Read Nguna Togoa Etafe North PAKI HEBERU MAGA 7 Bible Online

PAKI HEBERU MAGA 7 - Nguna Togoa Etafe North bible

PAKI HEBERU MAGA 7

¹Nalakena Melkisedek wanogoe, nawota ni Salem, tea viri ki Sup̃e Vakilagi mau, waina e sua Abraham ragi waina e do liliu pae naatugiana ni nawota maga, po pasa p̃ia ki nia,

²go waina Abraham e maneana p̃otawotae kekerualima sikai ni naleo maga mamau puti (e pea pei Nawota ni namarinaleoleanaana pae navasadoaana, go edaku ki tea wanogoe e pei Nawota ni Salem, waina e pei Nawota ni natam̃ateana;

³tamana e dika, p̃ilana e dika, p̃auna maga eu dika, e da peani naatulakeana ni naaleatia maga mau, go e da peani nanopuana ni namauriana mau, ma e pei tea mariana e dakiusi Sup̃e Natuna), e pei tea viri doko pa pa e du mau du.

⁴Ma kuga midoaki punusi naatamoli wanogoe e p̃arua pa, waina Abraham, patriarke, e dua e kekerualima sikai m̃elu naleo tapepavakotoana wia liu maga.

⁵Go tea maga ni Levi natuna maga waina eu dape naveiteaviriana eu peani natip̃akiana naga euga kekerualima ki narei pae nawotaeana, tea wanogoe e pei ki taida maga, go nara eu dave m̃elu naware ni Abraham:

⁶ma tea waina p̃auna maga eu da pei tea veveana m̃elu ara mau e kekerualima ki Abraham, go e pasap̃ia ki tea waina e peani nasaiana maga.

⁷Ma masale ki te navululuana, tea kiki e pei tea vasap̃iakiana pae tea wia liu sa.

⁸Go tokora waia naatam̃oli waina eu do mate eu dape kekerualima maga; ma tokora wanogoe sikai e dape a waina e pei tea noasokisokiana nalo kakana naga e mauri.

⁹Go dapala waina aga noa e, Levi ma, waina e do dape kekerualima maga, e pei tea kekerualimakiana pae Abraham;

¹⁰nalakena e ko doko naware ni tamana, ragi waina Melkisedek e sua e.

¹¹Ma nawialuaana e pe toko pae naveiteaviriana ni naworawora ni Levi (nalakena narei eu dape nawotaeana doko asa), natikaana ni nasava e ko doko naga tea viri p̃ota sikai ega vakilina pae natakiusiana ni Melkisedek, go naga ega ta pei tea noaana pae natakiusiana ni Aaron mau?

¹²Nalakena ragi waina naveiteaviriana e pei tea mariana e panop̃ota, navanop̃otaana sikai ni nawotaeana ma e one asa one naga ega vei tea mariana.

¹³Nalakena tea waina tea maga wanogoe eu pei tea noaana nalo kakana e pei tea ni naworawora p̃ota sikai, waina te naata kakada e da doko raki wede ni naviriana mau.

¹⁴Nalakena e doko lina naga Nawota anigida e m̃elu Yudah pakilina; nalo ni naworawora wanogoe Moses e da noa te navatuna nalo ni tea viri maga mau.

¹⁵Go tea waina au noae edoko lina p̃arua liu, nalakena tea viri p̃ota sikai pae natakiusiana ni Melkisedek e pakilina,

¹⁶waina e pei tea mariana, e da pae nawotaeana ni natip̃akiana sikai ni nap̃okasi mau, ma e pae nakasuana ni namauriana sikai waina ega wo da makoto mau:

¹⁷nalakena e pei tea noasokisokiana nalo kakana, Nigo ku pei tea viri sikai pa pa ega tu mau du Pae natakiusiana ni Melkisedek.

¹⁸Nalakena namaripuolikiana ni natip̃akiana sikai waina e pea e doko nalakena namanainaiana kakana go natikaana ni nasilaeana

¹⁹(nalakena nawotaeana e da mari te navatuna e p̃ia lua mau), go naviragiana umai paki asa ni naleogoroana wia liu sa sikai, waina tu pae asa paki m̃aladigi ki Sup̃e.

²⁰Go dapala waina e da doko masale ki navivisaana mau

²¹(nalakena nara eu pei tea mariana eu pei tea viri maga masale ki navivisaana, ma nae e pilake navivisaana pae tea waina e noa ki nia, e naga, Yehovah e pivisa go ega wo da midoakidoa mau, Nigo ku pei tea viri sikai pa pa ega tu mau du);

²²Dapala nogoe ma Yesu e pei tea mariana e pei tea tu oli ni navasasokiana wia liu sikai.

²³Go nara eu pei tea mariana eu pei tea viri laapa, nalakena eu pei tea tugoroana ki namateana naga euga ta doko mau doko mau:

²⁴ma nae, nalakena e du mau du, e peani naveiteaviriana waina e pe ta panop̃ota mau.

²⁵Nalakena tea wanogoe e mari atae mautipauri pa pa paki ragi edaku mau tea maga waina eu pae asa paki m̃aladigi ki Sup̃e, nalakena e mauri doko sara ragi naga ega madeada pavara.

²⁶Nalakena tea viri warua liu dapala nogoe e pataka gida, tea tautau, tea ta mari sa ki mau, tea ta loa mau, tea marimasalekiana m̃elu dua ki tea mari naleo sa maga, go tea mariana e pakilagi liu nakoroatelagi maga;

²⁷waina e da one asa one sara naaleatia mau, dakiusi waina e one tea viri warua liu wanogoe maga, naga ega vitua ki naviriana maga, pea nalakena namarinaleosaana aneana maga, go edaku ki tea wanogoe nalakena namarinaleosaana maga ki narei: nalakena e paka sikai maau mari tea wanogoe ragi waina e dum̃ana pitua ki nia.

²⁸Nalakena nawotaeana e lawo ki naatam̃oli maga waina eu pilake namanainaiana, naga euga vei tea viri warua liu maga; ma navasaana ni navivisaana, waina e edakugoro nawotaeana, e lawo ki Natuna waina e pei tea mariana e p̃ia lua pa pa e du mau du.