Read Nguna Togoa Etafe North PAKI HEBERU MAGA 1 Bible Online

PAKI HEBERU MAGA 1 - Nguna Togoa Etafe North bible

PAKI HEBERU MAGA 1

¹Sup̃e, waina e pasa ki tamagida maga tuai doko profeta maga matele ni navasaana laapa go dapala vatuna laapa,

²ragi edaku ni naaleatia maga waia e pasa ki gida doko Natuna, waina e dawona ki nia naga ega vei tea veani naleo maga mamau puti, go waina e mari maramana maga pae asa.

³Waina e pei namaramalagaana ni nasamasamaana aneana, go namaridawonakiana ni naveinateaana kakana, go waina e do silae naleo maga mamau puti ki navasaana ni nakasuaana aneana, ragi waina e mari sua namaridautauana ni namarinaleosaana maga, e dasake pisari nam̃elearu ni matua ni Natatap̃auana elagi;

⁴e pei tea mariana e pia liu agelo maga, dapala waina e peani nagisa sikai waina e p̃ia liu adeada.

⁵Nalakena e noa ki seve tea ni agelo maga te ragi, Nigo ku pei Natugu, Kinau a pesi ko masoso? Go e moro naga, Kinau aga wo maneana pei Tamana, Go nae ega wo maginau pei Natugu?

⁶Go ragi waina e moro piragi takalapa umai paki maramana e naga, Go agelo maga mamau puti ki Sup̃e euga lotu ki nia.

⁷Go nalo ni agelo maga e naga, Waina e do mari agelo aneana maga eu pei nalagi maga, Go tea suasua aneana maga eu pei soro ni nakapu:

⁸Ma nalo ni Natuna e naga. Malo tasake anigo, Sup̃e O, e du du po du mau du; Go tiko ni naleanaana e pei tiko ni namarakiana anigo.

⁹Ku dodomi namarinaleoleanaana, po pilosi nasigisigileoana. Nalakena tea wanogoe Sup̃e, Sup̃e anigo, e puvurai ki‐go ki naroro ni nalaelaeaana p̃arua liu tam̃a ri maga.

¹⁰Go, Nigo, Nawota, ragi ni naatulakeana ku lawo ki laketano ni maramana, Go nakoroatelagi maga eu pei nawosiana ni nam̃elearum̃a maga:

¹¹Nara euga wo puoli; ma nigo ku doko mau doko: Go euga wo mamau puti disu duai dapala sugoro sikai:

¹²Go dapala sugoro kovagoro sikai p̃a wo lulu ki da, Dapala sugoro sikai, go euga wo panop̃ota: Ma nigo ku pei tea sikai maau doko, Go natau anigo maga euga wo da nopu mau.

¹³Ma nalo ni agelo maga sei kakada te ragi e naga. P̃a toko pisari nam̃elearugu ni matua, Pa pa aga wo mari tea kokona ki‐go maga euga vei malo vasiana ni nam̃elem̃a maga?

¹⁴Eu da mamau puti pei naatana suasua maga, tea tip̃akiluaana raki nasuasuaana nalakena tea maga waina euga wo peani namautipauriana kite?