Read Nguna Togoa Etafe North PAKI TITO 3 Bible Online

PAKI TITO 3 - Nguna Togoa Etafe North bible

PAKI TITO 3

¹P̃a mari ra euga midoaki nia naga euga toko etano paki tea maraki maga, paki naveinawotaana maga, naga euga rogo parati ki da, naga euga vei tea marim̃ata sua paki sara nawosiana wia,

²naga euga ta pasa sa ki te naata mau, naga euga ta pei tea vululu mau, naga euga mari matemate, doko do piseiki sara namatemateana paki sara naatam̃oli.

³Nalakena nigida ma tu pei tea manumatavusa sala vea, tea rogopiri, tea sasap̃o, naviti ni namasauana sa maga go ni namaroana maga pisarasara, doko mauri doko navilosiana go naroitoiana, tea mamaragokiana, doko do dum̃agida pilosi gida.

⁴Ma ragi waina navakaleana go nadodomi‐naatam̃oli‐ana ki Tea Maumau pauri anigida Sup̃e ero pakilina,

⁵nawosiana maga ni namarinaleoleanaana waina nigida tu mari a e da pei nalakena mau, ma nadodomiana aneana e pei nalakena e mautipauri gida, pae nasarueana ni namoropakilinaana go namaripaukiana ki Naatana Tapu,

⁶waina e daki p̃arua ki nia paki gida, pae Yesu Kristo Tea Maumau pauri anigida;

⁷naga, waina tu pei tea marileanakiana ki nasaup̃iaana aneana, tuga vei tea mariana tuga vei tea veanipioli maga pae naleogoroana ni namauriana waina e du mau du.

⁸Navasaana wanogoe e pei lomau, go nalo ni tea maga wanogoe a masauna naga p̃a to noasokisoki kasua, naga tea maga waina eu saralomau navasaana ki Sup̃e euga midodoa naga euga to mari nawosiana wia maga. Tea maga wanogoe eu p̃ia go eu pei tea silae naatam̃oli maga:

⁹ma p̃a lawodu uvea ki navusuusuana maga ni namanumatavusaana, go nanoaana ni navakilinaana maga, go navileana maga, go navululuana maga nalo ni nawotaeana; nalakena eu da silae mau go eu pei tea p̃alo.

¹⁰Naatam̃oli waina e mari tagona p̃ota edaku ki natapavanauana sikai go kerua p̃a tip̃adoa e;

¹¹ku atae naga tea tapala nogoe e pei tea lim̃adoaana, po do mari naleo sa, doko dum̃ana pei tea tip̃akotoviana.

¹²Ragi waina aga wo dip̃aki lua Artema paloti punusi ko, kite Tukiko, p̃a mari m̃arekareka naga p̃a umai paki Nikopoli punusi au: nalakena a midoaki p̃otae naga aga toko tokora wanogoe ragi ni namaladiana.

¹³P̃a vusivusi pae nam̃arekarekaana Sena naatam̃oli ni nawotaeana go Apollo pano, naga te navatuna ega ta puoli ki da mau.

¹⁴Go tea anigida maga ma euga atae dogo naga euga to mari nawosiana wia maga nalo ni natikaana maga waina eu one ara one, naga euga ta pei tea oro mau.

¹⁵Tea maga mamau puti waina eu sikoti au doko eu pasa dodomi ko. P̃a vasa dodomi tea maga waina eu dodomi gida doko nasaralomauana. Nasaup̃iaana ega sikoti puti mu.