Read Nguna Togoa Etafe North 2 TIMOTHEO 4 Bible Online

2 TIMOTHEO 4 - Nguna Togoa Etafe North bible

2 TIMOTHEO 4

¹A noa sokisoki kasua paki‐go namata ni Sup̃e go ni Kristo Yesu, waina ega wo pasa p̃otae tea mauri go tea mate maga, go pae navakilinaana aneana go namarakiana aneana; p̃a to dogorogo ki navasaana; p̃a lawodu asa ragi wia,

²ragi sa, p̃a tapavanau, p̃a vasa kasua, p̃a vasa paratiki, doko sara naveimaritasokiparauana go sara navasapiseikiana.

³Nalakena ragi ega wo umai waina euga wo da soki navasapiseikiana ni namauriana asa mau, ma pae namasauana sa adeada euga wo dum̃ada madeada daua ki tea vasapiseiki maga, eu makalakala nadaligada;

⁴go euga wo doa nadaligada m̃elu dua ki nalomauana, go euga wo maradoa paki navasaana sorosoro maga.

⁵Ma nigo p̃a vei tea midodoa p̃ia nalo ni naleo maga mamau puti, p̃a soki tea sa, p̃a mari nawosiana ki tea rogorogo ki narogorogoana wia, p̃a vakavuro nasuasuaana anigo.

⁶Nalakena kinau a do pei tea takiana ragi waia, go ragi ni nam̃eluana aginau e pei m̃aladigi.

⁷A marimari sua namarimariana wia, a marisua nasavaana, a pavaigoro nasaralomauana;

⁸vauvau ni namarinaleoleanaana e maginau pei tea toropusiana pae ragi waia pa pa, waina Nawota, tea vasap̃otae leana, ega wo dua au asa naaleatia wanogoe: go ega wo da dua au sikigu asa mau, ma ega wo dua tea maga mamau puti asa waina eu dodomi navakilinaana aneana.

⁹P̃a mari m̃arekareka naga p̃a umai punusi au m̃araverave:

¹⁰nalakena Dema e doropusi au, e dodomi maramana waia, go e paki Thessalonika pano; Kreske e paki Calatia, Tito e paki Dalmatia.

¹¹Luka e sikina sikoti au doko. P̃a vuati Marko, po piragi a sikoti ko umai: nalakena e p̃ia ki nau raki nasuasuaana.

¹²Ma a dip̃aki lua Tukiko paki Efeso pano.

¹³Sugoro kovagoro waina a doropusi a Troas nasum̃a ki Karpo, p̃a tape a umai ragi waina p̃a umai, go tusi maga, p̃arua liu ki nia nawili maga.

¹⁴Alexander tea vei mataisau ni kopper e mari tea sa laapa paki nau: Nawota ega wo lagati dua e ega vataka nawosiana aneana maga:

¹⁵go nigo ma p̃a tum̃am̃a pavaigoro ko pa dua ki nia: nalakena a lawodugoro p̃arua ki navasaana aginami maga.

¹⁶Ragi ni navasakorokoroana vea aginau te naata e da umai silae au asa mau, ma tea maga mamau puti eu doropusi au: ega ta pei tea midoakiana dip̃a ra mau.

¹⁷Ma Nawota e lawodu sikoti au, po mari au a kasua; naga navitaua ega vei tea rogorogokipakavuroana pae au, go naga tea ni nalauna p̃ota maga euga mamau puti dogo: go a pei tea vualuaana m̃elu dua ki nawoka ni laion.

¹⁸Nawota ega wo pua lua au m̃elu dua ki sara nawosiana sa, po mauti pauri au paki namarakiana aneana ni nakoroatelagi: waina nasamasamana ega vei aneana pa pa ega tu du po du mau du. Amen.

¹⁹P̃a vasadodomi Priska go Akula, go nasum̃a ni Onesifero.

²⁰Erasto e doko Korintho: ma a doropusi Trofimo doko Mileto e sasana.

²¹P̃a mari m̃arekareka naga p̃a umai pea ki ragi ni namaladiana. Eubulo e pasadodomi ko, go Pudens, go Lino, go Klaudia, go taigida maga mamau puti.

²²Nawota ega sikoti naatam̃a. Nasaup̃iaana ega sikoti mu.