Read Nguna Togoa Etafe North PAKI TITO 2 Bible Online

PAKI TITO 2 - Nguna Togoa Etafe North bible

PAKI TITO 2

¹Ma nigo p̃a to pasa tea maga waina eu pataka ni navasapiseikiana mauri:

²naga maariki maga euga ta pei tea matamaloku mau, euga vei navunuta wia, tea midodoa p̃ia, tea mauri nalo ni nasaralomauana, nadodomiana, nasokiana:

³naga vitariki maga ma euga vei tea vataka ni tea tapu maga nalo ni namariana, euga ta pei tea vasa dip̃a mau, euga ta pei naviti ni waine warua mau, euga vei tea vasa piseiki maga ni tea wia;

⁴naga euga mari piseiki nagoroi atara maga naga euga vei tea dodomi adawota maga, tea dodomi natuda maga, tea midodoa p̃ia, tea tautau,

⁵tea wosiwosi doko nasum̃a adeada maga, tea vakale, tea rogo paratiki adawota maga, naga navasaana ki Sup̃e ega ta pei tea vasasakiana mau.

⁶Dapala nogoe p̃a vasa parati ki natureai maga naga euga vei tea midodoa p̃ia:

⁷nalo ni naleo maga mamau puti p̃a tum̃am̃a pisei ki‐go paki da naatulakeana sikai ni nawosiana wia maga; navasapiseikiana anigo p̃a visei ki da natautauana asa,

⁸naveinavunutawiaana, navasaana ni namauriana, waina e mari sa pei tea tip̃akotoviana, naga tea waina e pei tea mari dip̃a ega maliere, ragi waina e da peani te navatuna sa mau waina ega noa e nalo kakagida.

⁹P̃a vasa paratiki tea suasua maga naga euga toko etano paki nawota adeada maga, go naga euga vei tea midoakim̃atakiana nalo ni naleo maga mamau puti; naga euga ta pasa dugoro mau;

¹⁰euga ta lawogoro mau, ma euga to pisei ki da sara naveilomauana wia; naga euga rekei ki navasapiseikiana ki Sup̃e Tea Maumau pauri anigida nalo ni naleo maga mamau puti.

¹¹Nalakena nasaup̃iana ki Sup̃e e pakilina, e magi naatam̃oli maga mamau puti piragi namautipauriana,

¹²doko do pasa piseiki gida, naga tuga to pasagoro nasigisigileoana go namasauana sa maga ni maramana, go naga tuga mauri pae namidodoap̃iaana go namarinaleoleanaana go namataukiana ki Sup̃e doko maramana waia;

¹³doko do leogoro naleogoroana maropa go navakilinaana ni nasamasamaana ki Sup̃e warua go ki Tea Maumau pauri anigida Yesu Kristo;

¹⁴waina e manigida, dum̃ana pitua ki nia naga ega taulua gida m̃elu dua ki sara namarinaleotageleana, po dum̃ana maneana mari narei sikai euga tautau euga vei tea aneana, tea suisui paki nawosiana wia maga.

¹⁵P̃a to pasa tea maga wanogoe, go p̃a to pasa paratiki go p̃a to pasa kasua ega vilake sara natip̃akiana. Te naata sikai ega ta midoaki p̃alo ki‐go mau.