Read Nguna Togoa Etafe North 2 TIMOTHEO 3 Bible Online

2 TIMOTHEO 3 - Nguna Togoa Etafe North bible

2 TIMOTHEO 3

¹Ma p̃a atae tea waia, naga ragi kasua maga euga wo umai naaleatia edaku maga.

²Nalakena naatam̃oli maga euga wo pei tea tum̃ada dodomi ra, tea dodomi m̃ane, tea vasapakavakae, tea leomadaga, tea vasa sa ki, tea rogo piri nadaleo ni tea matua adeada maga, tea ta dodom̃ataki mau, tea ta dautau mau,

³tea tika ki nadodomiana paki tea adeada maga, tea ta doropusi namaetoana mau, tea vasa dip̃a, tea mari sa dum̃ada soki ra, tea mila, tea ta dodomi tea wia mau,

⁴tea vituaki, tea mari p̃aragoto, tea p̃op̃o vakilagi, tea dodomi p̃arua ki namaropaana po dodomi kiki ki Sup̃e,

⁵waina eu peani naleodawonakiana ni namatauki‐Sup̃e‐ana, ma eu pasagoro nakasuaana kakana: go tea maga wanogoe p̃a maradoa m̃elu dua ki da pano.

⁶Nalakena nara seara kakada eu pei tea maga waina eu do sili panako paki ekopu ni nasum̃a maga, po do piragi lua pavakoto nagoroi manumatavusa maga, tea duatuakiana ki namarinaleosaana maga, tea viragiluaana ki namasauana sa visarasara maga,

⁷tea ataedogo sara ragi po da mari atae umai paki naataem̃atakiana ni nalomauana te ragi mau.

⁸Ma dakiusi waina Yanne go Yambre ero lawodugoro Moses, dapala nogoe nara ma eu do lawodugoro nalomauana; naatam̃oli maga waina namidodoana adeada e madada, tea tip̃adoaana maga nalo ni nasaralomauana.

⁹Ma euga wo da moro disu p̃arua mau: nalakena naveilalasigisigileoana adeada ega wo doko lina ki tea maga mamau puti dapala waina tea ki naatam̃oli dua wanogoe e pei tea mariana e doko lina.

¹⁰Ma nigo ku atae m̃ataki sua aginau navasapiseikiana, natomariana, namidoakisokiana, nasaralomauana, naveimaritasokiparauana, nadodomiana, nasokiana,

¹¹nakopaleleana maga, narogokitesaana maga, tea maga waina eu pakilina ki nau Antiokia, Ikonio, Listra; nakopaleleana warua maga waina a sua ra: go Nawota e pua lua au m̃elu dua ki puti ra.

¹²Ioro, go tea maga mamau puti waina eu masauna naga euga mauri pae namatauki‐Sup̃e‐ana doko Kristo Yesu euga wo pei tea kopaleleana.

¹³Ma naatam̃oli sa maga go tea surue maga euga wo disurisu po sa p̃arua, doko do piragi sasap̃o po do pei tea viragisasap̃okiana.

¹⁴Ma nigo p̃a toko naleo maga waina ku ataedogo sua ra po atae m̃ata ki da, ku atae tea maga waina ku ataedogo ra kiada;

¹⁵go naga pae ragi waina ku pei pipia, ku atae navasaana midiriana tapu maga waina eu mari atae mari ko p̃a manumatua paki namautipauriana pae nasaralomauana waina e doko Kristo Yesu.

¹⁶Sara navasaana midiriana eu pei tea maropituakiana pae Sup̃e, go eu p̃ia ki navasapiseikiana, ki natapavanauana, ki namarim̃atakiana, ki navaratipiseikiana waina e doko namarinaleoleanaana:

¹⁷naga naatam̃oli ki Sup̃e ega vei tea wia lua, tea marim̃atakiana raki sara nawosiana wia.