Read Nguna Togoa Etafe North PAKI HEBERU MAGA 2 Bible Online

PAKI HEBERU MAGA 2 - Nguna Togoa Etafe North bible

PAKI HEBERU MAGA 2

¹Nalakena tea wanogoe e one gida one naga tuga rogo paratiki p̃arua liu ki tea maga waina eu pei tea rogoana, naga tuga ta sale m̃elu dua ki da pano mau.

²Nalakena navasaana waina e pei tea vasaana pae agelo maga e pe vei tea mariana e kasua, go sara natapiriana go sara narogopiriana eu pe tape namoriana ni navituadip̃aana leana sikai;

³nigida tu pe wo sava m̃elu pano dapale sava, tu pe sarateap̃alo namautipauriana warua tapala nogoe? Waina e pea pei tea vasaana pae Nawota, po pei tea lawosokiana paki gida pae tea maga waina eu dogo;

⁴Sup̃e ma e do noa sokisoki a sikoti ra, ki navaivaiana maga go ki tea ni namagaana maga go ki namariana kasua visarasara maga go ki navituap̃otawotaeana maga ni Naatana Tapu, pae namasauna aneana.

⁵Nalakena e da mari maramana waina ega wo umai, waina au do pasa nalo kakana, e doko etano paki agelo maga mau.

⁶Ma naata sikai e noa sokisoki tokora sikai, e naga, Naatam̃oli e pei navasa, naga p̃a midoaki nia? Kite naatam̃oli natuna, naga p̃a umai punusi a?

⁷Ku mari a e pakitano kiki ki agelo maga; Ku pauvau ki nia ki nasamasamaana go ki nadodomadaganiana, Go ku lawo ki nia dap̃au nawosiana maga ni nam̃elearum̃a maga;

⁸Ku doropusi naleo maga mamau puti eu doko etano ki nam̃elena maga. Nalakena nalo ni waina e doropusi naleo maga mamau puti eu doko etano paki nia, e da doro te navatuna mau waina e do doko etano paki nia mau. Ma ragi waia tu ko da punusi naleo maga mamau puti eu pei tea mariana eu doko etano paki nia mau.

⁹Ma tu leopunusi tea waina e pei tea mariana e pakitano kiki ki agelo maga, Yesu nalakena nasua‐navitinumate‐ana e pei tea vauvaukiana ki nasamasamaana go ki nadodomadaganiana, naga pae nasaup̃iaana ki Sup̃e, ega magi sara naatam̃oli katidogo namateana.

¹⁰Nalakena e pataka ni nae, waina naleo maga mamau puti eu doko nalakena nae, go waina naleo maga mamau puti eu pae asa doko, waina e piragi natuna laapa paki nasamasamaana, naga ega mari Nawota ni namautipauri‐ra‐ana ega wia lua pae narogokitesaana maga.

¹¹Nalakena tea waina e do maridautau go tea maga waina eu do pei tea maridautaukiana eu mamau puti pei tea ni tea sikai maau: nalakena tea wanogoe e da maliere mau naga ega soso ra ki taina maga,

¹²e naga, Aga wo dogorogo ki nagisam̃a paki taigu maga, Aga wo lega samasamani ko m̃aleoputo ni nasaisaiana.

¹³Go e moro naga, Kinau aga wo pavatu asa. Go e moro naga, Kuga leo, kinau go piakiki maga waina Sup̃e e dua au ara.

¹⁴Nalakena tea wanogoe nalakena piakiki maga eu saisai peani nap̃okasi go nada, dapala nogoe nae ma e peani p̃otae tea sikai maau maga wanogoe; naga ega maripuoli ki pae namateana tea waina e peani namarakiana ni namateana, tea wanogoe e pei diabolo;

¹⁵go naga ega vua lua tea maga waina eu pei tea ni naveinavitiana ki namatauki‐namateanaana pae ragi ni namauriana mamau adeada.

¹⁶Nalakena lomau e da puati agelo maga mau, ma e puati nawora ni Abraham.

¹⁷Nalakena tea wanogoe e one asa one naga ega takiusi taina maga nalo ni naleo maga mamau puti, naga ega vei tea viri warua liu dodomi go lomau sikai nalo ni naleo maga waina eu pei tea ki Sup̃e, naga ega mari naviriana nalakena namarinaleosaana maga ki narei.

¹⁸Nalakena nalo ni tea waina nae e sua navitinuana asa ragi waina e pei tea maridogoana, e mari atae silae tea maga waina eu do pei tea maridogoana.