Read Nguna Togoa Etafe North PAKI HEBERU MAGA 4 Bible Online

PAKI HEBERU MAGA 4 - Nguna Togoa Etafe North bible

PAKI HEBERU MAGA 4

¹Nalakena tea wanogoe tuga mataku, mase ragi waina nasaiana sikai e pei tea toropusiana naga tuga sili paki namaromaroana aneana, te naata sikai kakamu e pe wo da pa paratiki nia mau.

²Nalakena narogorogoana wia e pei tea rogorogokiana paki gida, dapala waina e pei tea rogorogokiana paki da: ma navasaana ni narogoana e da mari m̃ata ki da mau, nalakena e da pei tea marisarisariana mau ki nasaralomauana sikoti tea maga waina eu dogo.

³Nalakena nigida waina tu saralomau sua tu sili paki namaromaroana wanogoe, dakiusi waina e naga, Dapala waina a pivisa namaetoana aginau, Naga euga wo da umai sili paki namaromaroana aginau mau: Go nawosiana maga eu pei tea marisuaana pae nanadiki‐laketanoana ni maramana.

⁴Nalakena e noa sua doko tokora sikai nalo ni naaleatia kelarua dapala waia. Go Sup̃e e maromaro naaleatia kelarua m̃elu dua ki nawosiana aneana maga mamau puti;

⁵go tokora waia e moro naga, Naga euga ta umai sili paki namaromaroana aginau mau.

⁶Nalakena tea wanogoe nalakena e doko naga te naata seara euga sili paki asa, go tea maga waina narogorogoana wia e pea pei tea rogorogokiana paki da eu da sili paki asa mau nalakena narogopiriana,

⁷e moro dawona ki naaleatia sikai, Masoso, e noa doko David, edaku ki ragi varau dapala nogoe, dapala waina e pea pei tea noaana, e naga, Masoso ku pe rogo nadaleona, Kuga ta mari nap̃op̃omu ega kasua mau.

⁸Nalakena Yoshua e pe tua sua ra namaromaroana, e pe ta edaku ki tea wanogoe pasa nalo ni naaleatia p̃ota sikai mau.

⁹Nalakena tea wanogoe namaromaroana sikai ni sabbath e magi narei ki Sup̃e doko.

¹⁰Nalakena tea waina e sili paki namaromaroana aneana nae ma e maromaro m̃elu dua ki nawosiana aneana maga, dakiusi waina Sup̃e e maromaro m̃elu dua ki aneana.

¹¹Nalakena tea wanogoe tuga mari m̃arekareka naga tuga sili paki namaromaroana wanogoe, naga te naata sikai ega ta dowo mau paki naviseikiana sikai maau wanogoe ni narogopiriana.

¹²Nalakena navasaana ki Sup̃e e mauri, go e pei toro kasua, go e makali liu sara lova waina nawokana e dua, go e do puri pa pa paki natap̃otaeana ni namauriana anigida go ni naatagida, ni kolopuda maga go ni namaraeda, go e do midoaki p̃otae mamidodoarogoana maga go namidodoaleoana maga ni nap̃op̃ogida.

¹³Go tea tawonakiana sikai e da doko mau waina e da doko lina naraena mau: ma naleo maga mamau puti eu m̃alam̃ala go eu doko lina ki namata ni tea waina tu peani naatusigida‐ana paki nia.

¹⁴Nalakena tea wanogoe waina tu peani tea viri warua liu warua sikai waina e pa duaduru nakoroatelagi maga, Yesu Natu ni Sup̃e, tuga tape soki nanoasaiana anigida.

¹⁵Nalakena tu da peani tea viri warua liu sikai waina e mari sa dogo sikoti gida namanainaiana anigida maga mau, ma tu peani sikai waina e pei tea maridogoana sua nalo ni naleo maga mamau puti pae natakiusi‐gida‐ana masale ki namarinaleosaana.

¹⁶Nalakena tea wanogoe tuga viviari umai paki m̃aladigi ki malotokoana ni nasaup̃iaana, naga tuga tape nadodomiana, po pap̃ai nasaup̃iaana raki nasilaeana ragi kakana.