Read Nguna Togoa Etafe North KI YAKOBO 1 Bible Online

KI YAKOBO 1 - Nguna Togoa Etafe North bible

KI YAKOBO 1

¹Yakobo, tea suasua sikai ki Sup̃e go ki Nawota Yesu Kristo, paki naworawora rualima sikai tamate dua waina eu pei tea ni Tea taperaverakiana maga, kuga laelaea.

²Kuga midoaki nia naga e pei sara nalaelaeaana, taigu maga, ragi waina ku dowo paki namaridogoana visarasara maga;

³ku atae naga namaridogoana ni nasaralomauana animu e do p̃osiwosi ki nasokiana.

⁴Ma nasokiana ega veani nawosiana wia lua aneana, naga kuga wia lua po pei tea mamau, doko da pei tea tika nalo ni te navatuna mau.

⁵Ma te naata kakamu e pe tika ki namanumatuaana, ega tatagovi Sup̃e, waina e do dua tea maga mamau puti pae naveilomauana po da pasapinoa mau; go ega wo pei tea vituakiana paki nia.

⁶Ma ega tatago doko nasaralomauana, po da midoakisara mau: nalakena tea waina e midoakisara e dakiusi napeao ni natasi waina e pei tea sui duletuleakiana ki nalagi.

⁷Nalakena naatam̃oli wanogoe ega ta midoaki nia mau naga ega tape te navatuna m̃elu Yehovah;

⁸naatam̃oli p̃op̃o rua, e da pei laketoko te napua aneana mau.

⁹Ma taigida waina e pakitano ega vakavakae nalo ni navakilagiana aneana:

¹⁰go tea vei sogolapa ega vakavakae nalo ni navakitanoana aneana; nalakena ega wo pano puoli dapala napum̃a ni nam̃enau.

¹¹Nalakena elo e sake pilake nalagi tap̃araki, po mari nam̃enau e kokolo; go napum̃ana e pevera, go naleom̃atakiana kakana e puoli: dapala nogoe naatam̃oli sogolapa ma ega wo kokolo doko nasurataana aneana maga.

¹²Ae namaropaana ki naatam̃oli waina e soki namaridogoana! Nalakena ragi waina e pei tea maridogoana sua, ega wo dape vauvau ni namauriana, waina Yehovah e sai a paki tea maga waina eu dodomi a.

¹³Te naata ega ta noa ragi waina e pei tea maridogoana, A pei tea maridogoana m̃elu Sup̃e; nalakena Sup̃e e da pei tea maridogoana ki tea sa maga mau, go nae e da maridogo te naata mau:

¹⁴ma sara naatam̃oli eu sikasikai pei tea maridogoana, ragi waina eu pei tea vuatiluaana pae namasauana sa adeada, po pei tea surueana.

¹⁵Go namasauana sa, ragi waina e diena sua, e piragi namarinaleosaana: go namarinaleosaana, ragi waina e matua sua, e piragi namateana.

¹⁶Kuga ta midoaki pele, taigu dodomiana maga.

¹⁷Sara navituaana wia go sara navituaana wia lua eu pae elagi umai, eu do m̃elu Tama ni nasulu maga siwo umai, waina navanop̃otaana, kite melu ni namaradoaana e da doko sikoti a mau.

¹⁸E piragi gida tu pakilina nalakena e masauna ki navasaana ni nalomauana, naga tuga vei tea takavea seara ni tea tawonakiana aneana maga.

¹⁹Ku atae tea wanogoe, taigu dodomiana aginau maga. Ma sara naatam̃oli euga vei tea mari m̃araverave naga euga rogo, tea maridaliali naga euga vasa, tea maridaliali naga euga maeto:

²⁰nalakena namaetoana ki naatam̃oli e da mari namarinaleoleanaana ki Sup̃e mau.

²¹Nalakena tea wanogoe kuga toropusi sara naloaana go nasarasaraapeana ni nasigisigileoana, go kuga tape ega vilake namatemateana navasaana lawoana, waina e mari atae mautipauri naatamu.

²²Ma kuga vei tea mari navasaana, go kuga ta pei tea rogo e sikai maau mau, doko dum̃amu soro mu.

²³Nalakena te naata sikai e pe vei tea rogo navasaana, go e pe ta pei tea mari a mau, nae e dakiusi naatam̃oli sikai waina e do leo usiusi naraena ni nap̃atokona doko titiro sikai:

²⁴nalakena e dum̃ana leo usiusi a, po pano, po m̃araverave malio ki nia naga e dapale sava.

²⁵Ma tea waina e leo paki nawotaeana wialua, nawotaeana ni naveresiana, po doko mau doko dapala nogoe, po da pei tea rogo waina e malioki mau, ma e pei tea mari nawosiana, naatam̃oli wanogoe ega wo maropa doko namariana aneana.

²⁶Te naata sikai e pe tum̃ana midoaki nia naga e pei tea lotu, ragi waina e da do likomaraki namenana mau, ma e do surue nap̃op̃ona, nalotuana ki naata wanogoe e pei tea p̃alo.

²⁷Nalotuana tautau go waina e da pei tea mariana e loa mau narae ni Sup̃e anigida go Tamagida e pei tea waia, naga ega va punusi namalepu maga go nagoroi malepu maga doko nariesoki‐ra‐ana, go naga ega tum̃ana mauti a ega ta loa mau m̃elu dua ki maramana.