Read Nguna Togoa Etafe North KI YAKOBO 2 Bible Online

KI YAKOBO 2 - Nguna Togoa Etafe North bible

KI YAKOBO 2

¹Taigu maga, kuga ta peani nasaralomauana ki Nawota anigida Yesu Kristo, Nawota ni nasamasamaana, pilake naviragi‐narae‐ana mau.

²Nalakena naatam̃oli sikai waina e sara ki rig ni kold, po suni sugoro maramalaga e pe umai paki ekopu ni nasum̃a ni nasaisaiana animu, go naatam̃oli tika sikai waina e suni sugoro sa nae ma e pe sili paki asa;

³go ku pe leopunusi tea waina e suni sugoro maramalaga, po naga, P̃a tasake doko tokora wia waia, po noa ki tea tika, Nigo p̃a lawodu tokora wanana, kite p̃a to natano etano ki malo vasiana ni nam̃elegu;

⁴ku da midoakip̃otawotae doko nap̃alaumu, po pei tea vasa p̃otae maga ni namidodoana sa maga kite?

⁵Kuga rogo, taigu dodomiana maga; Sup̃e e da matadoa tea tika maga nalo ni maramana naga euga vei tea sogolapa doko nasaralomauana, go tea veani namarakiana waina e sai a paki tea maga waina eu dodomi a kite?

⁶Ma nimu ku dododao tea tika. Tea vei sogolapa maga eu da mari sa ki mu, po dosagi mu paki malo tasake ni navasap̃otaeana kite?

⁷Nara eu da pasa sa ki nagisa dodomadaganiana waina ku pei tea sosoana asa kite?

⁸Ma ku pei vakavuro nawotaeana ki Nawota, pae navasaana midiriana, P̃a dodomi tea ni m̃aladigi ki‐go ega tapala waina ku dum̃am̃a dodomi ko, ku mari p̃ia:

⁹ma ku pe viragi narae, ku p̃osiwosi ki namarinaleosaana, doko pei tea vasap̃iaana pae nawotaeana dapala tea tapiri maga.

¹⁰Nalakena naata waina e dogo paratiki nawotaeana mamau, ma e pe tapilagona nalo ni naleo sikai maau, sogi ni tea mamau puti ega wo liko asa.

¹¹Nalakena tea waina e naga P̃a ta mari pele mau, e moro naga, P̃a ta mari punue mau. Go ku pe ta mari pele mau, ma ku pe mari punue, ku pei tea tapiri nawotaeana.

¹²Kuga to pasa, go kuga to mari ega tapala naatam̃oli maga waina kuga wo pei tea vasap̃otaeana pae nawotaeana ni naveresiana.

¹³Nalakena navasap̃otaeana e dika nadodomiana paki tea waina e da mari nadodomiana mau: nadodomiana e pakavakae dip̃a navasap̃otaeana.

¹⁴E silae nasava, taigu maga, te naata e pe noa naga e peani nasaralomauana, go e da peani nawosiana maga mau? Nasaralomauana wanogoe e mari atae mautipauri a kite?

¹⁵Taigida sikai kite goregida sikai e pe m̃alam̃ala, po dika navinaga ni naaleatia,

¹⁶go te naata sikai kakamu e pe noa ki da, Koroga vae natam̃ateana pano, koroga vivitinu go koroga kanikani po puka; ma ku pe ta dua ra naleo maga waina eu p̃ia ki nap̃atokoda mau, e pe silae navasa?

¹⁷Dapala nogoe nasaralomauana, e pe ta pilake nawosiana maga mau, e dum̃ana pei tea mate doko.

¹⁸Ma te naata sikai e pe naga, Nigo ku peani nasaralomauana, go kinau a peani nawosiana maga: p̃a visei ki nau nasaralomauana anigo masale ki nawosiana maga, go kinau aga wo pisei ki‐go nasaralomauana ki nawosiana aginau maga.

¹⁹Nigo ku saralomau naga Sup̃e e pei tea sikai maau; ku mari p̃ia. Dimon maga ma eu saralomau, po duruuru.

²⁰Ma ku masauna naga p̃a atae, naatam̃oli p̃alo O, naga nasaralomauana masale ki nawosiana maga e pei tea oro kite?

²¹Abraham tamagida e da pei tea marileanakiana ki nawosiana maga, ragi waina e pitua ki natuna doko wede ni naviriana kite?

²²Ku punusi naga nasaralomauana e do p̃osiwosi sikoti nawosiana aneana maga, go nasaralomauana e pei tea mariana e p̃ia lua ki nawosiana maga;

²³go navasaana midiriana e pei tea vakavuroana waina e naga, Ma Abraham e saralomau navasaana ki Sup̃e, go e maneana pei tea midoakiana naga e pei namarinaleoleanaana; go e pei tea sosoana ki Sup̃e tana ri.

²⁴Ku punusi naga naatam̃oli sikai e pei tea marileanakiana ki nawosiana maga, go e da pei ki nasaralomauana sikina mau.

²⁵Go dapala nogoe Rahab nagoroi masausara e da pei tea marileanakiana ki nawosiana maga, ragi waina e piragi soki tea tautauana maga po dip̃aki lua ra pae napua p̃ota sikai kite?

²⁶Nalakena dakiusi waina nap̃atoko masale ki naatana e pei tea mate, dapala nogoe nasaralomauana masale ki nawosiana maga e pei tea mate.