Read Nguna Togoa Etafe North PAKI HEBERU MAGA 8 Bible Online

PAKI HEBERU MAGA 8 - Nguna Togoa Etafe North bible

PAKI HEBERU MAGA 8

¹Ma tea warua liu kaka ni tea maga waina au noae epei tea waia: Tu peani tea viri warua liu dapala waia, waina e dasake pisari taleva ni matua ni malo tasake ni Natatap̃auana doko nakoroatelagi maga,

²tea suasua sikai ni tokora tapu, go ni tap̃aup̃au lomau waina Yehovah e sike a, waina naatam̃oli e da sike a mau.

³Nalakena sara tea viri warua liu eu pei tea lawokiana naga euga vitua ki navituaana maga go naviriana maga: nalakena tea wanogoe e one tea viri warua liu waia one naga nae ma ega veani tea waina ega vitua ki nia.

⁴Ma e pe toko maramana, e pe ta pei tea viri mau, nalakena tea maga waina eu pitua ki navituaana maga pae nawotaeana eu doko;

⁵naatam̃oli maga waina eu da magi tea waina e pei naviseikiana sikai go melu sikai ni naleo maga ni nakoroatelagi suasua, dapala waina Moses e pei tea tip̃akiana pae Sup̃e ragi waina e naga ega mari tap̃aup̃au: nalakena, P̃a vunusi, e noa e, naga p̃a mari naleo maga mamau puti euga vae naatulakeana waina e pei tea viseikiana paki‐go tava.

⁶Ma ragi waia e dape nasuasuaana sikai waina e p̃ia liu tea wanogoe, dapala waina ma e pei tea vae namawota ni navasasokiana wia liu sikai, waina e pei tea tawonakiana doko nasaiana wia liu maga.

⁷Nalakena navasasokiana vea wanogoe e pe ta pei tea vasadip̃aana mau, tokora sikai raki kerua e pe ta pei tea laagaana mau.

⁸Nalakena e pasadip̃a ra, po naga. Kuga leo, naaleatia maga euga wo umai, Yehovah e noa e, Go aga wo mari navasasokiana vau sikai paki nasum̃a ni Israel go paki nasum̃a ni Yudah;

⁹Ega wo da pae navasasokiana waina a magi tamada maga mari a mau Naaleatia waina a puati nam̃elearuda asa naga aga viragilua ra m̃elu dua ki navanua ni Ityipt; Nalakena nara eu da doko mau doko navasasokiana aginau mau, Go kinau a dip̃adoa ra, Yehovah e noa e.

¹⁰Nalakena tea waia e pei navasasokiana waina aga wo magi nasum̃a ni Israel mari a Edaku ki naaleatia maga wanogoe, Yehovah e noa e; Aga wo pitua ki nawotaeana aginau maga paki namidodoana adeada. Go aga wo midiri ra doko nap̃op̃oda: Go aga wo madeada pei Sup̃e, Go nara euga wo maginau pei narei:

¹¹Go euga wo da pasa piseiki mau sara naata sikasikai tea ni m̃aladigi ki da, Go sara naata sikasikai ki taida, po naga, Kuga atae Yehovah: Nalakena euga wo mamau puti atae au, Pae tea kiki kakada pa pa paki tea warua kakada.

¹²Nalakena aga wo pei saup̃ia paki namarinaleotageleana adeada maga, Go aga wo da moro midoa ki namarinaleosaana adeada maga mau.

¹³Nalo ni e naga, Navasasokiana vau sikai, e mari tea vea e duai. Ma tea waina e do duai po do matua e pei m̃aladigi ki navuoliana.