Read Nguna Togoa Etafe North PAKI FILEMON 1 Bible Online

PAKI FILEMON 1 - Nguna Togoa Etafe North bible

PAKI FILEMON 1

¹Paulo, tea soliana sikai ki Kristo Yesu, go Timotheo taigida, paki Filemon tea dodomiana aginami go tea wosiwosi sikoti gami,

²go paki Apfia goregami, go paki Arkippo tea ni navakalo sikoti gami, go paki ekalesia ni nasum̃a anigo:

³nasaup̃iaana ega vei animu go natam̃ateana m̃elu Sup̃e Tamagida go Nawota Yesu Kristo.

⁴A pasadodom̃ata ki Sup̃e aginau sara ragi, doko do noa ko natapasavasaana aginau maga,

⁵a do dogo nadodomiana anigo, go nasaralomauana waina ku peani a paki Nawota Yesu, go paki tea tautau maga mamau puti;

⁶naga nasaisaipeaniana ni nasaralomauana anigo ega vei tea marimatua doko naataem̃atakiana ni sara naleo wia waina eu doko mu paki Kristo Yesu.

⁷Nalakena a peani nalaelaeaana warua go navakavakaleana nalakena nadodomiana anigo, nalakena namarita ni tea tautau maga eu pei tea vakamaromarokiana pae ako, taigu.

⁸Nalakena tea wanogoe, waina a peani naviviariana warua doko Kristo naga aga tip̃a ki‐go tea waina e patakam̃a,

⁹ma nalakena nadodomiana a pavara, waina a pei tea tapala Paulo tea matua, go ragi waia tea soliana sikai ki Kristo Yesu:

¹⁰a pavarani ko nalakena natugu, waina a pesi a doko natali solisoli maga,

¹¹Onesimo, waina sala vea e da p̃ia ki‐go mau, ma ragi waia e p̃ia ki‐go go e p̃ia ki nau.

¹²Waina a dip̃aki lua e liliu paloti punusi ko, nae, tea wanogoe e pei namaritagu;

¹³Waina kinau a masauna naga aga mauti a ega sikoti au, naga ega maginau suasua oli ko doko natali solisoli maga ni narogorogoana wia:

¹⁴ma masale ki namidodoana anigo a da masauna naga aga mari te navatuna mau, naga nawiaana anigo ega ta dapala e pe vae navasadieana mau, ma ega vae narakarakaana.

¹⁵Nalakena mase e m̃elu dua ki‐go pano ragi kiki nalakena tea waia, naga p̃a veani a ega tu mau du;

¹⁶e da moro dapala tea suasua mau, ma e pakilagi liu tea suasua, e pei taigida dodomiana e p̃arua paki nau ma e p̃arua liu ki nia dapale paki‐go, doko nap̃okasi go doko Nawota.

¹⁷Nalakena tea wanogoe ku pe midoaki nia naga kinau a pei tea saisaipeani, p̃a viragi soki a ega tapala e pei kinau.

¹⁸Ma e pe mari dagele pakigo te navatuna, kite te navatuna anigo e pe one asa one, p̃a midoa ki tea wanogoe dip̃a au;

¹⁹kinau Paulo a midiri a ki nam̃elearugu, kinau aga wo lagati pitua ki nia: naga aga ta noa ki‐go naga ku dum̃am̃a pei naleo aginau waina e one ako one.

²⁰Ioro, taigu, aga veani nalaelaeaana ako doko Nawota: p̃a vakamaromaro ki namaritagu doko Kristo.

²¹Nalakena a pavatu narogoparatikiana anigo a midiri paki‐go doko atae naga p̃a wo mari tea waina e p̃arua liu tea maga waina a noa e.

²²Ma ragi sikai maau wanogoe p̃a maginau mari m̃ata ki tokora sikai ni nam̃enakiana; nalakena a do leogoro naga aga vei tea vituakiana paki mu pae natapasavasaana animu maga.

²³Epafra, tea viragiluapavakotoana sikoti au doko Kristo Yesu e pasa dodomi ko;

²⁴go Marko, go Aristarko, go Dema, go Luka, tea wosiwosi maga sikoti au.

²⁵Nasaup̃iaana ki Nawota anigida Yesu Kristo ega sikoti naatamu. Amen.