota maga ara.

³P̃a soki tea sa sikoti au, ega tapala naatam̃oli ni navakalo wia sikai ki Kristo Yesu.

⁴Te naata waina e pei tea mari navakalo e da dum̃ana soli a ki nawosiana maga ni namauriana waia mau; naga ega vei tea wia namata ni tea waina e soso e naga ega vei tea ni navakalo.

⁵Go te naata e pe vilele, e pe ta pilele pae nawotaeana mau, e pe ta pei tea vauvaukiana mau.

⁶Tea wosiwosi natano waina e do p̃osiwosi‐mawosa e pei tea waina ega vea dapep̃otae nawa maga.

⁷P̃a midoaki atae tea waina a noa e; nalakena Nawota ega wo dua ko namidoakiataeana nalo ni naleo maga mamau puti.

⁸P̃a midoaki Yesu Kristo, waina e duleana m̃elu dua ki tea mate maga, waina e pei tea ni nawora ni David, pae narogorogoana wia aginau:

⁹waina a sua tea sa asa pa pa paki natali solisoli maga, dapala tea mari naleo sa sikai; ma navasaana ki Sup̃e e da pei tea soliana mau.

¹⁰Nalakena tea wanogoe a soki naleo maga mamau puti nalakena tea matadoaana maga, naga nara ma euga tape namautipauriana waina e doko Kristo Yesu pilake nasamasamaana waina e du mau du.

¹¹Navasaana waia e pei lomau: Nalakena tu pe mate sikoti a, tuga wo mauri sikoti a:

¹²tu pe soki tea sa, tuga wo maramara sikoti a: tu pe vasagoro e, nae ega wo pasagoro gida:

¹³tu pe ta saralomau mau, ma nae e pei lomau doko; nalakena e mari sa dum̃ana pasagoro e.

¹⁴P̃a mari ra euga midoaki tea maga wanogoe, doko do noa sokisoki kasua paki da namata ni Nawota, naga euga ta pululu nalo ni navasaana maga mau, waina e da p̃ia ki te navatuna mau, ma e dap̃olosiwo ki tea maga waina eu dogo.

¹⁵P̃a mari m̃arekareka naga p̃a tum̃am̃a lawo ki‐go narae ni Sup̃e, tea maridogopiragiana sikai, tea wosiwosi sikai waina ega ta maliere mau, waina e do p̃otae leana ki navasaana ni nalomauana.

¹⁶Ma p̃a lawodu uvea ki nadaleo p̃alo m̃oli maga: nalakena euga wo disu p̃arua ki nasigisigileoana pano,

¹⁷go navasaana adeada ega wo ganikani dapala namanuka meso sikai: nara Humenaio go Fileto ero pei edua kakada;

¹⁸naatam̃oli waina ero papele nalo ni nalomauana, doko do noa naga namoroduleanaana e pei tea marisuaana, po do dap̃olosiwo ki nasaralomauana ki te naata seara.

¹⁹Ma laketano kasua ki Sup̃e e lawodu, doko peani navulusokiana waia, Nawota e atae tea maga waina eu pei tea aneana: go, Sara naata waina eu do noa nagisa ni Nawota euga m̃elu dua ki namarinaleotageleana pano.

²⁰Ma nasum̃a warua sikai naleo maga ni kold go ni silver eu da sikida doko asa mau, ma tea ni nakau go ni naruku ma eu doko asa; go te seara eu pei tea ni nadodomadaganiana, go te seara eu pei tea ni nadododaoana.

²¹Go te naata e pe tum̃ana mari a ega tautau m̃elu dua ki tea maga wanogoe, ega wo pei naleo ni nadodomadaganiana, tea tapugoroana, tea wia ki Nawota, tea marim̃atakiana raki sara nawosiana wia.

²²Ma p̃a sava dua ki namasauana sa maga ni naveinatureaiana, go p̃a sava dausi namarinaleoleanaana, nasaralomauana, nadodomiana, natam̃ateana, sikoti tea maga waina eu pioso paki Nawota m̃elu p̃op̃o tautau.

²³Ma navusuusuana maga ni naveilalaana go ni naveinalop̃aloana p̃a tip̃adoa ra, ku atae naga eu pei nalakena ni navululuana maga.

²⁴Go e one tea suasua ki Nawota one naga ega ta pululu mau, ma naga ega vei tea manainai paki tea maga mamau puti, tea mariatae pasa piseiki, tea soki tea sa,

²⁵doko do parati piseiki pae namatemateana tea maga waina eu lawodugoro: mase Sup̃e e pe wo dua ra namidoakidoaana paki naataem̃atakiana ni nalomauana te ragi,

²⁶go naga euga atusake m̃elu dua ki vaivai ki diabolo, waina eu pei tea vuapavakotoana pae asa, naga euga mari namasauana Aneana.