Read Nguna Togoa Etafe North PAKI HEBERU MAGA 6 Bible Online

PAKI HEBERU MAGA 6 - Nguna Togoa Etafe North bible

PAKI HEBERU MAGA 6

¹Nalakena tea wanogoe tuga toropusi navasaana ni naatulakeana ki Kristo ega toko go tuga risu paki nawialuaana; tuga ta moro nadi ki laketano ni namidoakidoaana m̃elu dua ki nawosiana mate maga, go ni nasaralomauana paki Sup̃e,

²ni navasapiseikiana ni nabapetisoana maga, go ni navusakeana ni nam̃elearu maga, go ni namoroduleanaana ki tea mate maga, go ni navasap̃otaeana waina e du mau du.

³Go Sup̃e e pe suasua, tuga wo mari tea wanogoe.

⁴Nalakena nalo ni tea maga waina eu paka sikai pei tea maramalagatiana po katidogo navituam̃olikiana ni nakoroatelagi, po pei tea mariana eu peanip̃otae Naatana Tapu,

⁵po katidogo navasaana wia ki Sup̃e, go namariana kasua maga ni ragi varau waina ega wo umai,

⁶go waina eu dowo pano, e marisap̃o pei tea mariana naga te naata seara euga moro maripau ki da paki namidoakidoaana; waina eu moro dum̃ada madeada duri Natu ni Sup̃e nakau valadagoto, po mari a e pei tea malierekiana lina.

⁷Nalakena natano waina e munu usa waina e paka laapa p̃owo asa, go waina e do pitua ki nataputea waina e p̃ia ki tea maga waina e pei tea kiliana nalakena nara, e dape navasam̃atakiana m̃elu Sup̃e:

⁸ma tea waina e do pitua ki tea makalikali maga go tea vivitip̃a maga, e pei tea tip̃adoaana po pei m̃aladigi ki navasasakiana, waina ragi edaku kakana e pei naga ega vei tea tap̃arakiana.

⁹Au pasa dapala nogoe, ma au saralomau kasua nalo kakamu, tea dodomiana maga, naga naleo maga waina eu p̃ia liu tea maga wanogoe, go naleo maga waina eu pilake namautipauriana eu pei animu:

¹⁰nalakena Sup̃e e da pei tea tagele mau naga ega malio ki nawosiana animu go nadodomiana waina ku piseiki nia paki nagisana, ku magi tea tautau maga suasua pitua sua go ku do madeada suasua pitua.

¹¹Ma au masau p̃arua ki nia naga sara naata kakamu euga viseiki nam̃arekarekaana sikai maau wanogoe nalo ni nasaralomau pakavuroana ni naleogoroana pa pa paki ragi edaku mau:

¹²naga kuga ta pei tea mamale mau, ma naga kuga vei tea mari oli tea maga waina eu peani nasaiana maga pae nasaralomauana go naveimaritasoki‐parauana.

¹³Nalakena ragi waina Sup̃e e mari nasaiana paki Abraham, nalakena e da peani naga ega vivisa pae tea waina e p̃arua liu sa, e pivisa dum̃ana pae asa,

¹⁴e naga, Lomau aga wo pasap̃ia po pasap̃ia ki‐go, go aga wo mari ko p̃a wo laapa po laapa.

¹⁵Go dapala nogoe, ragi waina e pei maritasoki ragi varau, e pap̃ai nasaiana.

¹⁶Nalakena naatam̃oli maga eu pivisa pae tea waina e p̃arua liu ra: go navivisaana e madeada pei nanopuana ni sara navululuana raki nalawosokiana.

¹⁷Nalakena tea wanogoe Sup̃e, waina e midoaki nia naga ega viseiki p̃arua liu ki tea maga waina eu pei tea veani nasaiana navanop̃otasap̃oana ni namidoakip̃otaeana aneana, e pae namawota ki navivisaana sikai:

¹⁸naga pae naleo rua waina ero pe ta panop̃ota mau, waina e mari sa pei tea mariana naga Sup̃e ega sorosoro ara, tuga veani navakavakaleana kasua, waina tu sava sili sua naga tuga vua soki naleogoroana waina e pei tea toropusiana e one kivea ki gida;

¹⁹waina tu peani a e dapala agke sikai ni naatagida, e pei laketoko go e kasua, go e sili paki tea waina e doko ekopu ni tea taugorop̃otae:

²⁰waina Yesu dapala tea sava pea sikai e manigida sili paki asa, waina e pei tea mariana e pei tea viri warua liu sikai pae natakiusiana ni Melkisedek.